অসম লাইভ২৪ঃ ‘বোৰ্খা পিন্ধি ৰাস্তালৈ নোলাব। বোৰ্খা পিন্ধি ওলালেই ভৰিব লাগিব ফাইন। ধৰ্মৰ অজুহাত কোনোবাই দিলেই দিব লাগিব মোটা অংকৰ জৰিমনা।’ হিজাব বিৰোধী আন্দোলনে ইৰাণত ভয়াৱহ ৰূপ লোৱাৰ সময়তে ছুইজাৰলেণ্ডতো লাঘু হৈছে নতুন নিয়ম। ছুইজাৰলেণ্ডত ‘বোৰ্খা বাতিল আইন’ কঠোৰভাৱে ৰূপায়নৰ সিদ্ধান্ত লৈছে চৰকাৰে।
প্ৰস্তাৱিত আইনমতে, মুখ ঢাকি ছুইজাৰলেণ্ডৰ ৰাস্তাত ওলালেই ৯০০ পাউণ্ড জৰিমনা ভৰিব লাগিব। ভাৰতীয় মুল্যত এই ধন হ’ব ৮২ হাজাৰ টকা। এই আইনৰ খচৰা প্ৰকাশ কৰিছে ছুইজাৰলেণ্ড চৰকাৰে। খচৰাত উল্লেখ থকা অনুসৰি কিছু ক্ষেত্ৰত এই আইন শিথিলো কৰা হ’ব। কুটনৈতিক ক্ষেত্ৰ, ধৰ্মীয় স্থান বা বিমানত যোৱাৰ সময়ত কোনো মহিলা বা যুৱতীয়ে ইচ্ছা অনুসৰি বোৰ্খা পিন্ধিব পাৰে। ইৰাণৰ আন্দোলন চলি থকাৰ সময়তে ছুইজাৰলেণ্ড চৰকাৰে গ্ৰহণ কৰা সিদ্ধান্তক লৈ আন্তৰ্জাতিক মহলতো আৰম্ভ হৈছে চৰ্চা।
উল্লেখ্য যে ২০২১ চনতেই ছুইজাৰলেণ্ড প্ৰশাসনে জাৰি কৰিছিল ‘বোৰ্খা বাতিল আইন’। ইউৰোপৰ বহুকেইখন দেশতেই ইতিমধ্যে বোৰ্খা সম্পূৰ্ণৰূপে নিষিদ্ধ। ২০১১ চনত পোনতে বোৰ্খা নিষিদ্ধ কৰিছিল ইউৰোপীয়ান দেশ ফ্ৰান্সে। পৰবৰ্তীসময়ত ডেনমাৰ্ক, অষ্ট্ৰিয়া, নেদাললেণ্ডৰ লগতে বুলগেৰীয়াতো বোৰ্খা নিষিদ্ধ কৰা হৈছে। ছুইজাৰলেণ্ড চৰকাৰে প্ৰকাশ কৰা মতে, ছুইজাৰলেণ্ডৰ মুঠ জনসংখ্যাৰ মাত্ৰ ৫ শতাংশহে মুছলমান সম্প্ৰদায়ৰ লোক। দেশখনৰ অধিকাংশই তুৰ্কী, কছোভাৰ বুলি প্ৰকাশ কৰিছে ছুইচ প্ৰশাসনে।
হিজাব বিৰোধী আন্দোলন চলি থকাৰ সময়তে বোৰ্খাৰ বিৰুদ্ধেও সৰৱ হোৱা দেখা গৈছে ইৰাণী মহিলাক। সম্প্ৰতি ইৰাণৰ হিজাব বিৰোধী সমৰ্থনেৰে বিবস্ত্ৰা হৈ প্ৰতিবাদ সাব্যস্ত কৰিছে ইৰানী মডেল তথা অভিনেত্ৰী এলনাজ নৰোজীয়ে। নিজৰ ইনষ্টাগ্ৰাম প্ৰফাইলত বিশেষ ভিডিঅ’টো পষ্ট কৰিছে মডেলগৰাকীয়ে। পষ্টৰ কেপচনত মডেলগৰাকীয়ে লিখিছে, ‘কোনে কি পিন্ধে সেয়া একান্তই ব্যক্তিগত বিষয়। কোনেও কাৰো ওপৰত পোছাক বিধি জাপি দিয়াৰ অধিকাৰ নাই।’ আনহাতে এই হিজাব বিৰোধী আন্দোলনতে ২২ বছৰীয়া এগৰাকী ইৰানী যুৱতীৰ মৃত্যু হৈছে। যুৱতীগৰাকীৰ মৃত্যুৰ পিছৰে পৰাই হিজাব বিতৰ্কত উত্তপ্ত হৈ আছে মধ্য প্ৰাচ্যৰ একমাত্ৰ চিয়া সম্প্ৰদায়প্ৰধান দেশ ইৰাণ। এই আন্দোলনত বৰ্তমানলৈ ৯০-ৰো অধিক লোকে সাবটি লৈছে মৃত্যুক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
