প্রধানমন্ত্ৰী মোদীৰ শপতগ্ৰহণ অনুষ্ঠানত অংশ ল’বলৈ দিল্লীলৈ আহিছে বাংলাদেশৰ প্ৰধানমন্ত্ৰী শ্বেখ হাছিনা৷ দেওবাৰে ৰাষ্ট্ৰপতি ভৱনত বিশেষ অনুষ্ঠানত ভাগ লৈ সোমবাৰে পুৱাই ছোনীয়া গান্ধীক লগ কৰিবলৈ ঢাপলি মেলে শ্বেখ হাছিনাই৷ দীৰ্ঘদিন পাছত লগ পাই ছোনীয়া গান্ধীক সাবটি ধৰিলে শ্বেখ হাছিনাই৷ বাংলাদেশৰ প্রধানমন্ত্ৰী আৰু কংগ্ৰেছ চেয়াৰপাৰ্ছনৰ এই ছবি ইতিমধ্যেই সামাজিক মাধ্যমত ভাইৰেল হৈ পৰিছে৷
শনিবাৰে ভাৰতলৈ আহিছে শ্বেখ হাছিনা৷ বৰ্তমান দিল্লীৰ আইটিছি মৌৰ্য হোটেলত আছে শ্বেখ হাছিনা৷ সোমবাৰে দুপৰীয়া তাতেই ছোনীয়াক সাক্ষাৎ কৰে হাছিনাই৷ কেৱল ছোনীয়াই নহয় ৰাহুল আৰু প্ৰিয়ংকাকো লগ কৰে হাছিনাই৷ দীৰ্ঘদিন পাছত বান্ধৱী ছোনীয়াক লগ পাই আনন্দত আত্মহাৰা হৈ পৰিছে শ্বেখ হাছিনা৷ গান্ধী পৰিয়ালক লগ নকৰাকৈ বাংলাদেশলৈ উভতি নাযায় শ্বেখ হাছিনাই৷ আহিলেই এবাৰ গান্ধী পৰিয়ালৰ সৈতে লগ কৰে হাছিনাই৷
উল্লেখ্য যে বিশ্বাস, সহযোগীতা আৰু পাৰস্পৰিক উন্নতিৰ প্ৰতিশ্ৰুতিৰ ওপৰত ভিত্তি কৰি ভাৰত আৰু বাংলাদেশৰ গভীৰ বন্ধুত্বৰ সম্পৰ্ক আছে৷ সেই সম্পৰ্কক জীয়াই ৰাখিবলৈকে মোদীৰ শপতগ্ৰহণলৈকো আহিছে হাছিনা৷ অৱশ্যে গান্ধী পৰিয়ালৰ সৈতে তেওঁৰ সম্পৰ্ক ঘৰুৱা৷ শাসনত থাকক বা নাথাকক এই সম্পৰ্ক অন্য এনাজৰীৰে গঁঠা৷ হাছিনাই পাহৰিব নোৱাৰে গান্ধী পৰিয়ালৰ সহায়৷ ৰাহুল, প্ৰিয়ংকাৰ আইতাকেই পাকিস্তানৰ নাগপাশৰ পৰা স্বাধীন কৰিছিল বাংলাদেশক৷ আনকি বংগ বন্ধু শ্বেখ মুজিবৰ ৰহমানৰ হত্যাকাণ্ডৰ পাছত কন্যা শেখ হাছিনা আৰু তেওঁৰ ভনীয়েকক নিৰাপদে ৰখাৰ দায়িত্বও লৈছিল ইন্দিৰা নেতৃত্বাধীন ভাৰত চৰকাৰে৷ সেই সুবাদতেই গান্ধী পৰিয়ালৰ সৈতে হাছিনাৰ সম্পৰ্ক একেবাৰেই ঘৰুৱা৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
