ৰাছিয়াৰ পৰা অহা চোৰাংচোৱা তথ্যই ভাৰতত চলি থকা এটা বৃহৎ আন্তঃৰাষ্ট্ৰীয় নেটৱৰ্ক উন্মোচন কৰি দিছে৷ নেশ্যনেল ইনভেষ্টিগেশ্যন এজেন্সিয়ে (এন আই এ) আমেৰিকাৰ নাগৰিক মেথিউ এৰন ভ্যানডাইক আৰু ছয়জন ইউক্ৰেইনৰ নাগৰিকক গ্ৰেপ্তাৰ কৰে। এই গ্ৰেপ্তাৰৰ পাছতেই নিৰাপত্তা সংস্থাসমূহ পুনৰ অধিক সতৰ্ক হৈছে। এই গোচৰ কেৱল অবৈধ অনুপ্ৰৱেশৰ মাজতে সীমাবদ্ধ নহয়, ইয়াৰোপৰি ড্ৰ’ন প্ৰযুক্তি, প্ৰশিক্ষণ, আৰু ম্যানমাৰৰ উগ্ৰপন্থী সংগঠনৰ সৈতে জড়িত থকা বুলিও অভিযোগ উত্থাপন হৈছে।
তদন্তত প্ৰকাশ পাইছে যে এই নেটৱৰ্ক দীৰ্ঘদিন ধৰি সক্ৰিয় হৈ আছিল আৰু ভাৰতৰ উত্তৰ-পূবৰ ৰাজ্যসমূহক৷ উত্তৰ পূবৰ মিজোৰাম, মণিপুৰকে আদ কৰি বিভিন্ন স্থানলৈ পৰিভ্ৰমণো কৰিছে এই ৬নাগৰিকে৷ উত্তৰ পূৱক ট্ৰেনজিট পথ হিচাপে ব্যৱহাৰ কৰি আছিল বুলিও অভিযোগ উত্থাপিত হৈছে৷ খবৰ অনুসৰি আটাইকেইজন অভিযুক্তই বিভিন্ন সময়ত পৰ্যটন ভিছাত ভাৰতত প্ৰৱেশ কৰি তাৰ পিছত গুৱাহাটী হৈ মিজোৰামলৈ গৈছিল, য’ৰ পৰা প্ৰয়োজনীয় অনুমতি অবিহনে ম্যানমাৰত প্ৰৱেশ কৰিছিল। এই সমগ্ৰ ষড়যন্ত্ৰৰ বিষয়ে ৰাছিয়াই অৱগত হৈ লগে লগে এই চোৰাংচোৱা তথ্য ভাৰতীয় চোৰাংচোৱাক দিয়ে৷ তাৰপিছতেই উন্মোচিত হৈছে সমগ্ৰ বিষয়৷
NIAৰ মতে তেওঁলোকৰ লক্ষ্য আছিল তাত চলি থকা জনগোষ্ঠীয় সশস্ত্ৰ সংগঠনক আধুনিক যুদ্ধ কৌশল শিকোৱা। তাৎপৰ্যপূৰ্ণভাৱে এই সমগ্ৰ অভিযানৰ সূত্ৰ আহিছিল ৰাছিয়াই দিয়া তথ্যৰ পৰা। ইয়াৰ পিছতে ভাৰতীয় সংস্থাসমূহে তিনিমাহজোৰা অভিযান চলাই দিল্লী, লক্ষ্ণৌ, আৰু কলকাতা বিমানবন্দৰত অভিযুক্ত কেইটাক আটক কৰে।
মেথিউ এৰন ভেনডাইক কোন আৰু সমগ্ৰ বিষয় কি?
- এনডিটিভিৰ মতে, মেথিউ এৰন ভ্যানডাইকে নিজকে এজন নিৰাপত্তা বিশ্লেষক, যুদ্ধ সংবাদদাতা আৰু তথ্যচিত্ৰ নিৰ্মাতা বুলি বৰ্ণনা কৰিছে। ২০১১ চনৰ লিবিয়াৰ গৃহযুদ্ধৰ সময়ত তেওঁ প্ৰথমবাৰৰ বাবে বিদ্ৰোহী যোদ্ধাৰ সৈতে যুঁজি পদকো লাভ কৰিছিল। সেই সময়ছোৱাত তেওঁ কাৰাগাৰতো আছিল। বিশ্ববিদ্যালয় সম্পূৰ্ণ কৰাৰ পিছত তেওঁ উত্তৰ আফ্ৰিকা আৰু মধ্যপ্ৰাচ্যৰ মাজেৰে দীঘলীয়া মটৰ চাইকেল ভ্ৰমণত নামি পৰে৷ য’ত তেওঁৰ স্থানীয় লোকৰ সৈতে গভীৰ সম্পৰ্ক গঢ়ি তোলে। লিবিয়া বিপ্লৱৰো তেওঁ অংশীদাৰ আছিল৷
- লিবিয়াত পোৱা অভিজ্ঞতাৰ পিছতে ভ্যানডাইকে “ছন্স অৱ লিবাৰ্টি ইণ্টাৰনেশ্যনেল” নামৰ সংগঠনটো প্ৰতিষ্ঠা কৰে মেথিউ এৰন ভেনডাইকে৷ যিয়ে বিশ্বৰ বিভিন্ন সংঘাতপূৰ্ণ অঞ্চলত স্থানীয় সশস্ত্ৰ গোটক প্ৰশিক্ষণ দি আহিছে। তদন্তকাৰী সংস্থাসমূহৰ মতে, তেওঁ গেৰিলা যুদ্ধ, ড্ৰ’ন অপাৰেচন, জেমিং কৌশল, আধুনিক যুদ্ধ কৌশল আদিৰ প্ৰশিক্ষণ দি আহিছে। তেওঁৰ ছ’চিয়েল মিডিয়া আৰু ডিভাইচৰ তথ্যই ইংগিত দিয়ে যে তেওঁ কেইবাটাও আন্তঃৰাষ্ট্ৰীয় সংঘাতৰ সৈতে জড়িত হৈ আছে আৰু নিজকে এজন ফ্লিলেন্স সামৰিক প্ৰশিক্ষক বুলি গণ্য কৰে।
- NIAৰ তদন্তত এই কথাও প্ৰকাশ পাইছে যে, ভেনডাইক আৰু তেওঁৰ সহযোগীসকলে কেইবাবাৰো ম্যানমাৰ ভ্ৰমণ কৰিছে আৰু তাত থকা গোটসমূহক প্ৰশিক্ষণ প্ৰদান কৰিছে৷ সংস্থাটোৱে দাবী কৰিছে যে তেওঁলোকে ইউৰোপৰ পৰা ম্যানমাৰলৈ ড্ৰ’ন আৰু অন্যান্য সঁজুলি পৰিবহণতো জড়িত আছিল।ভাৰতৰ উত্তৰ-পূব অঞ্চলকে এই অভিযানৰ এটা মূল কৰিড’ৰ হিচাপে লৈছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
