নিশাৰ আন্ধাৰতো পৃথিৱীৰ নিৰ্দিষ্ট স্থানত সূৰ্যৰ পোহৰ পেলোৱাৰ পৰিকল্পনা কৰিছে আমেৰিকাৰ মহাকাশ প্ৰযুক্তি প্ৰতিষ্ঠান ৰিফ্লেক্ট অৰ্বিটালে। এই পৰিকল্পনা বাস্তৱায়িত কৰিবলৈ পৃথিৱীৰ কক্ষপথত স্থাপন কৰা হ’ব বৃহৎ আকাৰৰ দাপোণ। এই দাপোণৰ সহায়ত সূৰ্যৰ পোহৰ প্ৰতিফলিত কৰি নিশাৰ ভাগতো পৃথিৱীৰ নিৰ্বাচিত অঞ্চল পোহৰাই তোলাৰ লক্ষ্য লৈছে কোম্পানীটোৱে। এই প্ৰকল্পৰ বাবে কেলিফৰ্ণিয়াৰ ষ্টাৰ্টআপ প্ৰতিষ্ঠানটোৱে ভাৰতৰ হায়দৰাবাদস্থিত মহাকাশ প্ৰযুক্তি প্ৰতিষ্ঠান স্কাইৰুট এৰোস্পেচৰ সৈতে চুক্তিবদ্ধ হৈছে। চুক্তি অনুসৰি, স্কাইৰুটৰ বিক্ৰম ৰকেট ব্যৱহাৰ কৰি দুটা উপগ্ৰহ উৎক্ষেপণ কৰা হ’ব।
এই প্ৰযুক্তি সফল হ’লে প্ৰাকৃতিক দুৰ্যোগত ক্ষতিগ্ৰস্ত অঞ্চলত উদ্ধাৰ অভিযান চলোৱা, দুৰ্গম ঔদ্যোগিক এলেকাত নিশাও কাম-কাজ অব্যাহত ৰখা আৰু সৌৰশক্তি উৎপাদনৰ সময় বৃদ্ধি কৰাৰ দৰে কামত ব্যৱহাৰ কৰিব পৰা যাব।
ৰিফ্লেক্ট অৰ্বিটাল আৰু স্কাইৰুট এৰোস্পেচৰ মাজত হায়দৰাবাদত এই চুক্তি স্বাক্ষৰিত হৈছে। চুক্তি অনুসৰি, প্ৰথমটো উপগ্ৰহ বিক্ৰম-১ ৰকেট আৰু দ্বিতীয়টো বিক্ৰম-১ইউ ৰকেটৰ সহায়ত উৎক্ষেপণ কৰাৰ পৰিকল্পনা কৰা হৈছে। ৰিফ্লেক্ট অৰ্বিটালে প্ৰকাশ কৰা অনুসৰি, এই চুক্তিয়ে উপগ্ৰহ উৎক্ষেপণৰ বাবে নিৰ্ধাৰিত সময়সূচী আৰু মহাকাশলৈ উপগ্ৰহ প্ৰেৰণৰ সক্ষমতা নিশ্চিত কৰাত সহায় কৰিব। স্কাইৰুট এৰোস্পেচৰ মুখ্য কাৰ্যবাহী বিষয়া পৱন চন্দনাই কয় যে ৰিফ্লেক্ট অৰ্বিটালে মহাকাশ প্ৰযুক্তিৰ এক নতুন আৰু অভিনৱ ব্যৱহাৰৰ দিশত কাম কৰি আছে। পৃথিৱীৰ প্ৰয়োজন অনুসৰি সূৰ্যৰ পোহৰ যোগান ধৰাৰ তেওঁলোকৰ পৰিকল্পনা বাস্তৱায়িত কৰাৰ ক্ষেত্ৰত সহযোগিতা আগবঢ়াবলৈ স্কাইৰুট আগ্ৰহী।
ৰিফ্লেক্ট অৰ্বিটালে বিগত জুলাই মাহত আমেৰিকাৰ ফেডাৰেল কমিউনিকেচনছ কমিছন (FCC)ৰ পৰা এটা পৰীক্ষামূলক উপগ্ৰহ নিৰ্মাণ, উৎক্ষেপণ আৰু পৰিচালনা কৰাৰ অনুমতি লাভ কৰিছিল। কোম্পানীটোৰ পৰিকল্পনা অনুসৰি, মহাকাশত স্থাপন কৰা দাপোণৰ সহায়ত সূৰ্যৰ পোহৰ পৃথিৱীৰ নিৰ্দিষ্ট অঞ্চললৈ প্ৰতিফলিত কৰি পঠিওৱা হ’ব। এই পোহৰ প্ৰয়োজন অনুসৰি বন্ধ কৰিব পৰা যাব। একেদৰে, পোহৰৰ তীব্ৰতাও কম-বেছি কৰিব পৰা যাব। কোম্পানীটোৰ লক্ষ্য হৈছে, এই ব্যৱস্থাৰ জৰিয়তে প্ৰায় পাঁচ কিলোমিটাৰ ব্যাসাৰ্ধৰ এটা অঞ্চল পোহৰাই তোলা।
এই প্ৰযুক্তি ব্যৱহাৰ কৰি দূৰৱৰ্তী ঔদ্যোগিক অঞ্চলত নিশাৰ ভাগতো কাম-কাজ চলাই নিব পৰা যাব। ইয়াৰ উপৰি, দুৰ্যোগৰ সময়ত সন্ধান আৰু উদ্ধাৰ অভিযানত জড়িত দলসমূহক সহায় কৰা তথা প্ৰতিৰক্ষা অভিযানৰ সময়ত নিৰ্দিষ্ট স্থান পোহৰাই তোলাৰ ক্ষেত্ৰতো ইয়াক ব্যৱহাৰ কৰাৰ সম্ভাৱনা আছে।
ৰিফ্লেক্ট অৰ্বিটালৰ সহ-প্ৰতিষ্ঠাপক তথা মুখ্য কাৰ্যবাহী বিষয়া বেন নোভাকে কয় যে স্কাইৰুট এৰোস্পেচৰ সৈতে কাম কৰিবলৈ পাই তেওঁলোক আনন্দিত। এই সহযোগিতাই মহাকাশলৈ উপগ্ৰহ প্ৰেৰণৰ ব্যৱস্থা অধিক সহজ আৰু সুলভ কৰি তোলাত সহায় কৰিব বুলি তেওঁ আশা প্ৰকাশ কৰে। চুক্তি অনুসৰি, প্ৰথমটো উৎক্ষেপণত বিক্ৰম-১ ৰকেট ব্যৱহাৰ কৰা হ’ব। দ্বিতীয়টো উৎক্ষেপণৰ বাবে ব্যৱহাৰ কৰা হ’ব বিক্ৰম-১ইউ ৰকেট। এই ৰকেটত প্ৰথম পৰ্যায়ত অতিৰিক্ত বুষ্টাৰ সংযোজন কৰা হৈছে।
বেন নোভাকে লগতে কয় যে শেহতীয়াকৈ কোম্পানীটোৱে নিজৰ প্ৰথমটো মহাকাশযান পৰিচালনাৰ বাবে FCCৰ পৰা অনুজ্ঞাপত্ৰ লাভ কৰিছে। ভৱিষ্যতে এই প্ৰকল্প বৃহৎ পৰিসৰত সম্প্ৰসাৰণ কৰাৰ লক্ষ্যৰে কোম্পানীটোৱে জ্যোতিৰ্বিজ্ঞানী, স্থানীয় বাসিন্দা আৰু নিয়ন্ত্ৰণকাৰী সংস্থাসমূহৰ সৈতে আলোচনা অব্যাহত ৰাখিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
