ইউৰোপৰ দেশ শ্লোভেনিয়াৰ পেছাদাৰী ফুটবলাৰ লুকা মাজচেন ভাৰতীয় ফুটবলপ্ৰেমীৰ বাবে এক পৰিচিত নাম। তেওঁৰ দ্ৰুতগতি, গোল কৰাৰ দক্ষতা আৰু বিভিন্ন ভাৰতীয় ক্লাবৰ হৈ আগবঢ়োৱা অসাধাৰণ প্ৰদৰ্শনে তেওঁক বিশেষ জনপ্ৰিয়তা প্ৰদান কৰিছে। কিন্তু কেৱল খেলুৱৈ হিচাপেই নহয়, তেওঁৰ পিঠিত অংকিত ভগৱান শিৱৰ বিশাল টেটু আৰু পবিত্ৰ মহামৃত্যুঞ্জয় মন্ত্ৰও বহু লোকৰ দৃষ্টি আকৰ্ষণ কৰিছে। এজন শ্লোভেনিয়ান ফুটবলাৰে কিয় হিন্দু ধৰ্মৰ অন্যতম আৰাধ্য দেৱতা ভগৱান শিৱক নিজৰ দেহত চিৰস্থায়ীভাৱে অংকন কৰিলে—এই প্ৰশ্ন বহুজনৰ মনত উদয় হয়। এই সিদ্ধান্তৰ আঁৰত আছে ভাৰতত কটোৱা তেওঁৰ জীৱনৰ এক গভীৰ আধ্যাত্মিক যাত্ৰা।
এখন গ্ৰন্থৰ জৰিয়তে ভাৰতৰ প্ৰতি আকৰ্ষিত হৈছিল লুকা
লুকাই এক সাক্ষাৎকাৰত কৈছিল যে ভাৰতীয় আধ্যাত্মিকতাৰ প্ৰতি তেওঁৰ আগ্ৰহৰ আৰম্ভণি হৈছিল বিখ্যাত উপন্যাস ‘শান্তাৰাম’ পঢ়াৰ পিছত। এই গ্ৰন্থখনে তেওঁক ভাৰতৰ সংস্কৃতি, দৰ্শন আৰু আধ্যাত্মিক চিন্তাধাৰাৰ সৈতে চিনাকি কৰাই দিয়ে। প্ৰথমে কেৱল কৌতূহল হিচাপে আৰম্ভ হোৱা এই আগ্ৰহ ক্ৰমে তেওঁৰ জীৱনৰ এক গুৰুত্বপূৰ্ণ অংশত পৰিণত হয়। ভাৰতত খেলি থকা সময়ছোৱাত ঘটা আন এক ঘটনাই তেওঁৰ এই আধ্যাত্মিক অনুভৱক আৰু অধিক গভীৰ কৰি তোলে। এজন সতীৰ্থ খেলুৱৈৰ মাতৃয়ে পূজা কৰাৰ পিছত তেওঁক কয় যে পূজাৰ সময়ত তেওঁৰ মনত “ৰুদ্ৰ” নামটো আহিছিল। এই কথাই লুকাক আচৰিত কৰি তোলে। তেওঁ ইণ্টাৰনেটত ‘ৰুদ্ৰ’ৰ অৰ্থ বিচাৰি জানিব পাৰে যে ৰুদ্ৰ হৈছে ভগৱান শিৱৰ এক শক্তিশালী আৰু তেজস্বী ৰূপ। এই আৱিষ্কাৰে তেওঁক গভীৰভাৱে প্ৰভাৱিত কৰে আৰু ধ্যান, মননশীলতা তথা আধ্যাত্মিক সাধনাৰ প্ৰতি অধিক আগ্ৰহী কৰি তোলে।
পিঠিত শিৱৰ টেটু অংকন
ভাৰতত কটোৱা উপৰিউক্ত অভিজ্ঞতাসমূহৰ স্মৃতি হিচাপেই তেওঁ নিজৰ পিঠিত ভগৱান শিৱৰ বিশাল প্ৰতিচ্ছবি আৰু মহামৃত্যুঞ্জয় মন্ত্ৰ অংকন কৰে। হিন্দু ধৰ্মত মহামৃত্যুঞ্জয় মন্ত্ৰক সুৰক্ষা, আৰোগ্য, সাহস আৰু অন্তৰ্দৈহিক শক্তিৰ প্ৰতীক হিচাপে গণ্য কৰা হয়। লুকাৰ বাবে এই টেটু কোনো ফেশ্যনৰ অংশ নহয়; ই তেওঁৰ অন্তৰ্জগতৰ পৰিৱৰ্তন আৰু আধ্যাত্মিক বিশ্বাসৰ প্ৰতিফলন। লুকাই স্পষ্টকৈ স্বীকাৰ কৰিছে যে ভাৰতে তেওঁৰ জীৱনৰ দৃষ্টিভংগী সম্পূৰ্ণৰূপে সলনি কৰি দিছে। তেওঁৰ ভাষাত, “এই পৰিৱৰ্তন ভাৰতেই মোৰ জীৱনত আনিছে।” ভাৰতত কটোৱা সময়ে তেওঁক কেৱল এজন সফল ফুটবলাৰ হিচাপে নহয়, এজন অধিক সচেতন, ধ্যানমগ্ন আৰু জীৱনক নতুন দৃষ্টিৰে চাব পৰা ব্যক্তি হিচাপেও গঢ়ি তুলিছে।
লুকাৰ ফুটবল কেৰিয়াৰ
ফুটবল জীৱনতো তেওঁ ভাৰতত এক উল্লেখযোগ্য সফলতা লাভ কৰিছে। ২০২০ চনত চাৰ্চিল ব্রাদাৰ্ছ ক্লাবৰ হৈ আই-লীগত যোগদান কৰি প্ৰথমটো ছিজনতেই ১৫খন খেলত ১১টা গ’ল কৰি লীগৰ দ্বিতীয় সৰ্বাধিক গ’লদাতা হৈছিল। ইয়াৰ পিছত গোকুলাম কেৰালাৰ হৈ আই-লীগ খিতাপ জয় কৰে। তাৰপিছত ৰাউণ্ডগ্লাছ পাঞ্জাবৰ হৈ খেলি পুনৰ আই-লীগ জয় কৰাৰ লগতে লীগৰ সৰ্বোচ্চ গ’লদাতা আৰু ‘প্লেয়াৰ অব দ্য ছিজন’ সন্মান লাভ কৰে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
