বৃহৎ ঘোষণা কেন্দ্ৰীয় চৰকাৰৰ৷ কেন্দ্ৰীয় চৰকাৰী কৰ্মচাৰীসকলৰ বাবে ঘোষণা কৰা হৈছে নতুন পেঞ্চন স্কিমৰ৷ শনিবাৰে কেন্দ্ৰীয় চৰকাৰৰ তৰফৰ পৰা ইউনিফায়েড পেঞ্চন স্কিম বা UPSৰ ঘোষণা কৰা হৈছে৷ এই প্ৰকল্প ঘোষণাৰ পাছতেই সুখীও হৈছে কেন্দ্ৰীয় চৰকাৰৰ কৰ্মচাৰীসকল৷ কিন্তু ইয়াৰ মাজতে আছে সংশয়ো৷ ইয়াৰ পূৰ্বে চলি থকা পেঞ্চন স্কিম NPS আৰু বৰ্তমান মোদী কেবিনেটে অনা UPSৰ মাজত কি কি পাৰ্থক্য আছে?
প্ৰথমেই ইউনিফায়েড পেঞ্চন স্কিম বা UPS কি? কেন্দ্ৰৰ ঘোষণাত জনোৱা হৈছে যে এই স্কিমত সকলো কেন্দ্ৰীয় চৰকাৰৰ কৰ্মীৰ অৱসৰৰ এবছৰ পূৰ্বে যি মাহেকীয়া দৰমহা আছিল তাৰ ৫০শতাংশ নিশ্চিতভাৱে পেঞ্চনত পাব৷ এইক্ষেত্ৰত কৰ্মীৰ যিসকলে ২৫ বছৰ ধৰি কাম কৰিছে তেওঁলোকেহে এই সুবিধা পাব৷ ইয়াৰোপৰি যিসকলে ১০ বছৰ কাম কৰি অৱসৰ লৈছে তেওঁলোকে ১০ হাজাৰ টকাকৈ পেঞ্চন লাভ কৰিব৷
কেন্দ্ৰৰ তৰফৰ পৰা জনোৱা হৈছে যে এই প্ৰকল্পৰ লক্ষ্য হৈছে তিনিটা, নিশ্চিত পেঞ্চন, পাৰিবাৰিক পেঞ্চন আৰু নূন্যতম পেঞ্চন নিশ্চিত কৰা৷ কেন্দ্ৰীয় চৰকাৰী কৰ্মীসকলৰ ওচৰত আৰু এটা সুযোগ আছে৷ তেওঁলোকে NPS বা UPS কোনোবা এটা বাছনি কৰি ল’ব পাৰিব৷ অৰ্থাৎ কোনো কেন্দ্ৰীয় চৰকাৰৰ কৰ্মীয়ে বিচাৰিলে NPSৰ অধীনতো পেঞ্চন ল’ব পাৰে৷ আৰু কোনোৱে ইচ্ছা কৰিলে UPS ফাণ্ডলৈ ট্ৰেন্সফাৰ কৰি ল’ব পাৰে৷
NPS আৰু UPSৰ মাজত পাৰ্থক্য কি কি?
নিশ্চিত পেঞ্চন
চৰকাৰৰ নতুন পেঞ্চন প্ৰকল্পত কোৱা হৈছে যে, ২৫ বছৰ চাকৰি কৰিলে তেওঁলোকে শেষ এবছৰৰ কৰ্মজীৱনত যি দৰমহা পাইছিল তাৰ বেছিক দৰমহাৰ ৫০ শতাংশ পেঞ্চন হিচাপে পাব৷
NPSত পেঞ্চনৰ হিচাপ হয় বিনিয়োগৰ হিচাপত৷ NPSত কোনো নিৰ্দিষ্ট পেঞ্চনৰ অংক নাই৷ NPSত বিনিয়োগত কিমান ৰিটাৰ্ণ আহিছে তাৰ ওপৰত ভিত্তি কৰিহে পেঞ্চন হয়৷
নূন্যতম পেঞ্চন
ইউনিফায়েড পেঞ্চন স্কিমত নৃ্ন্যতম পেঞ্চন নিশ্চিত কৰা হৈছে৷ চৰকাৰৰ তৰফৰ পৰা জনোৱা হৈছে যে নূন্যতম ১০ বছৰ চাকৰি কৰিলে মাহত ১০হাজাৰ টকাকৈ পেঞ্চন লাভ কৰিব৷ NPSত কোনো নূন্যতম পেঞ্চনৰ গেৰেণ্টি নাই৷
টকা তোলাৰ পদ্ধতি
UPSত মাহেকীয়া পেঞ্চন নিশ্চিত কৰা হৈছে৷ NPSত টকা উঠাই লোৱাৰ একাধিক অপশ্ব্যন আছে৷ NPSত একাউণ্টত জমা অৰ্থৰ এটা মোটা অংক উঠাই ল’ব পাৰে৷ বাকী অৰ্থ মাহেকীয়া পেঞ্চন হিচাপে পোৱা যায়৷
এন পি এছত দুটা টায়াৰ আছে৷ টায়াৰ-১ ত কেৱলমাত্ৰ অৱসৰৰ পাছতেই ধন উঠাই ল’ব পাৰে আৰু টায়াৰ-২ত অৱসৰৰ পূৰ্বেও আপুনি ধন উঠাই ল’ব পাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
