অসম লাইভ২৪ঃ হিন্দী ধাৰাবাহিকৰ জনপ্ৰিয় এটি চৰিত্ৰ হৈ ৰৈ গৈছে ‘তুলসী’ নামৰ চৰিত্ৰটো। ৮ বছৰ ধৰি চলা ১৮৩৩ টা খণ্ডৰ বিশেষ ধাৰাবাহিক ‘কিউ কি চাছ ভি কভি বহু থি’ ৰ মাধ্যমেৰে জনপ্ৰিয় অভিনেত্ৰী হৈ পৰিছিল স্মৃতি ইৰাণী। সেই বিশেষ ৮ বছৰেই গঢ়িছিল স্মৃতি ইৰাণীক। কিন্তু স্মৃতিৰ বাবে এই ৮ বছৰ সুখকৰ নাছিল। এই ধাৰাবাহিকৰ শ্বুটিং চলি থকাৰ সময়তে অনিচ্ছাকৃত গৰ্ভপাত হৈছিল স্মৃতিৰ। শ্বুটিংস্থলীৰ পৰা অটোৰিক্সাৰেই গৈ হাস্পতালত অকলেই ভৰ্তি হৈছিল স্মৃতি। এই বিশেষ ধাৰাবাহিকখন প্ৰযোজক একতা কাপূৰে সেই সময়ত স্মৃতিক কেনেদৰে কাম কৰোৱাইছিল?
স্মৃতি ইৰাণীৰ পৰিচয় কেৱল এগৰাকী অভিনেত্ৰী নহয়। বৰ্তমান তেওঁ এগৰাকী ৰাজনীতিবিদো। সম্প্ৰতি এক সাক্ষাৎকাৰত স্মৃতি ৰোমন্থন কৰি মন্ত্ৰী স্মৃতি ইৰাণীয়ে কয়, ‘ধাৰাবাহিকৰ শ্বুটিং চলি থকাৰ সময়ত মই অন্তঃসত্বা হৈছিলো। নিজেও গম পোৱা নাছিলো মই অন্তঃসত্বা। গা বেয়া স্বত্ত্বেও শ্বুটিঙলৈ আহিছিলো। কিন্তু হঠাতেই গা বেছি বেয়া হোৱাত মই অটো এখন লৈ হাস্পতাললৈ ৰাওনা হ’লো। ইতিমধ্যে মোৰ ৰক্তপাত হ’বলৈ আৰম্ভ হৈছিল। সেই পৰিস্থিতিো এগৰাকী নাৰ্চে মোক অটোগ্ৰাফ বিচাৰিছিল। তাৰমাজতে মই অট’গ্ৰাফ দিলো। মই লগে লগেই শৰীৰৰ অসুস্থতাৰ কথা খুলি ক’লো।’
সেই সময়ত ধাৰাবাহিকৰ সমান্তৰালভাৱে ‘কিউ কি’ৰ শ্বুটিং কৰি আছিল স্মৃতি ইৰাণীয়ে। শৰীৰৰ অৱস্থা অতিকৈ বেয়া হৈ যোৱাত ধাৰাবাহিকৰ পৰা এদিনৰ ছুটী বিচাৰিছিল স্মৃতি ইৰাণীয়ে। কিন্তু প্ৰযোজকে ছুটী দিয়াৰ সলনি কৈছিল, ‘কোনো অসুবিধা নাই, তুমি অকণমান দেৰীকৈ আহা কিন্তু আহা।’ স্মৃতিয়ে এই সন্দৰ্ভত কয়, ‘প্ৰকৃততে মোৰ অসুস্থতাৰ কথা বিশ্বাসেই কৰা নাছিল প্ৰযোজকে। মই ৰুগীয়া শৰীৰেৰেই শ্বুটিঙত উপস্থিত হৈছিলো। মই যদি শ্বুটিঙলৈ নগ’লোহেতেন তেন্তে মোক ধাৰাবাহিকখনৰ পৰা বাহিৰ কৰিয়েই দিলেহেতেন। তেতিয়া ভাৱ আহিছিল মই প্ৰমাণ হিচাপে নষ্ট হোৱা ভ্ৰুণটো দেখুওৱাবই লাগিছিল।’
স্মৃতিয়ে এই কথাখিনি কওঁতে কাৰো নাম লোৱা নাছিল। কাকো টাৰ্গেটো কৰি কথা কোৱা নাছিল স্মৃতিয়ে। বৰ্তমান একতা কাপুৰ আৰু স্মৃতি ইৰাণীৰ সম্পৰ্ক ভাল। ‘বালাজী টেলিফিল্মছ’ৰ মূল ব্যক্তি একতা কাপুৰৰ ঘৰত প্ৰায় প্ৰতিসময়তে উপস্থিত থাকে স্মৃতি। স্মৃতিৰ কন্যাৰ বিয়াতো দেখা গৈছিল একতা কাপুৰক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
