আৰ জি কৰ কাণ্ডৰ চৰ্চা এতিয়া সমগ্ৰ দেশজুৰি চলিছে৷ বলীউডৰ অভিনেতাসকলেও এই ঘটনাৰ প্ৰতিবাদত গৰ্জি উঠিছে৷ এইবাৰ ৰাখীপূৰ্ণিমা উপলক্ষে মহিলাসকলৰ নিৰাপত্তাক লৈ বিশেষ বাৰ্তা দিছে বলীউড অভিনেতা অৰ্জুন কাপূৰে৷ কেৱল মহিলাসকলক ৰক্ষা কৰাই নহয়, বৰং মহিলাসকলে যাতে স্বাভাৱিকভাৱে নিৰাপদ বোধ কৰে তেনে পৰিবেশ গঢ়ি তুলিব লাগিব বুলি দাবী অৰ্জুনৰ৷
সামাজিক মাধ্যমত অৰ্জুনে লিখিছে, ‘ভনীয়েকসকলৰ সৈতে ৰাখীপুৰ্ণিমাৰ উৎসৱ পালন কৰা হ’ব৷ কিন্তু চাৰিওফালে যি হৈছে তাৰ মাজতে এই উৎসৱ উদযাপন কৰিবলৈ অদ্ভুত লাগিছে৷ এই ধৰণৰ উৎসৱ পালনৰ অৰ্থ পৰস্পৰক ৰক্ষা কৰা, ভনীয়েকক ৰক্ষা কৰা, জীৱনত যি মহিলা আছে তেওঁৰ কাষত সাহস হৈ ঠিয় দি থকা৷ কিন্তু এই সময়ত বহু পুৰুষৰ মাজত শিক্ষা আৰু বুজাপৰাৰ অভাৱে দেখা দিছে৷’
অৰ্জুনে প্ৰশ্ন তুলিছে, ‘ৰাখীপুৰ্ণিমাৰ দিনা নই ভাতৃ হিচাপে ৰাখী পিন্ধিব পাৰো৷ কিন্তু আমি এনে এক পৰিবেশ কিয় তৈয়াৰ কৰিব নোৱাৰো য’ত এগৰাকী মহিলাই ভাতৃৰ অবিহনে অন্য পুৰুষৰ কাষতো নিজকে নিৰাপদ বোধ কৰে৷ সকলো সময়তে তেওঁলোকক শাৰীৰিকভাৱে সুৰক্ষা দিয়াৰ প্ৰয়োজন কিয় আহি পৰে? জানো আমি এইবোৰ দেখি দেখি অভ্যস্ত হৈ গৈছো৷ কিন্তু ভাতৃয়ে ভনীয়েকক ৰক্ষা কৰিব অথৱা পুৰুষে মহিলাক ৰক্ষা কৰিব৷ কিন্তু ৰক্ষা কৰাৰ সলনি মহিলাক নিৰাপদ এক পৰিবেশ তৈয়াৰ কৰিবলৈ পুৰুষক শিকোৱাটোহে প্ৰয়োজন৷’
অৰ্জুনে লগতে কয়, ‘এই বিষয়টোক লৈ আলোচনাৰ প্ৰয়োজন আছে৷ নাজানো এই পাৰিপাৰ্শ্চিকৰ কেতিয়া পৰিবৰ্তন হ’ব? কিমান পৰিবৰ্তন হ’ব? কিন্তু আমি নিজেই এই চেষ্টা কৰিব পাৰো৷ মহিলাক সুৰক্ষা দিয়াৰ সলনি নিজৰ মানসিকতা সলনি কৰি মহিলাক নিৰাপদ অনুভৱ কৰোৱা এক পৰিবেশ গঢ়ি তোলো৷’ অৰ্জুনৰ এই পোষ্ট এতিয়া সামাজিক মাধ্যমত খুবেই ভাইৰেল হৈ পৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
