অসম লাইভ২৪ঃ মাতৃয়ে বাগানত পাত তুলি থাকিয়েই দেখিছিল এই সপোন। পুত্ৰক ডাঙৰ মানুহ কৰাৰ সপোন। মাতৃৰ সপোন অৱশেষত সাৰ্থক হ’ল। APS বিষয়া হ’ল চাহ বাগিচাৰ শ্ৰমিকৰ সন্তান হৰিচৰণ ভূমিজ।
আৰ্থিক দূৰৱস্থা আগুৱাই যোৱাত কেতিয়াও বাধা হ’ব নোৱাৰে। সেই কথাকে পুনৰ প্ৰমাণ কৰিলে চাহ শ্ৰমিকৰ সন্তান হৰিচৰণ ভূমিজে।নিজৰ লক্ষ্যত উপনীত হ’বলৈ কৰা ত্যাগ, একনিষ্ঠতাৰ ফলত অসম লোকসেৱা আয়োগৰ পৰীক্ষাত উত্তীৰ্ণ হৈছে হৰিচৰণ ভূমিজ। সদ্যঘোষিত APSC পৰীক্ষাৰ ফলাফলত ৪১ নং স্থানত উত্তীৰ্ণ হৈছে মৰিয়নিৰ কঠালগুৰি চাহ বাগিচাৰ হৰিচৰন ভূমিজ।
পুত্ৰই কিবা এটা পৰীক্ষাত পাছ কৰিছে, সকলো আহিছে খবৰ লবলৈ,গামোচা পিন্ধাইছে, সম্বৰ্ধনাও জনাইছে কিন্তু বাগানত পাত তোলা সহজ সৰল মাতৃয়ে একো বুজি পোৱা নাই। হৰিচৰণৰ মাতৃয়ে মৰিয়নিৰ কঠালগুৰি চাহ বাগিচাত পাত চিঙে। বাগানত পাত চিঙিও পুত্ৰক ডাঙৰ মানুহ কৰাৰ সপোন দেখিছিল মাতৃয়ে। সেয়ে অশেষ কষ্ট আৰু ঘাত-প্ৰতিঘাতৰ মাজেৰে পুত্ৰক আগুৱাই যোৱাৰ সাহস দিছিল মাতৃয়ে।
পৰীক্ষাৰ ফলাফল ঘোষণাৰ পাছতেই হৰিচৰণে সংবাদ মাধ্যমৰ আগত নিজৰ অনুভৱ প্ৰকাশ কৰি কয়, ‘২০১৯-ৰ পৰা কৰা প্ৰচেষ্টাৰ ফল পালো। চাহ বাগিচাৰ বুলি একো কথা নাই, চেষ্টা কৰিলে সফলতা লাভ কৰিবই। মোৰ এই কৃতিত্বৰ অধিকাৰী মই নহয়, মোৰ মাহে মোৰ এই কৃতিত্বৰ অধিকাৰী।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
