১৯৯২ চনৰ কুখ্যাত অজমেৰ ধৰ্ষণ আৰু ধমকিৰ গোচৰৰ বাকী ৬ অভিযুক্তক যাৱজ্জীৱন কাৰাদণ্ডৰ শাস্তি বিহিলে পকচো আদালতে৷ দোষীৰ প্ৰত্যেককে পাঁচ লাখ টকা জৰিমনাও বিহা হৈছে৷ ৬আছামীৰ পৰা সংগৃহীত ৩০লাখ টকা নিৰ্যাতিতাসকলৰ মাজত সমানে ভগাই দিয়াৰো নিৰ্দেশ দিছে পকছো আদালতৰ বিচাৰক ৰঞ্জন সিংহই৷
ৰায়ৰ অনুলিপি পোৱাৰ ৩০ দিনৰ ভিতৰত জিলা আইনী সহায়তা কৰ্তৃপক্ষক ক্ষতিপূৰণ হিচাপে নিৰ্যাতিতাসকলৰ প্ৰত্যেকৰ বেংক একাউণ্টত ৭লাখ টকা জমা দিয়াৰ নিৰ্দেশো দিছে পকছো আদালতে৷ যিসকলৰ বেংক একাউণ্ট নাই তেওঁলোকক বেংক একাউণ্ট খুলি সেই ক্ষতিপূৰণৰ অৰ্থ জমা দিয়াৰ নিৰ্দেশ দিয়া হৈছে৷
বিচাৰক সিংহ ৰায়ে ঘোষণাৰ সময়ত কয়, ‘ক্ষতিপূৰণত ধৰ্ষিতাসকলৰ যন্ত্ৰণা শেষ হয়তো নহ’ব, কিন্তু তেওঁলোকৰ বিষ কিছু কমাব পৰা যাব৷’ মঙলবাৰে শাস্তি পোৱা ৮ ধৰ্ষণকাৰী ক্ৰমে নাফিছ চিস্তি ওৰফে টাৰজান, ইকবাৰ ভাটি, ছেলিম গনি চিস্তি, ছোহেল গণি চিস্তি আৰু ছাইদ জামিৰ হুছেইন৷ বিচাৰ চলি থকাৰ সময়ত ৬টা অভিযুক্তই ৰাজস্থানলৈ পলাই গৈছিল৷ আটাইকেইটাক পলাতক ঘোষণা কৰিছিল আৰক্ষী বিভাগে কিন্তু পাছত আটাইকেইটাই আত্মসমৰ্পণ কৰে৷
অজমেৰ ধৰ্ষণ আৰু ধমকি গোচৰৰ সূত্ৰপাত ১৯৯২ চনত৷ অৰ্থাৎ ৩২ বছৰ পূৰ্বে৷ ৰাজস্থানৰ অজমেৰ স্কুলছাত্ৰীসকলক ব্লেকমেইল কৰি দিনৰ পাছত দিন গণধৰ্ষণ চলাইছিল৷ মুখ বন্ধ কৰি অশালীন ছবি তুলি ব্লেকমেইল কৰা হৈছিল৷ ৩২ বছৰ পূৰ্বে ঘটা এই ঘটনাত নজৰ দিছিল সমগ্ৰ দেশে৷ ঘটনাত ১০০তকৈয়ো বেছি কিশোৰীক শাৰীৰিক নিৰ্যাতন চলোৱাৰ অভিযোগ উঠিছিল৷
১৯৯২ চনত অজমেৰ চহৰত ধাৰাবাহিকভাৱে গণধৰ্ষণৰ ঘটনা ঘটিছিল৷ তাৰপাছতেই তদন্ত প্ৰক্ৰিয়া আগুৱাই যায়৷ ওলাবলৈ ধৰে এটাৰ পাছত আনটো তথ্য৷ প্ৰকৃততে কি ঘটিছিল সেই স্থানত৷
ফাৰুখ চিস্তি আৰু নাফিছ চিস্তি এই দুই যুৱকে সেই সময়ত অজমেৰৰ ত্ৰাসৰ কাৰণ হৈ উঠিছিল৷ চহৰৰ কুখ্যাত মস্তান আছিল দুয়ো৷ প্ৰভাৱ-প্ৰতিপত্তি কম নাছিল৷ ইয়াৰোপৰি দুয়ো যুক্ত আছিল ৰাজনীতিৰ সৈতেও৷ যুৱ কংগ্ৰেছৰ নেতা আছিল ফাৰুখ আৰু নাফিছ৷ এলেকাত দুয়োৰে এটা গেং আছিল৷ অজমেৰত ধাৰাবাহিকভাৱে গণধৰ্ষণৰ ঘটনা চলাত ফাৰুখ আৰু নাফিচেই আছিল মূল অভিযুক্ত৷ ১৯৯২ চনৰ ২১ এপ্ৰিল৷ স্থানীয় সংবাদপত্ৰৰ প্ৰথম পৃষ্ঠাত সেই বাতৰি দেখি শিহৰিত হৈছিল সকলো৷
এলেকাৰ গুণ্ডাসকলৰ হাতত নিৰ্যাতিত হৈছিল স্কুলীয়া ছাত্ৰীসকল৷ এই খবৰ প্ৰকাশ হৈছিল বিশেষ সংবাদপত্ৰত৷ খবৰৰ ওপৰিও কিছু আপত্তিকৰ ছবিও প্ৰকাশ কৰা হৈছিল৷ এই সকলো দেখি হৈ চৈ লাগে সমগ্ৰ চহৰত৷ সংবাদপত্ৰত এই খবৰ দেখি আচৰিত হৈ পৰে আৰক্ষী প্ৰশাসনৰ লোক৷ আৰম্ভ হয় তদন্ত৷ তদন্তত প্ৰকাশ পাই যে অজমেৰৰ কিশোৰীয়ে পঢ়া স্কুলৰ ছাত্ৰসকলৰ সৈতে পোনতে বন্ধুত্ব গঢ়ে ফাৰুখে৷ তাৰপাছতেই প্ৰলোভন দি তেওঁলোকক নিৰ্জনত লগ কৰিবলৈ মাতি ধৰ্ষণ কৰে৷ ধৰ্ষণৰ সময়ত ছবিও তুলি ৰখা হয় ব্লেকমেইল কৰাৰ উদ্দেশ্যে৷ তাৰপাছতেই আপত্তিকৰ ছবি দেখুৱাই ব্লেকমেইল কৰি আকৌ ধৰ্ষণ কৰা হয় নিৰ্যাতিতা ছাত্ৰীক৷
নিৰ্যাতিতাক কোৱা হয় যাতে তেওঁৰ বান্ধৱীসকলকো ফাৰুখ আৰু নাফিছৰ কাষলৈ পঠিয়াই৷ আৰু নপঠিয়ালে নিৰ্যাতিতাৰ আপত্তিকৰ ছবি ভাইৰেল কৰাৰ ধমকি দিয়া হয়৷ এনেকৈয়ে বিভিন্ন স্কুলৰ একাধিক ছাত্ৰীক গণধৰ্ষণ কৰিছিল ফাৰুখ আৰু নাফিছে৷ লগত আছিল দুয়োৰে একাধিক বন্ধু৷ সেই সময়ত বিশেষ এলেকাত ফাৰুখ আৰু নাফিছৰ যথেষ্ট প্ৰভাৱ আছিল৷
ৰাজনৈতিক প্ৰতাপ প্ৰতিপত্তিৰ ভৰত সেই এলেকাত ৰাজত্ব চলাইছিল দুয়োৱে৷ ফাৰুখ আৰু নাফিছৰ নেতৃত্বাধীন গেঙৰ বহুতেই অজমেৰ শ্বৰিফ দৰগাৰ খাদিম পৰিয়ালৰ সদস্য আছিল৷ অভিযোগ অনুসৰি সেয়ে নিৰ্যাতিতা আৰু তেওঁলোকৰ পৰিয়ালে সকলো জানিও কোনো ধৰণে বিষয়টোক লৈ আৰক্ষীৰ কাষ চপা নাছিল৷ ধৰ্ষণৰ বলি হোৱা বেছিভাগেই আছিল নিম্ন মধ্যবিত্তৰ ঘৰৰ সন্তান৷
এই ঘটনাৰ পাছত বহু নিৰ্যাতিতাৰ পৰিয়ালে অজমেৰ এৰে৷ কোনোৱে প্ৰকাশ্যে সৰৱ নহয় এই ঘটনাক লৈ৷ বহু দিন পৰ্যন্ত মুকলি আকাশৰ তলতেই থাকে ধৰ্ষণকাৰী৷ সংবাদপত্ৰৰ প্ৰতিবেদনৰ পাছতহে অপৰাধৰ ঘটনা চৰ্চালৈ আহে৷ তদন্তত নামি আৰক্ষীয়ে গ্ৰেপ্তাৰ কৰে অভিযুক্তকেইটাক৷ তেতিয়াও কিন্তু নিৰ্যাতিতাসকলে মুখ খোলা নাছিল৷ বাতৰি প্ৰচাৰ হোৱাৰ পাছত অপৰাধীয়ে নিৰ্যাতিতাৰ ছবি চহৰত ভাইৰেল কৰাত লাগে৷ ছবি ভাইৰেল হোৱাৰ পাছত কেইবাগৰাকীয়েও আত্মহত্যা কৰে৷
এই ঘটনাৰ মুঠ ৬খন চাৰ্জশ্বিট জমা দিছিল আৰক্ষীয়ে৷ তাত নাম আছিল ১৮ অভিযুক্তৰ৷ ১৪৫জনতকৈ বেছি সাক্ষীৰ নাম আছিল৷ মাত্ৰ ১৭গৰাকী নিৰ্যাতিতাৰহে কথা ৰেকৰ্ড কৰিব পাৰিছিল আৰক্ষীয়ে৷ ১৯৯৮ চনৰ অজমেৰৰ এখন আদালতে আঁঠ জন অভিযুক্তক দোষী সাব্যস্ত কৰি যাৱজ্জীৱন কাৰাদণ্ডৰ ঘোষণা কৰে৷ কিন্তু ৰাজস্থান আদালতে তাৰ মাজতে ৪ অপৰাধীক মুক্ত কৰি দিয়ে৷ ২০০৩ চনত অন্য চাৰিটা অপৰাধী ক্ৰমে মইজুল্লাহ, ইছৰাত আলি, আনোৱাৰ চিস্তি আৰু ছামছুদ্দিনৰ শাস্তিৰ ম্যাদ কমাই ১০ বছৰ কৰে৷ ২০০৭ চনত ফাৰুখক যাৱজ্জীৱন কাৰাদণ্ডৰ নিৰ্দেশ দিয়া হৈছিল৷ কিন্তু ২০১৩ ত ফাৰুখক মুক্তিৰ নিৰ্দেশ দিয়ে ৰাজস্থান হাইকৰ্টে৷
বৰ্তমান অজমেৰৰ বহাল তবিয়তত দিন কটাইছে এসময়ৰ ধৰ্ষণকাৰী ফাৰুখে৷ ফাৰুখ গ্ৰেপ্তাৰ হ’লেও পলাতক আছিল নাফিছ৷ ২০০৩ চনত দিল্লী আৰক্ষীৰ হাতত নাফিছ ধৰা পৰে৷ ধৰা পৰাৰ পাছত অৱশ্যে জামিনো পায়৷ মঙলবাৰে বাকী থকা ৫অভিযুক্তক যাৱজ্জীৱন কাৰাদণ্ডৰ শাস্তি ঘোষণা কৰিছে ৰাজস্থানৰ এখন পকছো আদালতে৷ তদন্তকাৰীৰ অনুমান, অজমেৰকাণ্ডত ১০০গৰাকীতকৈ বেছি কিশোৰী নিৰ্যাতনৰ বলি হৈছিল৷ তেওঁলোকৰ মাজৰ অধিকাংশই মুখ নুখুলিলে৷ এতিয়াও ৩২ বছৰ পূৰ্বে ঘটা এই ঘটনাৰ ক্ষত কেঁচা হৈয়েই আছে অজমেৰত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
