শেহতীয়াকৈ বলীউডৰ তাৰকা বৰুণ ধাৱানে তেওঁৰ কন্যা লাৰাৰ শাৰীৰিক অৱস্থাৰ বিষয়ে মুকলিকৈ কয়। অভিনেতাগৰাকীয়ে প্ৰকাশ কৰে যে লাৰা ‘ডেভেলপমেণ্টেল ডিছপ্লেছিয়া অৱ দ্য হিপ’ (ডিডিএইচ) নামৰ সমস্যাত ভুগি আছিল, যাৰ ফলত তেওঁৰ স্বাভাৱিকভাৱে খোজ কঢ়াৰ ক্ষমতাত প্ৰভাৱ পৰে।
বৰুণে কয় যে, এই সমস্যাৰ বাবে লাৰাৰ দুয়োখন ভৰিৰ ভাৰসাম্য ঠিক নাছিল, যাৰ বাবে খোজ কঢ়া বা দৌৰিবলৈ বহুত কষ্ট পাইছিল। ডাক্তৰৰ পৰামৰ্শ মতে লাৰাক বিশেষ চিকিৎসা কৰিব লগা হ’ল। প্ৰায় ডেৰ-দুমাহ ধৰি তেওঁক ‘স্পিকা কাষ্ট’ (এবিধ বিশেষ প্লাষ্টাৰ) দিব লগা হৈছিল।
অৱশ্যে ভাল খবৰটো হ’ল লাৰাৰ কোনো ডাঙৰ অস্ত্ৰোপচাৰ কৰিবলগীয়া নহ’ল। চিকিৎসকে বিশেষ পদ্ধতিৰে এই ভাৰসাম্যহীনতা ঠিক কৰিবলৈ সক্ষম হৈছিল। বৰ্তমান লাৰাৰ প্লাষ্টাৰ আঁতৰাই লাহে লাহে সুস্থ হৈ উঠিছে। বৰুণে উল্লেখ কৰে যে বহু দেশত এই ৰোগ জন্মৰ লগে লগে ধৰা পৰে, কিন্তু ভাৰতত সজাগতা আৰু আগতীয়া নিদান অতি গুৰুত্বপূৰ্ণ।
বৰুণে স্পষ্টকৈ কৈছে যে, তেওঁ লাৰাৰ প্ৰতি কাৰো পৰা ‘সহানুভূতি’ বিচৰা নাই। বৰঞ্চ তেওঁ বিচাৰে আন অভিভাৱকসকল সচেতন হওক। যদি তেওঁলোকে সন্তানৰ খোজ কঢ়া বা শৰীৰৰ গতিবিধিৰ সামান্যতম অস্বাভাৱিকতা লক্ষ্য কৰে তেন্তে পলম নকৰাকৈ বিশেষজ্ঞৰ পৰামৰ্শ ল’ব লাগে। এই অভিজ্ঞতাৰ পৰা শিকি তেওঁ ভৱিষ্যতেও এখন কিতাপ লিখাৰ পৰিকল্পনা কৰিছে, যাতে আন পৰিয়ালবোৰে এই ৰোগৰ সঠিক ধাৰণা লাভ কৰিব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
