অসম লাইভ ২৪ঃ উইং কমাণ্ডাৰ অভিনন্দৰ মুক্তিৰ ভিতৰুৱা কথা ফাদিল কৰি বিপদত পৰিছে পাকিস্তানৰ সাংসদ। পাকিস্তানী সাংসদ আয়াজ চাদিকে সংসদত ফাদিল কৰিছিল অভিনন্দন বর্ধমানক পাকিস্তানে মুক্তি দিয়াৰ আঁৰৰ কাহিনী। ভাৰতীয় বায়ুবীৰগৰাকীক ভয়ত মুক্তি দিছিল পাকিস্তানে। ২০১৯ চনৰ ২৭ ফেব্ৰুৱাৰীত দুর্ভাগ্যবশতঃ চিৰবৈৰী পাকিস্তানৰ হাতত বন্দী হৈছিল বায়ুবীৰ অভিনন্দন। সেইদিনাই পাকিস্তানৰ বৈদেশিক পৰিক্ৰমা দপ্তৰৰ মন্ত্ৰীয়ে এখন বৈঠক আহ্বান কৰিছিল। বৈদেশিক মন্ত্ৰী শ্বাহ মহম্মদ কুৰেশ্বিয়ে সেইদিনা ভয়ত কঁপি আছিল আৰু তেওঁৰ কপাল ঘামি আছিল বুলি শেহতীয়াকৈ প্ৰকাশ কৰে সাংসদ চাদিকে। বৈদেশিক পৰিক্ৰমা দপ্তৰৰ মন্ত্ৰীগৰাকীয়ে বৈঠকত জনাইছিল যে যদি অভিনন্দনক মুক্তি নিদিয়ে তেনেহ’লে নিশা ৯ বজাত পাকিস্তানৰ ওপৰত জঁপিয়াই পৰিব ভাৰত। তেওঁ নিসংকোচে খোদাৰ শপত দি অভিনন্দনৰ মুক্তিৰ প্ৰসংগ উত্থাপন কৰিছিল। এই সকলো কথা সাংসদ চাদিকে ৰাজহুৱা কৰাৰ পাছত গৰজি উঠিছে পাকিস্তান সেনা আৰু ইমৰাণ খান চৰকাৰ। সাংসদগৰাকীৰ মন্তব্যৰ বাবে বিশ্ববাসীৰ ওচৰত পাকিস্তানৰ অলপধতুৱা স্বৰূপ উদং হোৱাত নাক ঢকাৰ উপায় নোহাৱা হৈছে সন্ত্ৰাবাদীৰ পৃষ্ঠপোষক ৰাষ্ট্ৰখনৰ। সেয়ে সাংসদগৰাকীৰ বিৰুদ্ধে শাস্তিমূলক ব্যৱস্থা গ্ৰহণৰ দিশে আগবাঢ়িছে ইমৰাণ খান চৰকাৰ আৰু পাকিস্তানৰ সেনা। ইমৰাণ খান চৰকাৰৰ মন্ত্ৰী চিবলী ফৰাজে সাংসদগৰাকীক ধমক দি কয়— এই ভুলৰ কোনো ক্ষমা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
