‘সমকামিতা অপৰাধ নহ’লেও ভাৰতীয় পাৰিবাৰিক সংস্কৃতিৰ সৈতে সামঞ্জস্যপূৰ্ণ নহয়’ কেন্দ্ৰৰ এই আপত্তিৰ উত্তৰ ১৮ এপ্ৰিলত দিব উচ্চতম ন্যায়ালয়ৰ ৫জনীয়া বিচাৰপীঠে

অসম লাইভ২৪ঃ দেশৰ সমলিংগৰ বিবাহে আইনি বৈধতা লাভ কৰিবনে? বিষয়টোক লৈ উচ্চতম ন্যায়ালয়ৰ ৫ জনীয়া বিচাৰপীঠে আৰম্ভ কৰিছে বিচাৰপ্ৰক্ৰিয়া৷ ১৮ এপ্ৰিলত ৫ জনীয়া বিচাৰপীঠে এই গোচৰৰ শুনানি প্ৰদান কৰিব৷ সোমবাবে এই গোচৰক আদালতে ‘মৌলিক গুৰুত্ব’ থকা বিষয় বুলি উল্লেখো কৰিছে৷ ভাৰতত সমলিংগৰ বিবাহক আইনী স্বীকৃতি দিয়াৰ বাবে উচ্চতম ন্যায়ালয়ত একাধিক আবেদনো প্ৰেৰণ কৰিছে একাধিক লোকে৷ বিষয়টোক লৈ কেন্দ্ৰীয় চৰকাৰৰো মতামত বিচাৰিছে আদালতে৷

সম্প্ৰতি কেন্দ্ৰৰ তৰফৰ পৰা জনোৱা অনুসৰি সমলিংগৰ বিবাহত কেন্দ্ৰৰ আপত্তি আছে৷ তাৰপাছতেই এই বিষয়টো উচ্চতম ন্যায়ালয়ৰ প্ৰধান বিচাৰপতি ডিওয়াই চন্দ্ৰচূড়ৰ নেতৃত্বাধীন ৫ জনীয়া বিচাৰপীঠ পাইছিলগৈ৷ আদালতে জনোৱা অনুসৰি এই বিষয়টোক লৈ সিদ্ধান্ত গ্ৰহন কৰিলেই সমাজত এক ব্যাপক পৰিবৰ্তন আহিব৷ সমকামিতাক লৈ পূৰ্বেও যুগান্তকাৰী ৰায় দিছিল আদালতে৷ ২০১৮ চনত আদালতে দিয়া বিশেষ ৰায়, ‘সমকামিতা অপৰাধ নহয়’ এই বিষয়টোৱে সমাজলৈ বৃহৎ এক পৰিবৰ্তনো আনিছে৷ এলজিবিটিকিউ সম্প্ৰদায়ৰ দীৰ্ঘদিনীয়া দাবী পূৰণ হৈছিল এই ৰায়ৰ পিছতেই৷ এই ৰায়ৰ পাছতেই সমকামীসকলে নিজকে স্বাধীন অনুভৱো কৰিবলৈ আৰম্ভ কৰিছে৷ সমাজৰ পৰা বহু ভ্ৰান্ত ধাৰণাও দূৰ কৰিছিল এই ৰায়ে৷

উল্লেখ্য যে উচ্চতম ন্যায়ালয়ৰ ‘সমকামিতা অপৰাধ নহয়’ এই ৰায়ৰ পাছতেই বহুকেইখন সমলিংগৰ বিয়া সম্পন্নও হৈছে৷ দেশত অনুষ্ঠিত বহুকেইখন সমলিংগৰ বিবাহৰ খবৰে সংবাদ শিৰোনামো দখল কৰিছিল৷ যদিও কেন্দ্ৰৰ তৰফৰ পৰা এই বিষয়টোক লৈ আপত্তি আছে৷ কেন্দ্ৰই জনোৱা অনুসৰি এইধৰণৰ বিবাহ ভাৰতীয় পাৰিবাৰিক সংস্কৃতিৰ সৈতে সামঞ্জস্যপূৰ্ণ নহয়৷ সেয়ে এই বিষয়টোত কেন্দ্ৰৰ বিৰোধ আছে৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ