১৬ বছৰে বুকুত কঢ়িয়াই ফুৰিছে মুম্বাইৰ সেই ২৬/১১ৰ দাৱানল
২০০৮ চনৰ মুম্বাইৰ নৱেম্বৰ মাহৰ ২৬ তাৰিখ, বুধবাৰ। হঠাতে আক্ৰমণ চলাই ১০ দনীয়া এটা আক্ৰমণকাৰী দলে। যি আক্ৰমণত প্ৰাণ হেৰুৱাই ১৭৫ গৰাকী লোকে। ইয়াৰ উপৰি ৩০০ গৰাকী লোক আহত হয়। নিহত সকলৰ ভিতৰত ৯ আক্ৰমণকাৰী। জীৱিত ধৰা পৰিছিল কাছভ। সেই লোমহৰ্ষক ঘটনাৰেই আজি ১৬ বছৰ পাৰ। কিন্তু আজিয়ো মুম্বাইবাসীয়ে পাহৰিব পৰা নাই সেই আক্ৰমণৰ ঘটনা।
স্বাধীন ভাৰতৰ ইতিহাসত এয়া আছিল অন্যতম বৃহৎ সন্ত্ৰাসবাদী আক্ৰমণ। এই আক্ৰমণত ১৮ জন নিৰাপত্তাৰক্ষীকে ধৰি ৯ আক্ৰমণকাৰী সহ মুঠ ১৭৫ জন লোক নিহত হোৱাৰ লগতে ৩০০ৰো অধিক লোক আহত হৈছিল। দেশৰ অন্যতম নিৰাপদ স্থান বুলি বিবেচিত মুম্বাইৰ তাজ হোটেলক লক্ষ্য কৰি লৈছিল সন্ত্ৰাসবাদীয়ে।
পাকিস্তানৰ কৰাচীৰ পৰা সাগৰীয় পথেৰে নাৱেৰে মুম্বাইলৈ ৰাওনা হৈছিল ১০ জনীয়া সন্ত্ৰাসবাদী দল। ভাৰতীয় নৌসেনাৰ চকুত ধুলি দিবলৈ সাগৰৰ মাজতে ভাৰতীয় নাও এখন হাইজেক কৰি নাওখনত থকা সকলো লোককে হত্যা কৰি সেই নাওখন ব্যৱহাৰ কৰি নিশা প্ৰায় ৮ মান বজাত কোলাবাৰ ওচৰৰ মাছ বজাৰত অৱতৰণ কৰে।
স্থানীয় মাছমৰীয়াসকলে লোকসকলৰ ওপৰত সন্দেহ প্ৰকাশ কৰে আৰক্ষীকো অৱগত কৰিছিল যদিও আৰক্ষীয়ে ইয়াক সহজভাৱে লয়। তাৰ পাছতে ২৬ নৱেম্বৰত প্ৰথমে মুম্বাইৰ সকলো স্থান পৰীক্ষা কৰি সন্ধিয়া নিজৰ কু-পৰিকল্পনা কাৰ্যকৰী কৰিবলৈ ৰাওনা হয়।
কোলাবাৰ পৰা সন্ত্ৰাসবাদীয়ে ৪ জনীয়া গোটত টেক্সি লৈ নিজ নিজ গন্তব্যস্থানৰ দিশে ৰাওনা হয়। সন্ত্ৰাসবাদীৰ এটা দলে নিশা ৯.৩০ বজাত ছাত্ৰপতি শিৱাজী টাৰ্মিনেল ৰেল ষ্টেচনত উপস্থিত হয়। সকলোৰে হাতত AK-47 ৰাইফল আছিল আৰু তেওঁলোকে নিৰ্বিচাৰে গুলী চলাবলৈ আৰম্ভ কৰে। এই আক্ৰমণকাৰীৰ মাজত আজমল কাছাবকো অন্তৰ্ভুক্ত কৰা হৈছিল। যাক নিৰাপত্তাৰক্ষীয়ে জীৱিত অৱস্থাত বন্দী কৰি ফাঁচী দিয়ে পিছত। চি এছ টি ৰেলৱে ষ্টেচনত সংঘটিত গুলীচালনাৰ ঘটনাত আৰক্ষী উপস্থিত হোৱাৰ লগে লগে। ভিলে পাৰ্লে অঞ্চলতো গোলাবৰ্ষণৰ খবৰ আহিছিল।
সেই নিশা সন্ত্ৰাসবাদীয়ে মুম্বাইৰ বহু বিখ্যাত স্থানক লক্ষ্য কৰি লয়। মুম্বাইত অৱস্থিত বিশ্বমানৰ হোটেলসমূহৰ ভিতৰত অন্যতম তাজ হোটেল, অবেৰয় ট্ৰাইডেণ্ট হোটেল আৰু নৰিমান হাউছক লক্ষ্য কৰি লোৱা হৈছিল। মুম্বাইৰ গৌৰৱ বুলি কোৱা তাজ হোটেল সন্ত্ৰাসবাদীয়ে সম্পূৰ্ণৰূপে ধ্বংস কৰি পেলায়।
তিনিদিন ধৰি নিৰাপত্তা বাহিনী আৰু সন্ত্ৰাসবাদীৰ মাজত চলে এই এনকাউণ্টাৰ। আৰক্ষী আৰু সেনাৰ অভিযানো যেন ব্যৰ্থ হয়। তাৰ পিছত এন এছ জিৰ কমাণ্ডোক মাতি অনা হয়। এন এছ জিৰ কমাণ্ডোৱে ১০ টাৰ ভিতৰত ৯ সন্ত্ৰাসবাদীক হত্যা কৰে আৰু কাছভক জীৱিত অৱস্থাত ধৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
