অৱশেষত আৰক্ষীৰ হাতত ধৰা পৰিল মহাপ্ৰৱঞ্চক দীপাংকৰ বৰ্মণ৷ মহানগৰ আৰক্ষী আৰু গোৱা আৰক্ষীৰ যুটীয়া অভিযানত গোৱাৰ পানজিমত বীচ্চৰ ওচৰত গ্ৰেপ্তাৰ DB ষ্টকৰ স্বত্বাধিকাৰ মহা প্ৰৱঞ্চক দীপাংকৰ বৰ্মনক। DB ষ্টকৰ নামত ৭ হাজাৰ কোটি টকা লুণ্ঠন কৰি গোৱাৰ পানজিমত আত্মগোপন কৰি আছিল মহা প্ৰৱঞ্চক দীপাংকৰে বৰ্মনে।
ACP অমিত মাহাতোৰ নেতৃত্বৰ যোৱা অসম আৰক্ষীৰ এটা দলে গোৱা আৰক্ষীৰ সহযোগত গ্ৰেপ্তাৰ কৰে মহা প্ৰৱঞ্চক দীপাংকৰ বৰ্মনক। পানজিমত এজন বিশেষ লোকক লগ কৰিবলৈ আহিছিল দীপাংকৰ বৰ্মন। তেতিয়াই আৰক্ষীৰ হাতত ধৰা পৰে দীপাংকৰ৷ বিগত কেইবাদিনো ধৰি অসম আৰক্ষীৰ দলটোৱে তাত অনুসন্ধান কৰি কৌশলেৰে ধৰিছে দীপাংকৰক৷
গ্ৰেপ্তাৰৰ পাছতেই দীপাংকৰৰ পৰা নগদ ধনসহ দুটাকৈ মোবাইল ফোন, সোণৰ চেইন, আঙুঠি জব্দ কৰিছে আৰক্ষীৰ দলে৷ গ্ৰেপ্তাৰৰ পিছতে গোৱাত দীপাংকৰ বৰ্মনে থকা কোঠাত আৰক্ষীয়ে অভিযান চলাই জব্দ কৰে বৃহৎ পৰিমাণৰ ধনৰ লগতে এইসমূহ সামগ্ৰী৷ দীপাংকৰৰ কোঠাত ২৭ লাখ টকাও জব্দ কৰা হৈছে। এটা বেগত ৰাখিছিল এই বৃহৎ পৰিমাণৰ ধন।
উল্লেখ্য যে চিটফাণ্ড কেলেংকাৰীৰ তথ্য পোহৰলৈ অহাৰ পিছত প্ৰায় ৬৬ দিন ধৰি আত্মগোপন কৰি আছিল দীপাংকৰ বৰ্মন৷ অৱশেষত দেওবাৰে আৰক্ষীৰ জালত পৰিছে মহাপ্ৰৱঞ্চক দীপাংকৰ বৰ্মন। ২১ আগষ্টৰ পৰা পলাতক হৈ আছিল মহা প্ৰৱঞ্চক দীপাংকৰ বৰ্মন। ১৯ আগষ্টত প্ৰথমে আৰক্ষীয়ে গ্ৰেপ্তাৰ কৰিছিল দীপাংকৰৰ প্ৰেয়সী মনালিছা দাসক। আৰক্ষীয়ে তদন্ত কৰি আৰক্ষীয়ে DB ষ্টকৰ কাৰ্যালয়ৰ একাউণ্টে জিণ্টুমণি কলিতাকো গ্ৰেপ্তাৰ কৰিছিল। কেলেংকাৰীত জড়িতৰ অভিযোগত গ্ৰেপ্তাৰ হৈছে দীপাংকৰৰ পিতৃ মাতৃৰ লগতে CAও। গুৱাহাটীত বিলাসী কাৰ্যালয় খুলি দীপাংকৰে পেলাইছিল লুণ্ঠনৰ জাল৷ বহু লোকে দীপাংকৰৰ কথাত ভুল গৈ বিনিয়োগ কৰিছিল বহু পৰিমানৰ ধন৷ দীপাংকৰৰ তথ্য পোহৰলৈ অহাৰ পাছতেই আৰক্ষীয়ে ছীল কৰিছিল দীপাংকৰৰ ১২টাকৈ বেংক একাউণ্টো।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
