তামিলনাডুৰ মুখ্যমন্ত্ৰী হিচাপে জোছেফ বিজয়ে শপত লোৱাৰ পিছৰে পৰা অন্যান্য ৰাজনৈতিক বিষয়বোৰৰ লগতে আহিবলগীয়া তেওঁৰ আগন্তুক ছবি ‘Jana Nayagan’ক লৈও চৰ্চাত আছিল। এই ছবিখনৰ শ্বুটিং আৰু সম্পাদনাৰ কাম কেতিয়াবাই সম্পূৰ্ণ হৈছিল। প্ৰায় ৬ মাহ আগৰে পৰা মুক্তিৰ অপেক্ষাত থকা বিজয় থালাপতিৰ ‘জন নেতা’ বা Jana Nayaganৰ অৱশেষত মুক্তিৰ তাৰিখ থিৰাং কৰা হৈছে। প্ৰায় ৬ মাহৰ দীৰ্ঘ অপেক্ষাৰ অন্তত দক্ষিণ ভাৰতৰ ছুপাৰষ্টাৰ তথা তামিলনাডুৰ মুখ্যমন্ত্ৰী বিজয়ে ছচিয়েল মিডিয়াযোগে সদৰী কৰিছে এই কথা। অহা ২৩ জুলাইত দেশৰ বিভিন্ন চিনেমা হলত মুক্তি পাব ছবিখনে। এই ছবিখনৰ বাবে অনুৰাগীসকলে বহুদিন ধৰি অপেক্ষা কৰি আছিল, কিয়নো এইখনেই হয়টো বিজয়ৰ অভিনয় জীৱনৰ শেষৰখন ছবি হ’ব। তেওঁ ইতিমধ্যে চলচ্চিত্ৰ জগতৰ পৰা আঁতৰি ৰাজনীতিত সম্পূৰ্ণভাৱে সক্ৰিয় হৈছে আৰু বৰ্তমান তামিলনাডুৰ মুখ্যমন্ত্ৰীৰ দায়িত্বত আছে।
Jana Nayaganক A চাৰ্টিফিকেট CBFCৰ
ছবিখন ইয়াৰ আগেয়ে ৯ জানুৱাৰীত মুক্তি দিয়াৰ পৰিকল্পনা কৰা হৈছিল। কিন্তু সেইসময়ত ছবিখনে চেন্সৰ ব’ৰ্ডৰ অনুমোদন নোপোৱাত মুক্তিৰ দিন পিছুৱাই গৈছিল। শেহতীয়াকৈ CBFCএ ছবিখনক চেন্সৰ প্ৰমাণ পত্ৰ প্ৰদান কৰাৰ পিছত বিজয়ে আনুষ্ঠানিকভাৱে নতুন মুক্তিৰ তাৰিখ ঘোষণা কৰিছে। ছবিখনে A প্ৰমাণপত্ৰ লাভ কৰিছে, অৰ্থাৎ এইখন কেৱল ১৮ বছৰৰ ঊৰ্ধ্বৰ দৰ্শকৰ বাবে উপযুক্ত।
কিমান দীঘলীয়া হ’ব এই ছবিখন?
Jana Nayagan হিন্দী, তামিল আৰু তেলুগু ভাষাত একেলগে মুক্তি পাব। হিন্দী ভাষাত ছবিখনৰ নাম ‘জন নেতা’ থাকিব। ছবিখন পৰিচালনা কৰিছে এইচ বিনোথে (H. Vinoth) আৰু প্ৰযোজনা কৰিছে KVN Productionsএ। ছবিখনৰ মুঠ দৈৰ্ঘ্য ৩ ঘণ্টা ৩ মিনিট ১১ ছেকেণ্ড। ছবিখনত বিজয় থালাপতিৰ উপৰিও ববী দেউল, পূজা হেগড়ে, প্ৰকাশ ৰাজেও অভিনয় কৰিছে। ছবিখনৰ সংগীত পৰিচালনা কৰিছে অনিৰুদ্ধ ৰবিচন্দৰে। ছবিখনত বিজয় থালাপতিয়ে এজন IPS বিষয়াৰ চৰিত্ৰত অভিনয় কৰিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
