গৌৰৱ গগৈক লোকসভাত কংগ্ৰেছৰ উপ দলপতি ঘোষণা৷ লোকসভাত এইবাৰৰ বিৰোধী দলপতি হিচাপে ৰাহুলৰ নাম ঘোষণা হোৱাৰ পাছতেই গৌৰৱ গগৈক দ্বিতীয় বাৰৰ বাবে উপদলপতি হিচাপে ঘোষণা কৰা হৈছে৷ ছোনীয়া গান্ধীয়ে ঘোষণা কৰে কংগ্ৰেছৰ উপ দলপতিৰ নাম৷
গৌৰৱ গগৈৰ সফল ৰাজনৈতিক কেৰিয়াৰ
গৌৰৱ গগৈ অসমৰ প্ৰাক্তন মুখ্যমন্ত্ৰী তৰুণ গগৈৰ পুত্ৰ। ইয়াৰ পূৰ্বে তেওঁ ২০২০ চনৰ পৰা লোকসভাত ভাৰতীয় জাতীয় কংগ্ৰেছৰ উপদলপতি পদত অধিষ্ঠিত হৈ আছে গৌৰৱ গগৈ। এইবাৰ গৌৰৱ গগৈয়ে যোৰহাটৰ আসনৰ পৰা বিজেপিৰ তপন কুমাৰ গগৈক ১৪৪৩৯৩টা ভোটত পৰাস্ত কৰি লোকসভালৈ গৈছে৷
গৌৰৱে প্ৰতিদ্বন্দিতা আগবঢ়োৱা যোৰহাট সমষ্টিৰ পৰা তেওঁৰ পিতৃও নিৰ্বাচিত হৈছিল। ভূতপূৰ্ব মুখ্যমন্ত্ৰী তৰুণ গগৈ ১৯৭১ চনৰ পৰা ১৯৮৫ চনলৈকে যোৰহাট সমষ্টিৰ সাংসদ হিচাপে আছিল। তাৰপিছতেই কলিয়াবৰৰ সাংসদ হৈছিল তৰুণ গগৈ। পুত্ৰ গৌৰৱেও ২০১৯ চনত কলিয়াবৰৰ পৰা নিৰ্বাচিত হৈ সাংসদ হিচাপে দিল্লীত ভৰি থৈছে। এ
গৌৰৱ এইবাৰ নিৰ্বাচিত হৈ দিল্লীলৈ যোৱাৰ বাট মুকলি কৰি দিছে যোৰহাটবাসীয়ে। কিন্তু ইয়াৰ পূৰ্বে জানি থওক বিগত কাৰ্যকালত সাংসদ হৈ গৌৰৱে কি কি কৰিলে? সদনত সৰৱ গৌৰৱক অসমৰ এজন যোগ্য প্ৰতিনিধি হিচাপে শাসক-বিৰোধী সকলোৱে স্বীকাৰ কৰে। তেওঁৰ বাকপটুততা আৰু সৰলতাই মানুহৰ মন জয় কৰে সেয়া কোনো কাৰণতে কোনো নুই কৰিব নোৱাৰে।
২০১৯ চনত কলিয়াবৰ লোকসভা সমষ্টিৰ পৰা গৌৰৱ গগৈ নিৰ্বাচিত হৈছিল। ২০১৯ৰ ২৩মে’ত আৰম্ভ হোৱা সাংসদৰ কাৰ্যকাল অন্ত পৰে ২০২৪ৰ ১২ফেব্ৰুৱাৰীত। বিগত ৫বছৰত সদনত গৌৰৱ গগৈৰ উপস্থিতিৰ হাৰ আছিল ৭৬শতাংশ। বিগত ৫বছৰীয়া কাৰ্যকালত গৌৰৱ গগৈয়ে মুঠ ৭৮টা বিৰ্তকত অংশ লৈছিল।গৌৰৱ গগৈয়ে ১০ফেব্ৰুৱাৰী ২০২৪ত সদনত শেষৰটো বিতৰ্কত অংশ লৈছিল। ৰাম মন্দিৰ সন্দৰ্ভত গৌৰৱ গগৈয়ে এই বিৰ্তক কৰিছিল।
গৌৰৱ গগৈয়ে সদনত অংশ লোৱা উল্লেখযোগ্য বিৰ্তকসমূহ হৈছে, ২০২৪ৰ ৮ফেব্ৰুৱাৰীত ৰাষ্ট্ৰপতিৰ ভাষণৰ সন্দৰ্ভত হোৱা বিৰ্তক, ২০২৩ৰ ৩আগষ্টত ডিজিটেল পাৰ্চনেল ডাটা প্ৰটেকশ্ব্যন এক্ট বিৰ্তক, ২০২২ৰ ৩১মাৰ্চত জলবায়ু পৰিবৰ্তন শীৰ্ষক বিতৰ্ক। ২০২২ত পেট্ৰ’ল-ডিজেলৰ মূল্যবৃদ্ধি বিতৰ্ক, ৰাজ্যৰ যুৱচামে আলফা স্বাধীনত যোগদান কৰা প্ৰসংগত গৌৰৱ গগৈয়ে ২০২২ৰ ২৩মাৰ্চত বক্তব্য দাঙি ধৰিছিল। বিপ্লৱ কুমাৰ শৰ্মা কমিটিৰ প্ৰতিবেদন, ‘কা’ আন্দোলনত মৃত্যু হোৱা যুৱকৰ ন্যায়িক তদন্তৰ দাবী, অসমৰ বান সমস্যা আদি প্ৰসংগত সদনত সৰৱ আছিল গৌৰৱ গগৈ।
২০১৯ৰ ১১ডিচেম্বৰত গৌৰৱ গগৈয়ে নাগৰিকত্ব সংশোধনী বিধেয়কৰ বিৰুদ্ধে সদনত উদাত্ত ভাষণ আগবঢ়াইছিল। একেদৰে সদনত ২৪৫টা প্ৰশ্ন কৰিছিল গৌৰৱ গগৈয়ে। মুঠ ৫খন প্ৰাইভেট মেম্বাৰ বিল সদনত উত্থাপন কৰিছিল গৌৰৱ গগৈয়ে। গৌৰৱ গগৈয়ে সদনত প্ৰদান কৰা বক্তব্য দেশবাসীয়ে শুনে। ৰাম মন্দিৰৰ পৰা আৰম্ভ কৰি ভাৰতৰ অৰ্থনীতি, মূল্যবৃদ্ধি, নিবনুৱা সমস্যা আদিৰ সন্দৰ্ভত গৌৰৱ গগৈয়ে যুক্তিনিষ্ঠ বক্তব্যই ভাৰতবাসীৰ দৃষ্টি আকৰ্ষণ কৰিবলৈ সক্ষম হৈছিল।
উল্লেখ্য যে এইবাৰ গৌৰৱ কলিয়াবৰত নাই। সমষ্টি পুনঃনিৰ্ধাৰণৰ পাছত ভোটৰ জনবিন্যাস সলনি হ’ল। কলিয়াবৰ সমষ্টি লুপ্ত হ’ল। নতুনকৈ সৃষ্টি হ’ল কাজিৰঙা লোকসভা সমষ্টি। সেয়ে এইবাৰ যোৰহাট লোকসভা সমষ্টিৰ প্ৰাৰ্থী হৈছিল গৌৰৱ গগৈ। এই নিৰ্বাচনী যুঁজ গৌৰৱ গগৈয়ে শেষ হাঁহি মাৰি আকৌ দিল্লীলৈ যাত্ৰা কৰিলে৷ এজন যোগ্য প্ৰতিনিধি সদনলৈ গৈ এক উল্লেখযোগ্য আসন লাভ কৰাৰ লগে লগেই অসম প্ৰদেশ কংগ্ৰেছতো আনন্দৰ পৰিবেশে বিৰাজ কৰা দেখিবলৈ পোৱা গৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ