পুৱাই আহিছে দুঃখবৰ! অমৰনাথ যাত্ৰাৰ তীৰ্থযাত্ৰী কঢ়িওৱা এখন বাছ দুৰ্ঘটনাগ্ৰস্ত হৈছে। বালতালৰ পৰা শ্ৰীনগৰলৈ ৫০গৰাকী তীৰ্থযাত্ৰী কঢ়িয়াই নিছিল বাছখনে। কিন্তু জম্মু-কাশ্মীৰৰ গণ্ডাৰবল জিলাৰ হৰিগনিৱানত সংঘটিত হৈছে এক ভয়ংকৰ পথ দুৰ্ঘটনা। নিয়ন্ত্ৰণ হেৰুৱাই দ খাৱৈত বাগৰি পৰে বাহনখন। এই দুৰ্ঘটনাত প্ৰায় ৩৯ জন যাত্ৰী আহত হয়। এই দুৰ্ঘটনাটোৱে সমগ্ৰ অঞ্চলটোত ব্যাপক আতংকৰ সৃষ্টি কৰে।
দুৰ্ঘটনাটোৰ তথ্য লাভ কৰাৰ লগে লগে ভাৰতীয় সেনা, কেন্দ্ৰীয় সংৰক্ষিত আৰক্ষী বাহিনী (চি আৰ পি এফ), ভাৰত-তিব্বত সীমান্ত আৰক্ষী (আই টি বি পি), জম্মু-কাশ্মীৰ আৰক্ষী, যাত্ৰা আৰক্ষী, ২ অসম ৰাইফল, আৰু ২১ ৰাষ্ট্ৰীয় ৰাইফল (আৰ আৰ)ৰ দল ঘটনাস্থলীত উপস্থিত হয়। উদ্ধাৰ অভিযানত স্থানীয় বাসিন্দাসকলেও গুৰুত্বপূৰ্ণ ভূমিকা পালন কৰে। সমগ্ৰ দলটোৱে ততাতৈয়াকৈ উদ্ধাৰ অভিযান আৰম্ভ কৰি আহতসকলক নিৰাপদে উলিয়াই আনে।
উদ্ধাৰকাৰী দলে আটাইকেইজন আহত তীৰ্থযাত্ৰীক প্ৰাথমিক চিকিৎসাৰ বাবে কংগন চিকিৎসালয়লৈ লৈ যায়। ততাতৈয়াকৈ আহতসকলৰ চিকিৎসা আৰম্ভ কৰিছে চিকিৎসকৰ এটা দলে। আহতসকলৰ অধিকাংশই বৰ্তমান বিপদমুক্ত যদিও একাংশ তীৰ্থযাত্ৰী গুৰুতৰভাৱে আহত হৈছে। গুৰুতৰভাৱে আহত তীৰ্থযাত্ৰীসকলক প্ৰয়োজন সাপেক্ষে শ্ৰীনগৰৰ এখন বৃহৎ চিকিৎসালয়লৈ প্ৰেৰণ কৰাৰ প্ৰস্তুতিও কৰিছে প্ৰশাসনে।
অৱশ্যে সেনাবাহিনীৰ তৎপৰতাত সুকলমে উদ্ধাৰ গোটেই কেইজন যাত্ৰী। এই সন্দৰ্ভত আৰক্ষী আৰু প্ৰশাসনে তদন্ত অব্যাহত ৰাখিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
