নোবেল বিজয়ী মহম্মদ ইউনুছ বাংলাদেশৰ নতুন মুৰব্বী, দেশখনৰ সংকটৰ ৫ টা আপডেট
বাংলাদেশত সংৰক্ষিত বিৰোধী প্ৰতিবাদ চৰকাৰ বিৰোধী আন্দোলনলৈ পৰিণত হোৱাৰ পিছতে যোৱা ৫ আগষ্টত প্ৰধানমন্ত্ৰীৰ পদৰ পৰা পদত্যাগ কৰিবলগীয়া হৈছিল শ্বেখ হাছিনাই। হিংসাত্মক পৰিস্থিতিৰ মাজতে দেশ এৰি পলায়ন কৰিবলৈ বাধ্য হৈছিল হাছিনা। বৰ্তমান ভনীয়েকৰ সৈতে ভাৰতত বাস কৰি আছে শ্বেখ হাছিনা।
আজি ৮ আগষ্ট বৃহস্পতিবাৰে বাংলাদেশ সেনাৰ সহযোগত অন্তৱৰ্তীকালীন চৰকাৰৰ দায়িত্ব ল’ব নোবেল বিজয়ী মহম্মদ ইউনুছে। সেই উদ্দেশ্যে সন্ধিয়া শপত গ্ৰহণো কৰে। আনহাতে, ঢাকা আৰু অন্যান্য চহৰতো হিংসাত্মক ঘটনা সংঘটিত হোৱাৰ খবৰ পোৱা গৈছে। ইফালে ভাৰতেও বাংলাদেশীৰ অনুপ্ৰৱেশ ৰোধ কৰিবলৈ সীমান্তত নিৰাপত্তা কটকটীয়া কৰিছে।
১- আজি বাংলাদেশত অন্তৱৰ্তীকালীন চৰকাৰৰ শপত গ্ৰহণ অনুষ্ঠান
ঢাকা ট্ৰিবিউনৰ প্ৰতিবেদন অনুসৰি বৃহস্পতিবাৰে দিনৰ ২:৩০ বজাত পেৰিছৰ পৰা নোবেল বিজয়ী মহম্মদ ইউনুছে ঢাকাত উপস্থিত হৈছে। নিশা ৮:৩০ বজাত বাংলাদেশৰ অন্তৱৰ্তীকালীন চৰকাৰৰ শপত গ্ৰহণ অনুষ্ঠান। মহম্মদ ইউনুছ হ’ব অন্তৱৰ্তীকালীন চৰকাৰৰ মুৰব্বী।
২- ৫০০ বাংলাদেশীক অনুপ্ৰৱেশ কৰাত বাধা দিলে বি এছ এফে
বুধবাৰে ভাৰত-বাংলাদেশ সীমান্তৰ সমীপত ৫০০ বাংলাদেশীয়ে ভাৰতত প্ৰৱেশ কৰিবলৈ চেষ্টা কৰে। অৱশ্যে জলপাইগুৰিৰ সমীপত সীমান্ত সুৰক্ষা বাহিনীৰ লোকে তেওঁলোকক ৰখাই দিয়ে। উত্তৰ বংগ সীমান্তৰ তথ্য অনুসৰি বাংলাদেশত প্ৰতিবাদকাৰীৰ আক্ৰমণৰ আশংকাত এই লোকসকল সমবেত হৈছিল।
৩- খালেদা জিয়াই লাভ কৰিলে নতুন পাছপ’ৰ্ট
শ্বেইখ হাছিনাই দেশ এৰি যোৱাৰ লগে লগে ২০১৮ চনৰ পৰা দুৰ্নীতিৰ গোচৰত জেলত থকা প্ৰাক্তন প্ৰধানমন্ত্ৰী খালেদা জিয়াকো মুকলি কৰি দিয়া হৈছে। লগতে তেওঁক নতুন পাছপ’ৰ্ট দিয়া হৈছে।
৪- বিএনপিয়ে ৩ মাহৰ ভিতৰত নিৰ্বাচন অনুষ্ঠিত কৰিবলৈ দাবী জনাইছে
প্ৰাক্তন প্ৰধানমন্ত্ৰী খালেদা জিয়াৰ বাংলাদেশ জাতীয়তাবাদী পাৰ্টিয়ে বুধবাৰে অনুষ্ঠিত হোৱা সমাৱেশত বিএনপিৰ নেতাসকলে ৰাইজৰ নিৰ্বাচিত চৰকাৰখন ক্ষমতালৈ আহিব লাগে বুলি মন্তব্য কৰে। ইয়াৰ বাবে নিৰ্বাচনৰ প্ৰয়োজন বুলি উত্থাপন কৰে।
৫- মেঘালয় সীমান্তৰ সকলো বজাৰ বন্ধ
বাংলাদেশত চলি থকা হিংসা আৰু ৰাজনৈতিক সংকটৰ মাজতে মেঘালয় চৰকাৰে সীমান্তৰ বজাৰ বন্ধ কৰাৰ নিৰ্দেশ দিছে। পৰিস্থিতি সুস্থিৰ নোহোৱালৈকে বজাৰসমূহ খোলা নহ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
