অসম লাইভ২৪ঃ সামান্য উপাৰ্জনেৰে কোনোমতে সংসাৰ চলাইছিল। ট্ৰেইনত হকাৰ হিচাপে যাত্ৰীৰ চাহ বিক্ৰি কৰিছিল পিনাকীয়ে? সংসাৰৰ হাজাৰটা বোজা কান্ধত তুলি পিনাকী মণ্ডলে ট্ৰেইন যাত্ৰীসকলৰ মাজত চাহ বিক্ৰি কৰি ফুৰিছিল। কিন্তু শুকুৰবাৰে নিশা পিনাকীৰ পৰিয়াললৈয়ো আহিল বেয়া খবৰটো। পিনাকী আৰু নাই। অভিশপ্ত কৰমণ্ডল এক্সপ্ৰেছত যাত্ৰীক চাহ যোগান ধৰিয়েই হেৰাই গ’ল পিনাকী।
ওড়িশাৰ শ্যামপুৰৰ পালতাবেড়িয়াৰ বাসিন্দা আছিল পিনাকী। কৰমণ্ডল এক্সপ্ৰেছত লকডাউনৰ পাছৰে পৰাই চাহ বিক্ৰি কৰা হকাৰ হিচাপে কৰ্মনিৰ্বাহ কৰিছিল পিনাকীয়ে। গতানুগতিকভাৱেই শুকুৰবাৰেও তেওঁ এই অভিশপ্ত ট্ৰেইনখনত যাত্ৰা কৰিছিল। হাঁহিমুখে যাত্ৰীক হেঁপাহৰ চাহকাপ বিলাই থকাৰ মাজতেই হঠাতেই এটা ধাক্কা, ক্ষণিকতেই সকলো শেষ।
মৰ্মান্তিক ট্ৰেইন দুৰ্ঘটনাটোত মৃত্যুক আঁকোৱালি ল’লে পিনাকী মণ্ডলে। পিনাকীৰ মৃত্যুৰ খবৰ পোৱা মাত্ৰকেই শোকত ভাঙি পৰিছে পিনাকীৰ পত্নী বৰ্ষা মণ্ডলৰ লগতে শ্যামপুৰবাসী। পিনাকীৰ মৃত্যুৰ খবৰ পোৱা মাত্ৰকেই পত্নী বৰ্ষাই কান্দি কান্দি কৈছে, ‘মাহৰ ২০-২২ দিন তেওঁ ওড়িশাতেই থাকে। কিছুদিন আগতে এবাৰ ঘৰলৈ আহিছিল। আকৌ কৰ্মস্থলীলৈ উভতিছিলহে। য’ত দুৰ্ঘটনাটো হৈছে তাৰ কাষতেই আমাৰ মাহীৰ ঘৰ। খবৰটো পাই মই বিশ্বাস কৰা নাছিলো। মাহীক ফোন কৰি এবাৰ সেই স্থানলৈ যাবলৈ খাটনি ধৰিলো। মাহীয়ে মোৰ কথামতেই তাত গৈ মৃতদেহৰ মাজত তেওঁৰ মৃতদেহ প্ৰত্যক্ষ কৰে। মৃতদেহ লাভ কৰিলেও মই এই মৃত্যুক মানি ল’ব পৰা নাই।’ কান্দোনত ভাঙি পৰা বৰ্ষাই লগতে কয়, ‘আমি পেটে-ভাটে খাই থকা মানুহ। তেওঁ হকাৰ কৰি যেনেতেনে ঘৰখন চলাই আছিল।’
উল্লেখ্য যে এই দুৰ্ঘটনাত বৰ্তমানলৈ ৩০০ ৰো অধিক লোকৰ মৃতদেহ উদ্ধাৰ হৈছে। হাস্পতালত ভৰ্তী হৈ আছে ১০০০ ৰো অধিক লোক। ইতিমধ্যে ঘটনাস্থলী পৰিদৰ্শন কৰিছে প্রধানমন্ত্ৰী নৰেন্দ্ৰ মোদীয়েও। চিকিৎসালয়ত চিকিৎসাধীন হৈ থকা আহতসকলৰো খবৰ লৈছে প্ৰধানমন্ত্ৰীগৰাকীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
