অসম লাইভ২৪ঃ ৰুটি গোল নহ’লেও হ’ব। মহিলা মানেই গৃহকৰ্ম নিপুন হ’ব লাগিব তেনে কথা নাই। শেহতীয়াভাৱে এই কথাকেই প্ৰমাণ কৰি দেখুৱালে ইছৰোৰ মহিলা বিজ্ঞানীয়ে। তথাকথিত বেদবাক্যক উপেক্ষা কৰি চন্দ্ৰক জয় কৰিলে ভাৰতীয় মহিলাই। সমগ্ৰ বিশ্বতে চৰ্চা লাভ কৰা ইছৰোৰ মহিলা বিজ্ঞানীক শুভেচ্ছা জনাইছে প্ৰধানমন্ত্ৰী নৰেন্দ্ৰ মোদীয়েও।
পিন্ধনত শাৰী, খোঁপাত ফুল মেৰিয়াই থাকিলেও দুচকুত আছিল চন্দ্ৰ জয় কৰাৰ সপোন। সেয়ে সমাজৰ সকলো পৰিধি ভাঙি আজি তেওঁলোকে চন্দ্ৰক জয় কৰিবলৈ সক্ষম হৈছে। পুৰুষ বিজ্ঞানীৰ সমানে সমানে কান্ধ মিলাই আগবাঢ়িছে তেওঁলোক। চন্দ্ৰ মিছনত মহিলা বুলিয়েই তেওঁলোক কোনো দিশত পিছপৰি থকা নাই। তেওঁলোকৰ এই বিজয়ে প্ৰমাণ কৰিছে মহিলা পুৰুষতকৈ কোনো গুণেই কম নহয়। তথাকথিত সমাজৰ চিন্তাক কামেৰেই বুঢ়া আঙুলি দেখুৱালে এইকেইগৰাকী মহিলাই।
২৩ আগষ্টৰ সন্ধিয়া ৬ বাজি ৩ মিনিটত চন্দ্ৰৰ মাটি স্পৰ্শ কৰিলে ইছৰোৰ চন্দ্ৰযান-৩য়ে। এই সফলতাত আনন্দত উৎফুল্লিত হৈ পৰিছে এই মিছনত জড়িত আটাইকেইগৰাকী বিজ্ঞানীৰ সমান্তৰালকৈ মহিলা বিজ্ঞানীসকলো। কেৱলমাত্ৰ চন্দ্ৰাভিযানৰ সফলতাৰ বাবেই তেওঁলোক আনন্দিত হৈছে তেনে নহয়। কু সংস্কাৰাচ্চন্ন আৰু এক শ্ৰেণীৰ পুৰুষতান্ত্ৰিক সমাজৰ গালত পূৰ্ণহতীয়া চৰ সোধাইছে এই সাফল্যই। শনিবাৰে ইছৰোৰ মুখ্য কাৰ্যালয়ত উপস্থিত হৈছে প্ৰধানমন্ত্ৰী মোদী। মোদীয়ে উপস্থিত হৈয়েই ইছৰোৰ নাৰী ব্ৰিগেডক বিশেষভাৱে অভিনন্দন জনোৱাৰ লগতে প্ৰশংসাও কৰিছে। চন্দ্ৰৰ যি অংশত লেণ্ডাৰ বিক্ৰমে ভৰি থলে সেই অঞ্চলক শিৱশক্তি নাম দিছে প্ৰধানমন্ত্ৰীয়ে। এই শিৱশক্তি মহিলাসকলৰ অক্লান্ত পৰিশ্ৰমৰ প্ৰতীক বুলিও জনাইছে প্ৰধানমন্ত্ৰীয়ে। দেশৰ বৈজ্ঞানিক অগ্ৰগতিক তেওঁলোকৰ অৱদান অনস্বীকাৰ্য বুলিও জনাইছে প্ৰধানমন্ত্ৰীয়ে।
সামাজিক মাধ্যমতো বেছ ভাইৰেল এতিয়া আটাইকেইগৰাকী মহিলা বিজ্ঞানী। তেওঁলোকক লৈ এটাৰ পাছত এটা পোষ্ট শ্বেয়াৰ কৰিছে বিভিন্নজনে। নেটিজেনৰ অধিকাংশৰেই মত, সাধাৰণ পোছাক পৰিহিতা শান্ত এই মহিলা বিজ্ঞানীসকল সাফল্যৰ প্ৰতীক।
এই সফলতাক লৈ মহিলা বিজ্ঞানীয়ে কি কৈছে?
ইছৰোৰ মহিলা বিজ্ঞানী সাবিত্ৰীয়ে এই সন্দৰ্ভত কয়, ‘মই খুব সুখী। যেনেকৈ পৰিকল্পনা কৰিছিলো তেনেকৈয়ে চন্দ্ৰত লেণ্ড কৰিলে বিক্ৰমে। সমগ্ৰ দেশেই এই মাহেন্দ্ৰক্ষণৰ বাবে অপেক্ষা কৰিছিল। এই সফলতাক লৈ আমি খুবেই গৰ্বিত। আশা কৰো আমাৰ ভৱিষ্যতৰ প্ৰকল্পসমূহেও এনেকৈ সফলতা লাভ কৰিব। চন্দ্ৰত লেণ্ডিং পয়েণ্টৰ নাম প্ৰধানমন্ত্ৰীয়ে শিৱশক্তি দিয়াক লৈয়ো খুবেই সুখী বুলি জনাই সাবিত্ৰীয়ে। সাবিত্ৰীয়ে এই সন্দৰ্ভত কয়,’এই সফলতাক নাৰী শক্তিৰ সৈতে তুলনা কৰাক লৈ আমি নথৈ আনন্দিত।’
ইছৰোৰ জুনিয়ৰ অভিযন্তা নীত্যাই কয়, ‘এই মিছনৰ অংশ হৈ মই অত্যন্ত সুখী। এই মিছন সফল হোৱাত আমি গৰ্বিত।’ চন্দ্ৰযান-৩ৰ EMIMCৰ প্ৰজেক্ট মেনেজাৰ সৌজন্যই এই সন্দৰ্ভত কয়, ‘সঁচায়ে আমি এতিয়া টপ অৱ দ্যা মুন। আমাক প্ৰধানমন্ত্ৰীয়ে ইমান প্ৰশংসা কৰিছে আমি সুখী হৈ পৰিছো। এয়া আমাৰ বাবে ঐতিহাসিক এক মুহূৰ্ত।’
বাংগালুৰুৰ ছেটেলাইট চেণ্টাৰৰ চিনিয়ৰ বিজ্ঞানী নীধি পোৰোৱালে কয়, ‘চকুৰ সন্মুখতে মেজিক দেখিলো। দীৰ্ঘদিন ধৰি এই মিছনৰ বাবে আমি পৰিশ্ৰম কৰিছো। দিন-ৰাতি এক কৰি কাম কৰিছিল আমাৰ বিজ্ঞানীয়ে। আমাৰ হেড অৱ দ্যা ফেমিলি হৈছে প্ৰধানমন্ত্ৰী। তেওঁ সোঁশৰীৰে উপস্থিত হৈ আমাক আশীৰ্বাদ দিছে। এয়া আমাৰ বাবে বৃহৎ এক অনুপ্ৰেৰণা।’
এই চেণ্টাৰত কৰ্মৰত আন এগৰাকী বিজ্ঞানী প্ৰিয়ংকা মিশ্ৰই কয়, ‘আমি বহুত এক্সাইটেড। আমাৰ সফলতাক বিশ্বই প্ৰশংসা কৰিছে। প্ৰধানমন্ত্ৰী নৰেন্দ্ৰ মোদীয়ে সাক্ষাৎ কৰিবলৈ নিজে আহিছে। সেয়াই গৌৰৱ আমাৰ। আমাৰ সাহস আৰু কামৰ প্ৰশংসা কৰি নাৰীশক্তিৰ নামত এই পয়েণ্ট উৎসৰ্গা কৰাটোত আমি অতিশয় সুখী।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ