বহুত কষ্টত ৰোহিত, আই পি এলৰ পাছতে হ’ব অপাৰেচন
শেহতীয়াকৈ ৰোহিত শৰ্মাই টেষ্ট কেৰিয়াৰৰ পৰা বিদায় লৈছে, ইতিমধ্যে টি-২০ ফৰ্মেটৰ পৰাও অৱসৰ লৈছে ক্ৰিকেটাৰগৰাকীয়ে। এনে পৰিস্থিতিত এতিয়া কেৱল এদিনীয়া মেচহে খেলিব ৰোহিতে। বৰ্তমান ‘হিটমেন’ আই পি এল ২০২৫ত মুম্বাইৰ হৈ খেলি আছে, য’ত তেওঁ ১১খন মেচত ৩০০ ৰান সংগ্ৰহ কৰিছে।
এতিয়া ৰাষ্ট্ৰীয় সংবাদ মাধ্যমৰ প্ৰতিবেদনত প্ৰকাশ পাইছে যে আই পি এল ২০২৫ শেষ হোৱাৰ পিছতে ৰোহিতৰ বাওঁ হেমষ্ট্ৰিঙৰ অস্ত্ৰোপচাৰ হ’ব পাৰে। যিহেতু ৰোহিতে এতিয়া কেৱল এদিনীয়া মেচহে খেলিব আৰু টিম ইণ্ডিয়াৰ পৰৱৰ্তী এদিনীয়া শৃংখলা বাংলাদেশৰ বিৰুদ্ধে, যিখন ১৭ আগষ্টৰ পৰা আৰম্ভ হ’ব।
৩ জুনত আইপিএল ২০২৫ৰ সামৰণি পৰিব আৰু তাৰ পিছত ৰোহিতে অস্ত্ৰোপচাৰৰ পৰা সুস্থ হ’বলৈ প্ৰায় ডেৰ-দুমাহ সময় পাব পাৰে।
যদি ৰোহিত শৰ্মাই ২০২৭ চনৰ বিশ্বকাপত খেলিব বিচাৰে, তেন্তে এইটোৱেই তেওঁৰ অস্ত্ৰোপচাৰৰ বাবে সৰ্বোত্তম সময়। অধিনায়কৰ দায়িত্বৰ বাবে ৰোহিতে বহু বছৰ ধৰি এই আঘাত কঢ়িয়াই লৈ ফুৰিছে, সময়ৰ অভাৱৰ বাবে এই অস্ত্ৰোপচাৰ কৰিব পৰা নাছিল। কিন্তু অৱসৰৰ পিছৰ সূচীয়ে তেওঁক অস্ত্ৰোপচাৰৰ পৰা সুস্থ হোৱাত সহায় কৰিব।
অৱশ্যে এই সন্দৰ্ভত ভাৰতীয় ক্ৰিকেট নিয়ন্ত্ৰণ ব’ৰ্ড বা ৰোহিত শৰ্মাৰ ফালৰ পৰা কোনো আনুষ্ঠানিক বিবৃতি প্ৰকাশ পোৱা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
