কোন হ’ব দেশৰ পৰৱৰ্তী উপ-ৰাষ্ট্ৰপতি! উপ-ৰাষ্ট্ৰপতি পদৰ নিৰ্বাচনী প্ৰক্ৰিয়া আৰম্ভ, শীঘ্ৰে জাৰি কৰা হ’ব অধিসূচনা
কোন হ’ব দেশৰ পৰৱৰ্তী উপ-ৰাষ্ট্ৰপতি! প্ৰাক্তন উপ-ৰাষ্ট্ৰপতি জগদীপ ধনখড়ে পদত্যাগ কৰাৰ পাছৰে পৰা উত্তপ্ত হৈ পৰিছে দেশৰ ৰাজনীতি। ৰাজনীতিৰ ভিতৰচৰাত উত্থাপিত হৈছে বহু কেইটা নাম। কিন্তু বহু নাম উত্থাপন হলেও নিৰ্বাচন প্ৰক্ৰিয়াৰ দ্বাৰাহে নিৰ্বাচিত হব উপ-ৰাষ্ট্ৰপতি।
এই সন্দৰ্ভত নিৰ্বাচন আয়োগে উপ-ৰাষ্ট্ৰপতি পদৰ নিৰ্বাচন সন্দৰ্ভত এক জাননী প্ৰদান কৰিছে। আয়োগে এখন প্ৰেছ নোট জাৰি কৰি কয় যে ‘২০২৫ চনৰ উপ-ৰাষ্ট্ৰপতি নিৰ্বাচনৰ সৈতে জড়িত সকলো প্ৰস্তুতি ইতিমধ্যে নিৰ্বাচন আয়োগে আৰম্ভ কৰিছে।
উল্লেখ্য যে, জগদীপ ধনখড়ে ২১ জুলাইৰ নিশা হঠাতে উপ-ৰাষ্ট্ৰপতি পদৰ পৰা পদত্যাগ কৰিছিল। ধনখড়ে তেখেতৰ পদত্যাগ কৰাৰ কাৰণ স্বাস্থ্যজনিত বুলি উল্লেখ কৰিছে।
উপ-ৰাষ্ট্ৰপতি পদ খালী হৈ পৰাত এতিয়া নিৰ্বাচন আয়োগে সেই পদৰ বাবে নিৰ্বাচন অনুষ্ঠিত কৰিব। নিৰ্বাচন আয়োগে সদৰি কৰা অনুসৰি, নিৰ্বাচনৰ সৈতে জড়িত সকলো প্ৰস্তুতি ইতিমধ্যে আৰম্ভ কৰিছে। নিৰ্বাচন কেতিয়াকৈ হ’ব সেই সন্দৰ্ভতো অতি শীঘ্ৰে ঘোষণা কৰা হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
