অসম লাইভ ২৪ঃ বিশ্বত ক’ৰোনা সংক্ৰমণে ভয়াৱহ ৰূপ ধৰাৰ সমান্তৰালকৈ ভাৰততো COVID-19এ সংহাৰী ৰূপ লৈছে। একেদিনাই ভাৰতত আক্ৰান্ত হৈছে প্ৰায় ২৫ হাজাৰ লোক। তদুপৰি এদিনত মৃত্যু হৈছে সৰ্বাধিক ৬১৩ গৰাকী লোকৰ। ঠিক এনে সময়তে বিশ্বৰ সৰ্ববৃহৎ ক’ভিড হাস্পতাল মুকলি হ’ল দিল্লীত। ‘চৰ্দাৰ পেটেল ক’ভিড কেয়াৰ চেণ্টাৰ’ নামেৰে দেওবাৰে দিল্লীত মুকলি হ’ল এই সৰ্ববৃহৎ হাস্পতালখন। এই হাস্পতালখনত একেলগে ১০ হাজাৰ ৰোগীক ৰাখিব পৰা ব্যৱস্থা আছে। দিল্লীৰ উপ-ৰাজ্যপালে এই বৃহৎ হাস্পতালখন মুকলি কৰে। এই ১০ হাজাৰ বিছনাৰ ১০ শতাংশত অক্সিজেন যোগানৰ ব্যৱস্থা আছে। এই ক’ভিড কেয়াৰ চেণ্টাৰটোৰ সৈতে সংযোগ ৰক্ষা কৰিব দীনদয়াল উপাধ্যায় হাস্পতাল আৰু মদনমোহন মালব্য হাস্পতালে। প্ৰায় ১৭০ গৰাকী ডাক্টৰ-বিশেষজ্ঞ আৰু ৭০০ৰ অধিক নাৰ্ছ আৰু স্বাস্থ্যকৰ্মীয়ে সেৱা আগবঢ়াব হাস্পতালখনত। হাস্পতালখনৰ আকাৰ প্ৰায় ২০ খন ফুটবল খেলপথাৰৰ সমান। ITBP-এ পৰিচালনা কৰিব হাস্পতালখন। কেন্দ্ৰটো ১,৭০০ ফুট দীঘল আৰু ৭০০ ফুট বহল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
