অসম লাইভ২৪ঃ উত্তৰ পূৰ্বাঞ্চলত প্ৰথমবাৰৰ বাবে মিছ ইণ্ডিয়া ২০২৩ ৰ গ্ৰেণ্ড ফাইনেল অনুষ্ঠিত হ’ব। মণিপুৰত ১৩ এপ্ৰিলত অনুষ্ঠিত হ’ব মিছ ইণ্ডিয়াৰ গ্ৰেণ্ড ফাইনেল। গ্ৰেণ্ড ফাইনেলত ভাগ ল’বৰ বাবে দেশৰ আগশাৰীৰ প্ৰায়সকলোবোৰ মডেলেই উপস্থিত হৈছে উত্তৰ পূবৰ ৰাজ্য মণিপুৰত। সকলো মডেলেই সম্পূৰ্ণৰূপে প্ৰস্তুত হৈছে এই অনুষ্ঠানত ভাগ ল’ব বাবে। অসমৰো এগৰাকী মডেলে ভাগ এই অনুষ্ঠানত। মুঠ ৩০ গৰাকী প্ৰতিযোগীৰ ভিতৰত অনুষ্ঠিত হ’বলগীয়া এই প্ৰতিযোগীতাত ভাগ ল’বলৈ অসমৰ প্ৰতিযোগী অনুষ্কা লেখাৰুও উপস্থিত হৈছেগৈ মণিপুৰত।
মণিপুৰৰ এক সংবাদ মাধ্যমে শ্বেয়াৰ কৰা ভিডিঅ’ত দেখা অনুসৰি মণিপুৰৰ পৰম্পৰাগত লোকগীতেৰে মডেলসকলক আদৰণি জনোৱা হৈছে। মণিপুৰৰ মুখ্যমন্ত্ৰী এন বীৰেন সিঙেও প্ৰতিযোগীসকলক উষ্ম আদৰণি জনাইছে। মুখ্যমন্ত্ৰী এন বীৰেণ সিঙে তেওঁৰ ফেচবুক পৃষ্ঠাত লিখিছে, ‘ফেমিনা মিছ ইণ্ডিয়াৰ সকলো প্ৰতিযোগীলৈ শুভেচ্ছা জনাইছো। মই মণিপুৰৰ সকলো প্ৰতিযোগী, সংস্কৃতিৰ ভূমি আৰু ভাৰতীয় ক্ৰীড়াৰ শক্তিক্ষেত্ৰলৈ উষ্ম আদৰণি জনাইছো।’
ইপিনে অসমক প্ৰতিনিধিত্ব কৰা সুন্দৰী মডেল অনুষ্কা লেখাৰুৱেও এই অনুষ্ঠানত ভাগ ল’বলৈ মণিপুৰত উপস্থিত হৈছেগৈ। মণিপুৰত উপস্থিত হৈয়েই অনুষ্কা লেখাৰুৱে সামাজিক মাধ্যমত শ্বেয়াৰ কৰিছে বিশেষ ভিডিঅ’। মণিপুৰত লাভ কৰা আতিথ্যত অতিকৈ সুখী বুলি জনাইছে অনুষ্কাই। অসমৰ হৈ প্ৰতিনিধিত্ব কৰিও অত্যন্ত সুখী বুলি জনাইছে অনুষ্কাই।
অনুষ্কা লেখাৰু কেৱল এগৰাকী মডেলেই নে?
উত্তৰাখণ্ড ইউনিভাৰ্চিটীৰ পৰা ইংৰাজী সাহিত্যত স্নাতকোত্তৰ ডিগ্ৰীধাৰী অনুষ্কাই কেৱল মডেলিঙৰ ক্ষেত্ৰখনতেই সফল তেনে নহয়। মডেলিঙৰ লগতে এগৰাকী ভাল নৃত্যশিল্পী হিচাপেও অনুষ্কা পৰিচিত। অনুষ্কাই শাস্ত্ৰীয় সংগীততো বিশেষ ডিগ্ৰী গ্ৰহণ কৰিছে। মডেলিঙৰ ক্ষেত্ৰখনে তেওঁক প্ৰতিমুহূৰ্ততেই আকৃষ্ট কৰিছিল যাৰবাৰে ১৬ বছৰ বয়সৰে পৰাই অনুষ্কাই ৰাজ্যৰ লগতে দেশৰ বহু মডেলিং শ্ব’ত অংশগ্ৰহণ কৰি আহিছে। উত্তৰপূবৰ বহু সংখ্যক ফেশ্বন শ্ব’ত অংশগ্ৰহণ কৰি খিতাপো অৰ্জন কৰিছে অনুষ্কাই। কেৱল মডেলিঙৰ ক্ষেত্ৰখনতেই অনুষ্কাই নিজকে ব্যস্ত ৰাখে তেনে নহয়। সমান্তৰালভাৱে অনুষ্কাই সমাজৰ বিভিন্ন দিশক লৈ অতি সচেতন। নাৰী সচেতনতাৰ দিশটোক লৈ অনুষ্কাই কয় যে আমাৰ সমাজত সততে বহু নাৰীয়েই যৌন আতিহায্যৰ সন্মুখীন হয়। এইসমূহ বিষয়ে সমাজখনক কলংকিত কৰে। আমাৰ মাজৰ পৰা এনেধৰণৰ মানসিকতাক ত্যাগ কৰিব লাগে। নাৰী কোনো পণ্য সামগ্ৰী নহয়। নাৰী এক সত্ত্বা। এই সত্ত্বাক সমাজৰ প্ৰতিজন মানুহেই সন্মান কৰিব লাগে।
উত্তৰ পূবৰ মংগোলীয়ান চেহেৰাও এই ক্ষেত্ৰত প্ৰতিবন্ধক হৈছে নেকি অনুষ্কাৰ?
সততে উত্তৰপূবক ভাৰতৰ মূল ভূখণ্ডৰ লোকে কিছু পৃথক দৃষ্টিৰে চাই। এই চিন্তাধাৰা তেওঁৰ মডেলিঙৰ ক্ষেত্ৰখনত হেঙাৰো হৈছে। বহুসময়ত অনুষ্কাইয়ো এইধৰণৰ প্ৰতিবন্ধকতাৰ সন্মুখীন হৈছে। কিন্তু অনুষ্কাৰ লক্ষ্যৰ সন্মুখত এইসমূহ কথা তেনেই নগণ্য। মানসিকভাৱে এই প্ৰতিবন্ধকতাৰ বিৰুদ্ধে যুঁজি আজি অসমক প্ৰতিনিধিত্ব কৰি আগুৱাইছে অনুষ্কা। ১৫ এপ্ৰিলত মণিপুৰত অনুষ্ঠিত হ’বলগীয়া মিছ ইণ্ডিয়া ফেমিনা-২০২৩ ত ভাগ ল’ব অনুষ্কাই। নেলছন মেণ্ডেলাৰ জীৱনাদৰ্শনত আকৃষ্ট অনুষ্কাই এই প্ৰতিযোগীতাত অংশগ্ৰহণৰ পূৰ্বে বিচাৰিছে অসমবাসীৰ পৰা অকণমান আশীৰ্বাদ। তেওঁৰ এই যাত্ৰা সফল হওক। অসমলৈ কঢ়িয়াই আনক গৌৰৱ। অনুষ্কাই কঢ়িয়াই আনক মিছ ইণ্ডিয়া ফেমিনা-২০২৩ ৰ সন্মান। অসম লাইভ পৰিয়ালেও আপোনাৰ এই যাত্ৰালৈ জনালো শুভকামনা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
