মাত্ৰ ১০০ টকাৰ বাবেই এগৰাকী অৱসৰপ্ৰাপ্ত শিক্ষয়িত্ৰীক হ*ত্যা কৰে এজন যুৱকে। এই চাঞ্চল্যকৰ হ*ত্যাকাণ্ড সংঘটিত হৈছে গুৰুগ্ৰামৰ নিউ কলনীত। এগৰাকী ৭৫ বছৰীয়া অৱসৰপ্ৰাপ্ত শিক্ষয়িত্ৰীৰ গৃহত প্ৰৱেশ কৰা এজন চোৰে মাত্ৰ ১০০ টকাৰ বাবে ডিঙি চেপি হ*ত্যা কৰে শিক্ষয়িত্ৰীগৰাকীক।
দেওবাৰে নিশা সংঘটিত হয় এই ঘটনা। মৃত বৃদ্ধাগৰাকীৰ নাম মধু শৰ্মা বুলি জানিব পৰা গৈছে। নিউ কলনীৰ মাদাৰ ডেইৰীৰ সমীপৰ ১৮০ নম্বৰ ঘৰত তেওঁ অকলেই বাস কৰিছিল। প্ৰায় ১৫ বছৰ পূৰ্বে শিক্ষয়িত্ৰী হিচাপে অৱসৰ গ্ৰহণ কৰা মধু শৰ্মাৰ স্বামীৰো প্ৰায় ১০ বছৰ পূৰ্বে মৃ*ত্যু হৈছিল।
আৰক্ষীৰ তথ্য অনুসৰি, চুৰিৰ উদ্দেশ্যেৰে অভিযুক্তই মধু শৰ্মাৰ ঘৰত প্ৰৱেশ কৰিছিল। ঘৰৰ ভিতৰত তেওঁ মধু শৰ্মাৰ বেগত নগদ ধন আৰু মূল্যৱান সামগ্ৰী বিচাৰে। সেই সময়তে চোৰক হাতে-লোটে ধৰা পলায় বৃদ্ধাগৰাকীয়ে। অভিযোগ অনুসৰি, ইয়াৰ পিছতে অভিযুক্তই বৃদ্ধাগৰাকীৰ পৰা ১০০ টকা দাবী কৰে। কিন্তু বৃদ্ধাগৰাকীয়ে এলাৰ্ম বজাই দিয়াত পৰিস্থিতি বেয়ালৈ ঢাল খায়। অভিযুক্তই তেওঁক ঠেলি দিয়াৰ লগতে পিছত ডিঙি চেপি হ*ত্যা কৰে বুলি আৰক্ষীৰ প্ৰাথমিক তদন্তত প্ৰকাশ পাইছে।
প্ৰায় দুই-তিনি ঘণ্টা ধৰি চলোৱা অভিযানৰ অন্তত আৰক্ষীয়ে অভিযুক্তক গ্ৰেপ্তাৰ কৰিবলৈ সক্ষম হয়। অভিযুক্তৰ নাম সূৰয গুপ্তা বুলি জানিব পৰা গৈছে। আৰক্ষীৰ জেৰাত চোৰটোৱে ইতিমধ্যে অপৰাধ স্বীকাৰ কৰিছে। অভিযুক্ত সূৰযৰ ঘৰ বিহাৰৰ সমষ্টিপুৰত। আৰক্ষীয়ে সদৰী কৰা অনুসৰি, অভিযুক্তজন ড্ৰাগছ আসক্ত হোৱাৰ আশংকাও ব্যক্ত কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
