অসম লাইভ ২৪ঃ অৱশেষত সন্ধান ওলাল মাজুলীৰ ফেৰী দুৰ্ঘটনাত নিখোজ হোৱা লখিমপুৰৰ ইন্দ্ৰেশ্বৰ বৰা ওৰফে জান বৰাৰ৷ শনিবাৰে বিশ্বনাথঘাটত উদ্ধাৰ হ’ল ইন্দ্ৰেশ্বৰ বৰাৰ মৃতদেহ৷ নদীৰ বালিচৰত লাগি থকা অৱস্থাত কাজিৰঙাৰ ষষ্ঠ সংযোজনৰ বনকৰ্মীয়ে উদ্ধাৰ কৰে মৃতদেহটো৷ উদ্ধাৰৰ পাছতে পৰিয়ালৰ লোকে মৃতদেহটো চিনাক্ত কৰে জান বৰাৰ বুলি৷ মৃতদেহটোৰ আঙুলিত আছে ‘J’ লিখা আঙুঠি৷ ইয়াৰ লগে লগে দুৰ্ঘটনাত নিহত হোৱা লোকৰ সংখ্যা ২ গৰাকীলৈ বৃদ্ধি পালে৷ উল্লেখ্য, শুকুৰবাৰে বিশ্বনাথঘাটতে উদ্ধাৰ হৈছিল ইন্দ্ৰেশ্বৰ বৰাৰ বেগ৷ বুধবাৰে নিমাতীঘাটৰ নাও দুৰ্ঘটনা হোৱাৰ পাছৰে পৰা সন্ধানহীন হৈ আছিল ইন্দ্ৰেশ্বৰ বৰা আৰু ডাঃ বিক্ৰমজিৎ বৰুৱা৷ আনহাতে, আজিপৰ্যন্ত সন্ধান ওলোৱা নাই ডাঃ বিক্ৰমজিৎ বৰুৱাৰ৷ শোকস্তব্ধ দুয়োটা পৰিয়ালে বৃহস্পতিবাৰে সন্ধানহীন দুয়োগৰাকী ব্যক্তিৰ সন্ধান লাভৰ বাবে ব্ৰহ্মপুত্ৰৰ পাৰত পূজা-অৰ্চনাও আগবঢ়াইছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
