অসম লাইভ ২৪ঃ কোভিড-১৯-এ সমগ্ৰ বিশ্বতে এক শ্বাসৰুদ্ধকৰ পৰিস্থিতি উদ্ভৱ কৰিলে। ডাল-দৰিদ্ৰ, ধনী সকলো স্তৰৰ মানুহৰ জীৱনত যথেষ্ট প্ৰভাৱ পেলালে। কাৰোবাৰ যদি খাবলৈ নাইকিয়া হ’ল, কোনো সম্ভ্ৰান্ত লোকৰ হয়তো আকাল পৰিল। তাৰমাজতে এচামে চলাই গ’ল জীয়াই থকাৰ বাবে সংগ্ৰাম। বহুলোকে কাম হেৰুৱালে আৰু কোনোবাই কাম এৰিবলৈ পৰিস্থিতিত বাধ্য হ’ল । ক’ৰোনাৰ এনে জটিল সময়ত বহুলোকেই যথেষ্ট কষ্ট কৰি নিজৰ উপাৰ্জন কৰাৰ লগতে নিজৰ উপাৰ্জনৰ উৎসৰ প্ৰতি থকা দায়িত্ববোধ দেখুৱাই গ’ল। এনে এটা দৃষ্টান্তই দেখা গ’ল মহাৰাষ্ট্ৰত। অশেষ কষ্ট-যন্ত্ৰণা সহিও মহামাৰীৰ সময়ত পিছ হুহুকি নগ’ল এহাল শাহু-বোৱাৰী। মহামাৰীৰ জটিল সময়ত দুই মহিলাই নিজৰ কৰ্ম কৰি গ’ল। কোনো সমস্যাকে ভ্ৰূক্ষেপ নকৰি এই শাহু-বোৱাৰী যোৰাটোৱে নিজৰ কামত নিয়োজিত হৈ এক উদাহৰণ দাঙি ধৰিবলৈ সক্ষম হৈছে। মন্দাটাই আৰু শাহু সান্তাবাই সিন্ধে যোৱা ১৫ বছৰৰ পৰা বাতৰি কাকত বিলোৱা কৰ্মত নিয়োজিত হৈ আহিছে। মহাৰাষ্ট্ৰৰ কলহাপুৰ জিলাৰ এখন সৰু গাঁৱৰ নিৱাসী এই শাহু-বোৱাৰীয়ে বৰ্তমান সময়ত সহনশীলতাৰ এক অনন্য উদাহৰণ হিচাপে পৰিগণিত হৈছে। মহিলা সৱলীকৰণৰ উৎকৃষ্ট উদাহৰণ হিচাপেও পৰিলক্ষিত হৈছে এই শাহু-বোৱাৰী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
