বিশ্বৰ ক’ত ক’ত সাধাৰণ লোকৰ বাবে বিৱাহ বিচ্ছেদ প্ৰায় অসম্ভৱ?

বিৱাহক সাধাৰণতে দুজন মানুহৰ মাজৰ এক পবিত্ৰ আৰু আইনী বন্ধন হিচাপে গণ্য কৰা হয়। কিন্তু কোনো কাৰণত স্বামী-স্ত্ৰীৰ সম্পৰ্কত সমস্যা সৃষ্টি হ’লে বা সম্পৰ্ক ভাঙি যোৱাৰ পৰিস্থিতি আহিলে বহু দেশতে আইনীভাৱে বিৱাহ বিচ্ছেদ লোৱাৰ সুযোগ আছে। আদালতৰ জৰিয়তে বিৱাহৰ অন্ত পেলোৱাৰ এই প্ৰক্ৰিয়াকে সাধাৰণতে ‘ডিভোৰ্চ’ বা বিৱাহ বিচ্ছেদ বুলি কোৱা হয়। কিন্তু আপুনি জানেনে, বিশ্বৰ দুখন দেশত বেছিভাগ বিৱাহৰ ক্ষেত্ৰত সাধাৰণ বিৱাহ বিচ্ছেদৰ আইন নাই? এই দেশ দুখন হৈছে ফিলিপাইনছ আৰু ভেটিকান চিটি। অৱশ্যে ‘এই দেশ দুখনত একেবাৰেই বিৱাহ বিচ্ছেদ নাই’ বুলি কোৱাটো সম্পূৰ্ণ শুদ্ধ নহ’ব। দুয়োখন দেশতে বিৱাহৰ পৰা ওলাই অহাৰ কিছুমান আইনী পথ আছে, কিন্তু সেইবোৰ সাধাৰণ বিৱাহ বিচ্ছেদৰ দৰে সহজ নহয়।

ফিলিপাইনছৰ নিয়ম

ফিলিপাইনছত বেছিভাগ বিৱাহৰ বাবে আন বহু দেশৰ দৰে সাধাৰণ বিৱাহ বিচ্ছেদৰ আইন নাই। কিন্তু ইয়াৰ অৰ্থ এইটো নহয় যে স্বামী-স্ত্ৰীয়ে কোনো কাৰণতে পৃথকে থাকিব নোৱাৰে বা বিৱাহৰ পৰা কোনো ধৰণে মুক্ত হ’ব নোৱাৰে। ফিলিপাইনছৰ পৰিয়াল সংহিতাৰ অধীনত বিৱাহৰ ক্ষেত্ৰত কেইবাটাও আইনী ব্যৱস্থা আছে। ইয়াৰ ভিতৰত আইনী পৃথকীকৰণ, বিৱাহ বাতিল আৰু বিৱাহ অবৈধ ঘোষণা অন্যতম।

স্বামী-স্ত্ৰীৰ মাজত গুৰুতৰ সমস্যা হ’লে আদালতে তেওঁলোকক পৃথকে থকাৰ অনুমতি দিব পাৰে। উদাহৰণস্বৰূপে, শাৰীৰিক হিং*সা, যৌ*ন অবিশ্বাস, পৰিত্যাগ বা কিছুমান গুৰুতৰ অপৰাধৰ ক্ষেত্ৰত আইনী পৃথকীকৰণৰ ব্যৱস্থা থাকিব পাৰে। কিন্তু ইয়াৰ এটা গুৰুত্বপূৰ্ণ কথা আছে—আইনী পৃথকীকৰণ হ’লেও বিৱাহ সম্পৰ্ক শেষ নহয়। অৰ্থাৎ দুয়োজনে পৃথকে থাকিব পাৰে যদিও আইনগতভাৱে তেওঁলোক স্বামী-স্ত্ৰী হৈ থাকে। সেয়ে তেওঁলোকে পুনৰ আন কাৰোবাৰ সৈতে বিৱাহপাশত আৱদ্ধ হব নোৱাৰে। ইয়াৰ উপৰিও আন এটা পথ হৈছে বিৱাহ বাতিল বা অবৈধ ঘোষণা কৰা। এই প্ৰক্ৰিয়াত আদালতে সংশ্লিষ্ট বিৱাহ আৰম্ভণিৰ পৰাই আইনগতভাৱে বৈধ আছিল নে নাই, সেই বিষয়টো পৰীক্ষা কৰে। অৰ্থাৎ কেৱল স্বামী-স্ত্ৰীৰ মাজত সম্পৰ্ক বেয়া হৈ পৰিলেই বিৱাহ বাতিল নহয়। তাৰ পৰিৱৰ্তে বিৱাহৰ সময়ত এনে কোনো আইনগত সমস্যা আছিল নেকি, যাৰ বাবে সংশ্লিষ্ট বিৱাহ আৰম্ভণিৰ পৰাই বৈধ নাছিল, সেইটো প্ৰমাণ কৰিব লাগে। এই ব্যৱস্থাৰ জৰিয়তে কোনো দম্পতীয়ে বৈৱাহিক বন্ধনৰ পৰা মুক্ত হ’ব পাৰে। কিন্তু এই প্ৰক্ৰিয়া সাধাৰণ বিৱাহ বিচ্ছেদৰ দৰে পোনপটীয়া নহয়।

ফিলিপাইনছৰ আইনত আন এটা বিশেষ ব্যৱস্থাও আছে। যদি স্বামী-স্ত্ৰীৰ এজন ফিলিপাইনছৰ নাগৰিক আৰু আনজন বিদেশী হয় আৰু বিদেশী পক্ষই বিদেশৰ আইন অনুসৰি বৈধভাৱে বিৱাহ বিচ্ছেদ লাভ কৰে, তেন্তে নিৰ্দিষ্ট চৰ্ত পূৰণ হ’লে সেই বিৱাহ বিচ্ছেদ ফিলিপাইনছতো স্বীকৃতি লাভ কৰিব পাৰে। এই ক্ষেত্ৰত ফিলিপাইনছৰ নাগৰিক পক্ষই পুনৰ বিৱাহ কৰাৰ আইনগত অধিকাৰ লাভ কৰাৰ সুযোগ থাকে।

ফিলিপাইনছত সকলো লোকৰ বাবে বিৱাহ বিচ্ছেদৰ সাধাৰণ আইন নাথাকিলেও মুছলমান ব্যক্তিগত আইনৰ অধীনত বিৱাহ বিচ্ছেদৰ ব্যৱস্থা আছে। মুছলমান দম্পতীৰ ক্ষেত্ৰত প্ৰযোজ্য বিশেষ আইনত তালাক, খুলা আৰু ফাচখ আদি বিৱাহ বিচ্ছেদৰ ব্যৱস্থা অন্তৰ্ভুক্ত আছে। অৰ্থাৎ ফিলিপাইনছত ‘কোনো ধৰণৰ বিৱাহ বিচ্ছেদ নাই’ বুলি কোৱাটো সম্পূৰ্ণ শুদ্ধ নহয়।

ভেটিকান চিটিৰ নিয়ম

ভেটিকান চিটিৰ ক্ষেত্ৰত পৰিস্থিতি আৰু বেলেগ। ইয়াত কেথলিক গীৰ্জাৰ কেনন আইন প্ৰযোজ্য। কেথলিক ধৰ্মীয় নীতি অনুসৰি বৈধ আৰু সম্পূৰ্ণ হোৱা চেক্ৰেমেণ্টেল বিৱাহক অবিচ্ছেদ্য বুলি গণ্য কৰা হয়। অৰ্থাৎ এনে বিৱাহক সাধাৰণ বিৱাহ বিচ্ছেদৰ জৰিয়তে ভংগ কৰিব নোৱাৰি। কেথলিক মত অনুসৰি এই বৈৱাহিক বন্ধন মৃ*ত্যুৰ বাহিৰে আন কোনো মানৱীয় প্ৰক্ৰিয়াৰে শেষ কৰিব নোৱাৰি। এই কাৰণতেই ভেটিকান চিটিক সাধাৰণতে বিৱাহ বিচ্ছেদ নথকা স্থান হিচাপে উল্লেখ কৰা হয়। কিন্তু ইয়াৰ অৰ্থ এইটো নহয় যে কোনো সমস্যাৰ সৃষ্টি হ’লেও স্বামী-স্ত্ৰীয়ে সকলো সময়তে একেলগে থাকিবই লাগিব। কেনন আইনৰ অধীনত উপযুক্ত কাৰণ থাকিলে স্বামী-স্ত্ৰীয়ে পৃথকে থাকিব পাৰে। কিন্তু এই পৃথকীকৰণে তেওঁলোকৰ বিৱাহৰ বন্ধন শেষ নকৰে। ইয়াৰ উপৰি গীৰ্জাত বিৱাহ বাতিল ঘোষণা কৰাৰ ব্যৱস্থাও আছে। এই প্ৰক্ৰিয়াত সংশ্লিষ্ট বিৱাহ আৰম্ভণিৰ পৰাই গীৰ্জাৰ আইন অনুসৰি বৈধ আছিল নে নাই, সেই বিষয়টো পৰীক্ষা কৰা হয়। যদি প্ৰমাণ হয় যে সংশ্লিষ্ট বিৱাহ আৰম্ভণিৰ পৰাই বৈধ নাছিল, তেন্তে গীৰ্জাই সেই বিৱাহক বাতিল ঘোষণা কৰিব পাৰে। কিন্তু এই প্ৰক্ৰিয়াক সাধাৰণ বিৱাহ বিচ্ছেদ বুলি ক’ব নোৱাৰি।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ