ফিফা বিশ্বকাপ ২০২৬ৰ কোৱাৰ্টাৰ ফাইনেলত ইংলেণ্ডৰ হাতত ২-১ গ’লত পৰাস্ত হৈ নৰৱেই বিদায় ললেও জনপ্ৰিয়তা কমাৰ পৰিৱৰ্তে দুগুণে বাঢ়িছে দলটোৰ তাৰকা ষ্ট্ৰাইকাৰ এৰ্লিন হালাণ্ডৰ। টুৰ্নামেণ্টখনত ৭টা গল কৰি এসময়ত গোল্ডেন বুটৰ দৌৰতো মেছি আৰু এমবাপেৰ সৈতে আছিল হালাণ্ড। নিজৰ সহজ-সৰল ব্যক্তিক্ৰমী স্বভাৱৰ বাবে সমগ্ৰ বিশ্বজুৰি বিপুল জনপ্ৰিয়তা লাভ কৰা হালাণ্ডৰ দল নৰৱেয়ো এইবাৰ প্ৰথমবাৰৰ বাবে ফিফা বিশ্বকাপৰ কোৱাৰ্টাৰ ফাইনেললৈ উন্নীত হৈছিল। নৰৱেৰ এই সফলতাৰ একমাত্ৰ কৰ্তৃত্বও অনুৰাগীয়ে হালাণ্ডকেই দিছে।
হালাণ্ডৰ আকাশলংঘী জনপ্ৰিয়তা আৰু পেৰুত অভিনৱ ঘটনা
হালাণ্ডৰ এই জনপ্ৰিয়তাৰ প্ৰভাৱ কেৱল যে ইউৰোপতেই আছে এনে নহয়। নৰৱেৰ পৰা হাজাৰ হাজাৰ দূৰত্বত অৱস্থিত দক্ষিণ আমেৰিকাৰ এখন দেশ পেৰুতো স্পষ্টভাৱে হালাণ্ডৰ জনপ্ৰিয়তা দেখা গৈছে। পেৰুৰ ৰাষ্ট্ৰীয় নিবন্ধন সংস্থা Reniec-ৰ তথ্য অনুসৰি, দেশখনত নতুনকৈ জন্ম হোৱা মুঠ ৫৫৯টা শিশুৰ নাম এৰ্লিং হালাণ্ডৰ পৰা অনুপ্ৰাণিত কৰি অভিভাৱকে ৰাখিছে। ইয়াৰে ৪৬৮টা শিশুৰ নাম “হালাণ্ড” হিচাপে নিবন্ধিত হৈছে, আনহাতে ৯১টা শিশুৰ নাম “এৰ্লিং হালাণ্ড” হিচাপে পঞ্জীয়ন কৰা হৈছে বুলি দেশখনৰ ৰাষ্ট্ৰীয় নিবন্ধন সংস্থা Reniec-এ সদৰী কৰিছে। Reniec-এ জনোৱা মতে, ফিফা বিশ্বকাপ ২০২৬ আৰম্ভ হোৱাৰ প্ৰথম সপ্তাহৰ ভিতৰতে এই নামসমূহ পঞ্জীয়ন কৰাৰ অধিকাংশ আবেদন জমা পৰিছিল।
বিশ্বকাপত উজ্জীৱিত হালাণ্ডৰ প্ৰদৰ্শন
এৰ্লিং হালাণ্ডে বিশ্বকাপত মুঠ ৭টা গ’ল কৰি গোল্ডেন বুটৰ দৌৰতো অন্যতম দাবীদাৰ আছিল। যদিও কোৱাৰ্টাৰ ফাইনেলত ইংলেণ্ডৰ বিৰুদ্ধে পৰাজয়ৰ ফলত নৰৱেৰ বিশ্বকাপ অভিযানৰ ইতি পৰে, তথাপিও তেওঁৰ প্ৰদৰ্শন আৰু জনপ্ৰিয়তাই বিশ্বজুৰি অগণন অনুৰাগীক অনুপ্ৰাণিত কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
