১০ বছৰতকৈ অধিক সময় ধৰি সন্তানটো বিচনাত পৰি আছে৷ কলেজত পঢ়ি থকা এক দুৰ্ঘটনাৰ পাছত স্নায়ুৰ অসুখত ভূগি আছে সন্তানটো৷ শৰীৰৰ ১০০ শতাংশই পক্ষাঘাতগ্ৰস্থ৷ দিনৰ পাছত দিন সন্তানৰ অসহনীয় যন্ত্ৰণা, নিজৰ আৰ্থিক দুৰাবস্তা আৰু মানসিক অৱস্থাৰ কথা জনাই আদালতত সন্তানৰ ইচ্ছামৃত্যুৰ আৰ্জি জনাইছে এই বৃদ্ধ দম্পতিহালে৷ এই আবেদন খাৰিজ কৰি দিছে দিল্লী হাইকৰ্টে৷
সন্তানটোৰ নাম হৰিশ৷ মোহালিৰ চণ্ডীগড় বিশ্ববিদ্যালয়ৰ ছিভিল ইণ্ডিনিয়াৰিঙত পঢ়াশুনা কৰিছিল৷ হঠাৎ এক দুৰ্ঘটনা৷ ২০১৩ চনত কলেজৰ চাৰিমহলাৰ পৰা পৰি যায় হৰিশ৷ প্ৰাণৰক্ষা পৰিলেও শৰীৰৰ প্ৰায় সমস্ত অংগই বিকল হৈ পৰে৷ মূৰৰ আঘাত অত্যন্ত গুৰুতৰ আছিল৷ দুৰ্ঘটনাক লৈ ৰহস্যৰ গোন্ধও পাইছিল বহুজনে৷ থানাত এফ আই আৰো দাখিল কৰিছিল হৰিশৰ পিতৃ-মাতৃয়ে৷ সন্তানৰ চিকিৎসাৰ বাবে এখনৰ পাছত আনখন হাস্পতালত ঘূৰিছে পিতৃ-মাতৃ৷ দীৰ্ঘ দিন চণ্ডীগড়ৰ পিজিআইত হৰিশৰ চিকিৎসা চলি আছে৷ তাৰপাছতেই এমছ, ৰামমনোহৰ লোহিয়া, লোকনায়ক আৰু দিল্লীৰ ফাৰ্টিছ হাস্পতালতো চিকিৎসা হৈছে৷ কিন্তু শাৰীৰিক অৱস্থাৰ উন্নতি নহ’ল৷ ১১ বছৰতকৈ বেছি সময় তেওঁ বিচনাৰ পৰা উঠা নাই৷ প্ৰতি দিনেই শেষ হৈ আহিছে পুত্ৰৰ শৰীৰ৷ কেনেকৈ চাই থাকে পিতৃ-মাতৃয়ে৷
প্ৰতিদিনে সন্তানক এনেকৈ মৃত্যুৰ দিশে গৈ থকা দেখি দিল্লী হাইকৰ্টৰ দ্বাৰস্ত হৈছে হৰিশৰ ৬২ বছৰীয়া পিতৃ ৰানা আৰু মাতৃ নিৰ্মলা দেৱী৷ তেওঁলোকৰ আৱেদন, মেডিকেল বৰ্ড বহুৱাই সন্তানক পেছিভ ইউথানছিয়া অৰ্থাৎ সন্তানৰ ইচ্ছামৃত্যু লাগে৷ আদালতৰ ওচৰত পিতৃ ৰানাই কয়, ‘যেতিয়া পিতৃ মাতৃয়ে সন্তানৰ মৃত্যু কামনা কৰে তাতকৈ পৃথিৱীত একো নিষ্ঠুৰতাই নাই৷ সেয়া প্ৰকৃততে ভালপোৱাৰ অভিশাপ৷ সেই ভালপোৱাৰ টানতেই সন্তানৰ জীৱন শেষ কৰি দিয়াৰ অনুমতি বিচাৰিছো৷’
সন্তানৰ শাৰীৰিক কষ্টৰ সৈতে নিজৰ মানসিক আৰু আৰ্থিক অৱস্থাৰ কথাও হাইকৰ্টৰ সন্মুখত তুলি ধৰিছে ৰানাই৷ তেওঁ কয়, ‘সন্তানটোক ২৪ ঘণ্টাই এগৰাকী নাৰ্ছৰ সহায়ত ৰখি আছো৷ নাৰ্ছগৰাকীক মাহিলী ২৭ হাজাৰ টকা পাৰিশ্ৰমিক দিব লাগে৷ আৰু আমাৰ সকলোৰে মাহিলী উপাৰ্জন মাত্ৰ ২৮ হাজাৰ টকা৷’ বেচৰকাৰী কাৰ্যালয়ত কাম কৰা পিতৃ ৰানাৰ দুৰ্দশা ইমানতেই শেষ নহয়৷ সন্তানৰ চিকিৎসাৰ বাবে এজন ফিজিঅ’থেৰাপিষ্টো আছে৷ তেওঁৰ মাহিলী দৰমহা ১৪-১৫ হাজাৰ টকা দিব লাগে৷ বছৰৰ পাছত বছৰ সন্তানৰ কষ্ট আৰু বৃদ্ধিহে পাইছে৷ চিকিৎসেও কৈছে যে কোনো আশাৰ খবৰ নাই৷ ইফালে চিকিৎসাৰ ব্যয়ো শেষ হোৱা নাই৷ দৈনিক চিকিৎসাৰ বাবদ হাজাৰ হাজাৰ টকা ব্যয় কৰি সৰ্বস্বান্ত হৈ পৰিছে পিতৃ ৰানা৷
হাস্পতালত চিকিৎসাধীন হৈ থকাৰ সময়ত কেন্দ্ৰীয় চৰকাৰৰ পৰা ৫০ হাজাৰ টকাৰ এককালীন সাহায্য পাইছিল পিতৃয়ে৷ তাৰপিছৰ পৰা সকলো ব্যয় পিতৃৰ নিজা৷ হাইকৰ্টৰ কাষ চাপি পিতৃয়ে কয়, ‘কেনেকৈ আমি জীয়াই আছো সুধিলে আমি বুজাই ক’ব নোৱাৰিম৷ সন্তানৰ প্ৰাণৰক্ষা কৰিবলৈ নিজৰ অংগ কেইটাৰ বাদে বিক্ৰি কৰিবলৈ আৰু একো নাই৷ সন্তানটো ভাল হ’ব বুলি জানিলে আমি তাকো কৰিলো হেতেন কিন্তু এতিয়া সেই আশাও নাই৷ এনেকৈ তিল তিলকৈ মৰি মৰি জীয়াই থকাতকৈ সি গুচি যাওক৷ কষ্ট আৰু সহ্য হোৱা নাই৷’
২০২১ চনত পিতৃয়ে নিজৰ তিনিমহলীয়া ঘৰটোও বিক্ৰি কৰি দিছে৷ এতিয়া পিতৃৰ হাতত ধন অহাৰো কোনো উৎস নাই৷ মাত্ৰ ৩ হাজাৰ টকাৰে পিতৃৰ ঘৰ চলিছে৷ সেই ধনেৰে কি কৰিব? চিকিৎসা কৰিব নে নিজে খাদ্য খাব? এই বিষয়টোক লৈয়েই পিতৃয়ে দিল্লী হাইকৰ্টৰ কাষ চাপিছে৷ বিগত ৮ জুলাইত আদালতে ৰানাৰ আৱেদন খাৰিজ কৰি দিছে৷ কাৰণ আমাৰ দেশৰ আইনত ইচ্ছামৃত্যুৰ অনুমতি নাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
