নিশা গুৱাহাটীৰ খানাপাৰাৰ এটা নাইট ক্লাবৰ ভিতৰত এগৰাকী মহিলাক প্ৰহাৰ কৰাৰ অভিযোগ উত্থাপন হৈছে। এই ঘটনাত ক্লাবৰ বাউন্সাৰসকলো জড়িত থকাৰ অভিযোগ। বৃহস্পতিবাৰে সংঘটিত এই ঘটনাৰ কেইবাটাও ভিডিঅ’ ছ’চিয়েল মিডিয়াত ভাইৰেল হৈ পৰিছে। খানাপাৰাৰ লোকেলছ কেফে এণ্ড লাউঞ্জত সংঘটিত হৈছে এই ঘটনা। ক্লাবৰ ভিতৰতে মহিলাগৰাকীক মাটিত পেলাই অৰ্ধ উলংগ কৰি মাৰপিট কৰাৰ অভিযোগ উত্থাপন হৈছে। এই ঘটনাত পুৰুষ আৰু মহিলা উভয় বাউন্সাৰ জড়িত বুলি দাবী কৰা হৈছে।
ছ’চিয়েল মিডিয়াত প্ৰচাৰিত এক ভিডিঅ’ত দেখা গৈছে যে মহিলাগৰাকী মজিয়াত পৰি আছে। ভিডিঅ’টোত দুগৰাকী মহিলাই তেওঁক মৰাও দেখা যায়। ওচৰতে কেইবাজনো পুৰুষকো থিয় হৈ আছিল। আন এটা ভিডিঅ’ত এগৰাকী মহিলাই আঘাতপ্ৰাপ্ত মহিলাগৰাকীক থিয় হ’বলৈ সহায় কৰিবলৈ চেষ্টা কৰা দেখা গৈছে। তেওঁৰ সন্মুখত গাড়ী এখন টানি অহাৰ লগে লগে পৰৱৰ্তী দৃশ্যটো স্পষ্টকৈ দেখা নাযায়।
মহিলাগৰাকীৰ পৰিচয় এতিয়াও জানিব পৰা হোৱা নাই। পিছত ক্লাবৰ চতুৰ্থ মহলাৰ পৰা পাৰ্কিং লটলৈ লৈ যোৱা বুলি জানিব পৰা গৈছে। এই কাজিয়াৰ কাৰণ এতিয়াও স্পষ্ট হোৱা নাই। কিহৰ বাবে এই বিতৰ্কৰ সূচনা হ’ল সেয়া এতিয়াও স্পষ্ট হোৱা নাই। এই ঘটনাৰ পূৰ্বে ক্লাবৰ ভিতৰত সঠিকভাৱে কি হৈছিল সেই সবিশেষ এতিয়াও পোহৰলৈ অহা নাই।
ঘটনাৰ পিছতে আৰক্ষীয়ে গোচৰ ৰুজু কৰিছে। অৱশ্যে ক্লাবৰ কোনো কৰ্তৃপক্ষক সোধা-পোছা কৰা হৈছে নে নাই সেই সন্দৰ্ভত এতিয়ালৈকে কোনো স্পষ্ট তথ্য পোৱা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
