টনে টনে সোণ গোটাইছে ভাৰতে! হঠাৎ কিয় সোণৰ ভাণ্ডাৰ বঢ়াইছে ৰিজাৰ্ভ বেংকে? নেপথ্যত ব্ৰিকছ মুদ্ৰা নে ডি-ডলাৰাইজেছন?

জানুৱাৰীত দ্বিতীয়বাৰৰ বাবে আমেৰিকাৰ প্ৰেছিডেণ্ট হিচাপে শপত ল’ব ড’নাল্ড ট্ৰাম্পে৷ আনুষ্ঠানিকভাৱে আসন দখল কৰাৰ পূৰ্বেই ব্ৰিকছ দেশসমূহৰ বিৰুদ্ধে সুৰ সলাইছে নৱনিৰ্বাচিত প্ৰেছিডেণ্টে৷ ট্ৰাম্পে, বৈদেশিক বাণিজ্যৰ ক্ষেত্ৰত ব্ৰিকছ ৰাষ্ট্ৰসমূহৰ ওপৰত ১০০ শতাংশ আমদানি শুল্ক চপাব পাৰে৷

ডলাৰৰ প্ৰতিপত্তি কমাবলৈ নতুন মুদ্ৰা অনাৰ পৰিকল্পনা আছে ভাৰতৰ৷ ৰাছিয়া, চীন আৰু ব্ৰাজিলৰ দৰে ব্ৰিকছ দেশসমূহৰ৷ এই খবৰ লাভ কৰিছে ট্ৰাম্পেও৷ ইয়াৰ পাছতেই ব্ৰিকছ দেশসমূহক শিক্ষা দিবলৈ ভাতে মৰাৰ কৌশলো লৈছে যুক্তৰাষ্ট্ৰৰ দণ্ডমুণ্ডৰ ভাৱী কৰ্তা ডনাল্ড ট্ৰাম্পে৷

ট্ৰাম্পৰ এই শুল্ক যুদ্ধ ঘোষণাৰ কেইদিনমান পাছতেই ডলাৰক লৈ বিবৃত্তি দিছে ৰিজাৰ্ভ বেংকৰ সদ্য বিদায়ী গভৰ্নৰ শক্তিকান্ত দাসে৷ ৬ ডিচেম্বৰত তেওঁ জনাইছে যে এতিয়াই ডলাৰৰ প্ৰতিপত্তি কমোৱাৰ পথত ভাৰত আগবঢ়া নাই৷ ডি ডলাৰাইজেছন সম্পৰ্কে কেন্দ্ৰীয় বেংক উদ্বিগ্ন হ’লেও এতিয়াই এই বিষয়ে চৰম সিদ্ধান্ত ল’বলৈ নাৰাজ দেশৰ শীৰ্ষ বেংক৷ ডি ডলাৰাইজেছনক লৈ মতামত দিবলৈ গৈ তেওঁ জনাইছিল, ‘কেৱলমাত্ৰ ডলাৰ নিৰ্ভৰ বাণিজ্যই ভৱিষ্যতে ভাৰতৰ বাবে সমস্যা তৈয়াৰ কৰিব পাৰে৷’

ট্ৰাম্প জিকাৰ পাছত ডলাৰ যথেষ্ট শক্তিশালী হৈছে৷ ডলাৰৰ নিৰিখত টকাৰ দাম প্ৰায় ৮৫টকা হৈছেগৈ৷ ফলত ভাৰত আৰু জাপানৰ দৰে দেশসমূহৰ পৰা বিনিয়োগ আঁতৰাইছে বিনিয়োগকাৰীসকলে৷ ইয়াৰ বাবে সংশ্লিষ্ট দেশসমূহৰ শ্বেয়াৰৰ সূচকৰ বৃহৎ পতন লক্ষ কৰা গৈছে৷