অসম লাইভ ২৪ঃ নৱবৰ্ষত ভাল খবৰ। ভাৰতে লাভ কৰিলে ক’ৰোনা ভেকচিন। অক্সফোৰ্ড বিশ্ববিদ্যালয় আৰু এষ্ট্ৰাজেনেকাৰ যুটীয়া প্ৰচেষ্টাত নিৰ্মিত ক’ভিচিল্ড ভেকচিন ভাৰতত প্ৰদানৰ অনুমতি দিলে বিশেষজ্ঞ সমিতিয়ে। আজি দিল্লীত অনুষ্ঠিত হৈছে বিশেষজ্ঞ কমিটীৰ বৈঠক। এই বৈঠকত তিনিটা কোম্পানীয়ে নিজৰ উৎপাদিত ভেকচিনৰ প্ৰেজেনটেচন দিয়ে। ফাইজাৰ, ভাৰত বায়োটেক আৰু চিৰাম ইনষ্টিটিউটে প্ৰেজেনটেচন দিছে। ইয়াৰ পিছত বিশেষজ্ঞ কমিটীয়ে অনুমোদন দিয়ে চিৰাম ইনষ্টিটিউটে উৎপাদন কৰা ক’ভিচিল্ড ভেকচিনক। উল্লেখ্য ভাৰত বায়’টেকে ‘কোভাক্সিন’ নামৰ প্ৰতিষেধক দেশীয়ভাৱে উৎপাদন কৰিছে। আমেৰিকাই উৎপাদন কৰিছে ‘ফাইজাৰ’ নামৰ ক’ৰোনাৰ প্ৰতিষেধক। আনহাতে চিৰাম ইনষ্টিটিউটে অক্সফ’ৰ্ড বিশ্ববিদ্যালয়ৰ ‘কোভিচিল্ড’ ভেকচিন উৎপাদন কৰিছে। উল্লেখ্য আজি এই বিশেষ বৈঠকত ‘কোভিচিল্ড’ ভেকচিনক জৰুৰী অনুমোদন দিয়াৰ সন্দৰ্ভত আলোচনাই বিশেষ গুৰুত্ব লাভ কৰে। আনহাতে কেন্দ্ৰীয় স্বাস্থ্যমন্ত্ৰী হৰ্ষবৰ্ধনে নৱবৰ্ষৰ প্ৰথম দিনটোতে স্বাস্থ্য বিভাগৰ শীৰ্ষ বিষয়ববীয়াৰ সৈতে আলোচনাত মিলিত হয়। এই আলোচনাৰ অন্তত স্বাস্থ্যমন্ত্ৰীগৰাকীয়ে কয় যে ভাৰতৰ সকলো ৰাজ্যৰ নিৰ্বাচিত স্থানত প্ৰতিষেধকৰ ড্ৰাই ৰাণ সম্পন্ন হ’ব। শনিবাৰৰ পৰা আৰম্ভ হ’ব ড্ৰাই ৰাণ। আনহাতে গুৱাহাটীত ছুপাৰ স্পেচিয়েলিটী হাস্পতাল মুকলি কৰি স্বাস্থ্যমন্ত্ৰী হিমন্ত বিশ্ব শৰ্মাই কয় যে ফেব্ৰুৱাৰীত ভেকচিন উপলব্ধ হ’ব। প্ৰথম পৰ্যায়ত কোভিড যোদ্ধা চিকিৎসক-চিকিৎসাকৰ্মীসকলে প্ৰতিষেধক লাভ কৰিব । ইতিমধ্যে কেন্দ্ৰীয় চৰকাৰে বুথ গঠন পদ্ধতিৰে ভেকচিন প্ৰদানৰ যো-জা চলাইছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
