অসম লাইভ২৪ঃ মঙল গ্ৰহৰ পৰা এলিয়েনে পঠিয়াইছে সাংকেতিক বাৰ্তা৷ বিজ্ঞানৰ ইতিহাসত এয়ে প্ৰথম৷ কিন্তু ৰঙা গ্ৰহৰ পৰা কোনে পঠিয়াইছে এই বাৰ্তা? সেই বিষয়টোক লৈ বহুতৰেই মনত কৌতুহল৷
মহাকাশৰ যিসমূহ এলেকাক লৈ মহাকাশ বিজ্ঞানীৰ ধাৰণা আছে তাৰেই এটা হৈছে ৰঙাগ্ৰহ মঙল৷ ইতিমধ্যেই ২০৩০ চনত আকৌ এবাৰ মঙলত অভিযান চলাবলৈ সাজু হৈছে আমেৰিকান মহাকাশ সংস্থা নাছাই৷ কিন্তু ইয়াৰ পূৰ্বেই মঙলৰ পৰা পৃথিৱীলৈ আহিছে এটা সাংকেতিক বাৰ্তা৷ কিন্তু এই সাংকেতিক বাৰ্তা কোনো এলিয়েনে পঠোৱা নাই বুলি জনাইছে বিজ্ঞানীমহলে৷
ইউৰোপীয়ান মহাকাশ সংস্থা ইএছএৰ তৰফৰ পৰাই এই পৰীক্ষামূলক বাৰ্তা পঠোৱা হৈছে বুলি জনাইছে৷ ইএছএ এই বাৰ্তা পঠিয়াবলৈ ‘এক্সমাৰ্ছ ট্ৰেছ গেছ অৰবিটৰ’ ব্যৱহাৰ কৰিছিল৷ বিজ্ঞানীসকলে জনোৱা অনুসৰি মঙলৰ পৰিবেশ মানুহ থকাৰ বাবে উপযুক্ত নহয়৷ বৰ্তমানলৈ এই গ্ৰহত কোনো প্ৰাণীৰেই অস্তিত্ব বৰ্তমানলৈকে পোৱা নাই৷ কিন্তু ভৱিষ্যতে যদি মঙলৰ পৰা কোনো সাংকেতিক বাৰ্তা পৃথিৱীৰ ফালে আহে তেন্তে সেই সাংকেতিক বাৰ্তাৰ উত্তৰ কেনেদৰে পঠিয়াব পৰা যাব তাৰেই পৰীক্ষা চলাইছে বিজ্ঞানীমহলে৷
এই প্ৰসংগত ইএছএৰ বিজ্ঞানী ডেনিয়েল ডি পাওলিছে কয়, ‘মানৱ সভ্যতাৰ আৰম্ভণিৰ পৰাই মানুহে শক্তিশালী আৰু গুৰুত্বপূৰ্ণ ঘটনাসমূহৰ অনুসন্ধান কৰি আহিছে৷ বহিৰ্বিশ্বৰ পৰা সাংকেতিক বাৰ্তা পালে সমগ্ৰ মানৱজাতিৰেই এক বিশেষ অভিজ্ঞতা হ’ব৷ ইএছএ ২০১৬ চনৰ পৰা মঙললৈ মহাকাশযান পঠিওৱাৰ কুচকাৱাচ চলাই আহিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
