ক’ৰোনা কাল, ২০২০
অসম লাইভ ২৪ঃ ২০২০ মানৱ জাতিৰ বাবে এক সংকট কাল। ২০১৯ চনত চীনৰ য়ুহানত কোভিড ১৯ ভাইৰাছ চিনাক্ত হোৱাৰ পাছত ২০২০ত বিশ্বজুৰি মহাত্ৰাসৰ সৃষ্টি কৰিছে এই ভাইৰাছে। বিশ্ব স্বাস্থ্য সংস্থাই মহামাৰী আখ্যা দিলে এই পৰিৱেশ, পৰিস্থিতিক। এই মহাসংকটৰ গৰাহত পৰিল বিশ্বৰ আন আন দেশৰ লগতে ভাৰতবৰ্ষও। মহামাৰীৰ কবলৰ পৰা ৰক্ষা পৰিবলৈ দেশে দেশে চলিল প্ৰতিষেধক উদ্ভাৱনৰ যুদ্ধকালীন তৎপৰতা। প্ৰথম অৱস্থাত চীন, ইটালী, ইংলেণ্ড আদিত ক’ৰোনা ভাইৰাছে ভয়ংকৰ ৰূপ ধাৰণ কৰিছিল। পৰৱৰ্তী সময়ত ভাৰততো মহামাৰীয়ে মহা আতংকৰ সৃষ্টি কৰে। মাৰ্চত পৰিস্থিতিৰ অৱনতি লক্ষ্য কৰি চৰকাৰে লকডাউন ঘোষণা কৰে। সমগ্ৰ দেশবাসী চিনাকি হ’ল এক নতুন পৰিৱেশ, পৰিস্থিতিৰ সৈতে। ঘৰতে আবদ্ধ হৈ থাকিবলগা হ’ল দেশবাসী। লকডাউনৰ পৰিপ্ৰেক্ষিতত বিভিন্ন স্থানৰ পৰা ঘৰমুৱা হৈছিল শ্ৰমিক, শিক্ষাৰ্থী তথা নানা বৃত্তিত জড়িত লোকসকল। ঘৰমুৱা হোৱা পৰিস্থিতি এনে পৰ্যায়লৈ গৈছিল যে ইয়ো এক সমস্যা হৈ উঠিছিল। যেনে তেনে নিজৰ ঘৰখনত উপস্থিত হ’বলৈ কোনোবাই শ শ কিলোমিটাৰ খোজকাঢ়ি, কোনোবাই চাইকেল চলাই, কোনোবাই যান-বাহনেৰে যাত্ৰা আৰম্ভ কৰিছিল। ইপিনে বন্ধ হৈ পৰিছিল ৰে’ল, বিমান যাতায়াত। বহিঃৰাষ্ট্ৰত শংকা, সংশয়ৰ মাজত জীৱন অতিবাহিত কৰিবলগা হৈছিল বহুজনে। এই সমগ্ৰ পৰিস্থিতি চৰকাৰ, প্ৰশাসনে অৰ্হনিশে নিয়ন্ত্ৰণৰ চেষ্টা চলায়। ইপিনে, এই পৰিস্থিতিত সমগ্ৰ অৰ্থনীতি ভাগি তচনচ হৈ পৰে। আনকি পোহনীয়া বা ৰাস্তাৰ পশু-পক্ষীকো প্ৰভাৱিত কৰে লকডাউনে। দিল্লী, মুম্বাইৰ দৰে মহানগৰত পথৰ কুকুৰক খাদ্য যোগান ধৰিছিল একাংশ স্বেচ্ছাসেৱী সংগঠনে। এই কোভিডকালত মাস্ক, ছেনিটাইজাৰ, হাতধোৱা আদিক লৈয়ে ব্যস্ত হ’বলগা হ’ল মানৱ জাতি। কোভিড কেয়াৰ চেণ্টাৰ, কোভিড হাস্পতাল, কণ্টেইনমেণ্ট জ’ন, কণ্টেক্ট টেষ্টিং, স্বাৱ টেষ্ট আদি বিভিন্ন নতুন আদব-কায়দাৰে চিনাকি হ’ল দেশবাসী। ক’ৰোনা খেদিবলৈ কোভিড যোদ্ধাক উৎসাহিত কৰাৰ নামত হেলিকপ্টাৰেৰে পুষ্পবৃষ্টি, থাল-বাতি বাদন, বন্তি প্ৰজ্জ্বলন আদিৰ দৰে নাভূত-নাশ্ৰুত কৰ্মকাণ্ডও মহামাৰীৰ মহাতংকত দিগ-বিদিগ হেৰুওৱা চৰকাৰে নিজা প্ৰচেষ্টা চলাইছিল। আৰম্ভ হ’ল আনলক। পৰ্যায়ক্ৰমে চৰকাৰে ব্যৱসায়, বাণিজ্য, উদ্যোগ, প্ৰতিষ্ঠান, চৰকাৰী কাৰ্যালয় আদি পুনৰ খোলাৰ অনুমতি দিলে। অৱশ্যে এতিয়াও সম্পূৰ্ণ হৈ উঠা নাই আনলক পৰ্যায়। এটা শিক্ষাবৰ্ষ হেৰুৱালে দেশৰ শিক্ষাৰ্থীয়ে। অৱশ্যে শেহতীয়াকৈ বিদ্যালয়সমূহ পৰ্যায়ক্ৰমে খোলা হৈছে। ইয়াৰ মাজতে বিশ্বজুৰি চলিছে কোভিড ১৯ক বশ কৰিব পৰা ভেকচিন উদ্ভাৱনৰ ব্যাপক চিন্তা-চৰ্চা। ব্ৰিটেইনত অক্সফ’ৰ্ড বিশ্ববিদ্যালয়ৰ তত্বাৱধানত ভেকচিন উদ্ভাৱনৰ কাম চলে। আমেৰিকা, চীন আদিৰ সমান্তৰালকৈ ভাৰততো চলিল গৱেষণা। শেহতীয়াকৈ ব্ৰিটেইনত আৰম্ভ হ’ল কোভিড ভেকচিন প্ৰদানৰ কাম। ভাৰততো চলিছে ট্ৰায়েল। এই ট্ৰায়েলৰ অন্তৰ্ভুক্ত হৈছে অসমৰ শোণিতপুৰ আৰু নলবাৰী জিলা। ৰামদেৱে কোভিডৰ প্ৰতিষেধক উদ্ভাৱনৰ চেষ্টা চলাই তীব্ৰ বিতৰ্কৰ সৃষ্টি কৰে। ক’ৰনীল উদ্ভাৱনেৰে দেশত তোলপাৰ লগাইছিল পতঞ্জলিয়ে। পিছে ন্যায়ালয়ৰ ৰোষত পৰিল পতঞ্জলি। অসমতো ক’ৰোনাই সৃষ্টি কৰিলে অভাৱনীয় পৰিৱেশ। অসমত প্ৰথম ক’ৰোনা ৰোগী চিনাক্ত হ’ল কৰিমগঞ্জত। আৰু তাৰ পাছত ৰাজ্যজুৰি আতংক, ভয়াৱহ সংক্ৰমণ। গুৱাহাটীতে নিতৌ চিনাক্ত হ’ল প্ৰায় ১০০০ পৰ্যন্ত ক’ৰোনা ৰোগী। বিশ্বজুৰি এই মহামাৰী চলি থকাৰ সময়তো একাংশৰ উদ্ভাৱনিক শক্তিক স্বীকাৰ কৰিব লাগিব। কোনোবাই সাজি উলিয়ালে ছেনিটাইজেচনৰ বিভিন্ন পদ্ধতি। হাতেৰে কোনো চুইছ আদি স্পৰ্শ নকৰাকৈ স্বয়ংক্ৰিয়ভাৱে সম্পূৰ্ণ মানুহগৰাকীক ছেনিটাইজ হ’ব পৰা ব্যৱস্থাও উদ্ভাৱন কৰিলে উত্তৰ-পূৰ্বাঞ্চলৰে কেইবাগৰাকীও উদ্ভাৱকে। বৰ্তমান অসমত পৰিস্থিতি কিছু উন্নতি ঘটিছে। আনহাতে ব্ৰিটেইনত ব্যাপক অৱনতি ঘটিছে পৰিস্থিতিৰ। ক’ৰোনাৰ নতুন ৰূপে ব্ৰিটেইনত পুনৰ ভয়াৱহ ৰূপ ধাৰণ কৰিছে। ক’ৰোনাৰ দ্বিতীয় প্ৰৱাহৰ চোক পূৰ্বৰ তুলনাত ৭০ শতাংশ বেছি বুলি গৱেষকসকলে মন্তব্য কৰিছে। ইমান দ্ৰুতগতিত হোৱা সংক্ৰমণৰ পৰিণতিত ভৰ্তি হৈ পৰিছে ব্ৰিটেইনৰ হাস্পতাল, কোভিড কেয়াৰ চেণ্টাৰ ইত্যাদি। এই কোভিডে আমাৰ মাজৰ পৰা বহুজনক চিৰদিনৰ বাবে লৈ গ’ল। ইপিনে কোভিডে সলাই পেলালে বহুতৰে জীৱনৰ গতি। কোনোবাই হেৰুৱালে জীৱিকা, কোনোবাই সলাব লগা হ’ল জীৱিকাৰ পথ। ইয়াৰ প্ৰভাৱ পৰিল অসমতো। অসমৰ চিনেমা, থিয়েটাৰ, উদ্যোগ ভয়াৱহ ক্ষতিৰ সন্মুখীন হৈছে। অৱশ্যে সম্প্ৰতি পৰিৱেশ, পৰিস্থিতি কিছু উন্নতি ঘটিছে। এই দুৰ্বিসহ বছৰৰ এই অন্তিম দিনটোত সকলোৰে প্ৰাৰ্থনা, আশা ২০২১ত অন্ত পৰিব এই যন্ত্ৰণাৰ। সুখ, সমৃদ্ধিৰে ভৰি পৰিব সকলোৰে জীৱন।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
