মঙলবাৰে ভাৰতীয় জনতা পাৰ্টিয়ে ২০২৬ চনৰ বিধানসভা নিৰ্বাচনৰ বাবে “সংকল্প পত্ৰ” মুকলি কৰে। এই পত্ৰ মুকলিৰ পিছতে বিত্তমন্ত্ৰী নিৰ্মলা সীতাৰমণে কয়, অসমত শান্তি আৰু উন্নয়ন পুনৰুদ্ধাৰ কৰাটো সুস্থিৰতাৰে সম্ভৱ। তেওঁ লগতে কয় যে এই সংকল্পত অসমৰ এটা দশকৰ পৰিৱৰ্তনৰ ওপৰত ভিত্তি কৰি প্ৰস্তুত কৰা হৈছে, যিটো কাম কংগ্ৰেছ দলে ৬০ বছৰতো কৰিব নোৱাৰিলে।
বিজেপিৰ “সংকল্প পত্ৰ” মুকলি কৰি কেন্দ্ৰীয় মন্ত্ৰী সীতাৰমণে কয় যে, “এই পত্ৰখন এক দশকৰ কৃতিত্বৰ ওপৰত নিৰ্মাণ কৰা হৈছে। মই এনে এখন ৰাজ্য দেখিছো যিখন এনেদৰে ৰূপান্তৰিত হৈছে যিটো কংগ্ৰেছৰ শাসনকালত কেতিয়াও সম্ভৱ নহ’লহেঁতেন।”
কেন্দ্ৰীয় বিত্তমন্ত্ৰী সীতাৰমণৰ লগতে সৰ্বানন্দ সোণোৱাল, মুখ্যমন্ত্ৰী হিমন্ত বিশ্ব শৰ্মা, ৰাজ্যিক দলৰ সভাপতি দিলীপ শইকীয়াকে আদি কৰি “সংকল্প পত্ৰ” মুক্তিৰ অনুষ্ঠানত উপস্থিত থাকে।
সীতাৰমনে কয় যে উত্তৰ-পূব অঞ্চলৰ দীৰ্ঘম্যাদী উন্নয়নত কংগ্ৰেছ দলৰ কোনো গুৰুত্ব নাছিল। অসমত শান্তি আৰু উন্নয়ন পুনৰুদ্ধাৰ কৰাটো সুস্থিৰতাৰেহে সম্ভৱ। বিজেপিৰ শাসন কালত ৰাজ্যত সুযোগ বহু পৰিমাণে বৃদ্ধি পাইছে, যাৰ ফলত অসমৰ যুৱক-যুৱতী এতিয়া ৰাজ্যলৈ ঘূৰি আহিছে।
কংগ্ৰেছক লক্ষ্য কৰি বিত্তমন্ত্ৰীয়ে কয় যে কংগ্ৰেছৰ নীতিৰ বাবে AFSPA অসমত ৩২ বছৰ ধৰি থাকিল।
‘সংকল্প পত্ৰ’ সন্দৰ্ভত কেন্দ্ৰীয় মন্ত্ৰী সোণোৱালে কয়, “সংকল্প পত্ৰ’ প্ৰস্তুত কৰাৰ আঁৰৰ পটভূমি হ’ল আমি অসমৰ সকলো প্ৰান্তৰ লোকৰ কাষ চাপিছিলো।
আমি ঘৰে ঘৰে গৈ পৰৱৰ্তী কাৰ্যকালত কি কৰিব লাগে সেই সম্পৰ্কে মানুহৰ পৰামৰ্শ সংগ্ৰহ কৰিছিলো। এই নথিখনৰ আধাৰত অৰ্থাৎ অসমৰ জনসাধাৰণৰ পৰামৰ্শৰ ভিত্তিত আমি তৃতীয় কাৰ্যকালত কাম কৰিম।”
তেওঁ কয় যে তিনি লাখৰো অধিক লোকে নিজৰ পৰামৰ্শ দিছে।
বাজপেয়ী ভৱনত মুকলি কৰা বিজেপিৰ সংকল্প পত্ৰখনত উল্লেখ আছে বিজেপিৰ ৩১টা সংকল্প। ভাষণ প্ৰদানত এই কথা জনালে বিত্তমন্ত্ৰীগৰাকীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
