অসম লাইভ২৪ঃ এটাৰ পাছত আনটো কক্ষপথ অতিক্ৰম কৰিছে চন্দ্ৰযান-৩য়ে। চন্দ্ৰৰ দিশে সফলভাৱে আগুৱাইছে চন্দ্ৰযান-৩। মঙলবাৰে ইছৰোৰ তৰফৰ পৰা জনোৱা অনুসৰি পৃথিৱীৰ চতুৰ্থটো কক্ষপথত ভৰি দিছে চন্দ্ৰযান-৩য়ে। পৰিকল্পনা অনুযায়ী ৫,১৪,০০ কিঃমিঃ কক্ষপথ অতিক্ৰম কৰিছে চন্দ্ৰযান-৩য়ে। আগন্তুক ২৫ জুলাইৰ দুপৰীয়া ২ৰ পৰা ৩বজাৰ ভিতৰত পঞ্চম অৰ্থাৎ চূড়ান্ত কক্ষপথত ভৰি দিব এই মহাকাশযানখনে। এই এটা এটা কক্ষপথৰ ধাপ পাৰ হোৱা সহজ কথা নহয়। বহু বাধা অতিক্ৰমি এটা এটা কক্ষপথ পাৰ হৈছে চন্দ্ৰযান-৩।
কি কি বাধাৰ সন্মুখীন হৈছে চন্দ্ৰযান-৩?
১) প্ৰথমেই মধ্যাকৰ্ষণ বল। ভূ পৃষ্ঠ বা ভূপৃষ্ঠৰ কাষত অৱস্থিত কোনো বস্তুক পৃথিৱীৰ যি বলে আকৰ্ষণ কৰে সেই বলক কোৱা হয় মধ্যাকৰ্ষণ বল। এই বলৰ বাবেই ভূপৃষ্ঠৰ কিছু উপৰলৈ গৈ কোনো সামগ্ৰী এৰি দিলে সেই সামগ্ৰী তললৈ নিজেই নামি আহে। উদাহৰণস্বৰূপে বল এটা ওপৰলৈ দলিয়াই দিলে বলটো ওলোটি আহি পুনৰ মাটিত পৰে। মধ্যাকৰ্ষণ শক্তিয়ে টানিব নোৱাৰাকৈ চন্দ্ৰযান-৩য়ে ঘণ্টাত ৪০,২৩৩ কিঃমিঃ বেগত গতি কৰিব লগা হৈছে।
২) দ্বিতীয় সমস্যাটো হৈছে ছাবটমিক পাৰ্টিকেল বা উপ-পৰমাণু কণা। এই কণাসমূহ পৰমাণুতকৈয়ো সৰু কণা। পৰীক্ষাত পোৱা অনুসৰি এই আলোক কণাৰ সোঁত মহাকাশত আছে। এয়া এক প্ৰকাৰৰ বিকিৰণ। মহাকাশযানখনত এই কণাই বাৰে বাৰে আঘাত কৰে। সাধাৰণতে বায়ুমণ্ডলৰ নিউক্লিয়াছৰ সৈতে এই পাৰমাণৱিক কণা মিশ্ৰিত হৈ গৌণ কণাৰ সোঁতৰ সৃষ্টি কৰে। এই সোঁতে ছেটেলাইট বা মহাকাশযানৰ শৰীৰক প্ৰভাৱিত কৰে।
৩) তৃতীয়তে আকাশৰ বুকুত থকা জ্বলন্ত অগ্নিকুণ্ড সূৰ্য। সৌৰজগতৰ কেন্দ্ৰতেই আছে সূৰ্য। সূৰ্যৰ পৰা অহা তাপ, কণা আদিয়ে মহাকাশযানখনক ধ্বংস কৰিব পাৰে। শক্তিশালী ভূ-চুম্বকীয় সোঁত আৰু সৌৰ সোঁতে চেটেলাটকো কেতিয়াবা ধ্বংস কৰে। সেয়ে মহাকাশযানখনক ৰক্ষা কৰাৰ বাবে সতৰ্ক হোৱাটো প্ৰয়োজন।
৪) চতুৰ্থ হ’ল মহাশূন্যৰ ধূলি বা স্পেছ ডাষ্ট। মহাকাশযানখনক আঘাত কৰাৰ পাছতেই প্লাজমাত পৰিণত হয় এই ধূলি। উচ্চগতি আৰু সংঘৰ্ষৰ কাৰণে এই ঘটনা ঘটে। ইয়াৰ কাৰণে মহাকাশযানখনৰ ক্ষতি হ’ব পাৰে।
৫) মহাকাশলৈ বৰ্তমানলৈ বহু কৃত্ৰিম উপগ্ৰহ পঠিয়াইছে। কেতিয়াবা কেতিয়াবা পৃথিৱীৰ দিশেৰেও এই উল্কাপিণ্ডসমূহ আহে। বিগত কেইবাবছৰ ধৰি বহু কৃত্ৰিম উপগ্ৰহ পৃথিৱীলৈ পঠিয়াই থকা হৈছে। বহু নিষ্কিয় কৃত্ৰিম উপগ্ৰহেও পৃথিৱীক প্ৰদক্ষিণ কৰি আছে। এইসমূহৰ সৈতে চন্দ্ৰযানখনৰ সংঘৰ্ষ হোৱাৰো বহু আশংকা থাকে। ২০০৯ চনত তেনেকৈ নিষ্ক্ৰিয় কৃত্ৰিম উপগ্ৰহৰ খুন্দাতেই ইৰিডিয়াম চেটেলাইটটো ধ্বংস হৈ পৰিছিল।
৬) ভুল কক্ষপথত ভৰি দিয়া। যান্ত্ৰিক খেলিমেলিৰ বাবে যদি আমি পঠোৱা চেটেলাইট এটাই কক্ষপথ ভুল কৰে তেন্তে বিপৰ্যয় হ’ব পাৰে। এই ভুল পথে যোৱা যানখনক সহজে সঠিক পথলৈ আনিব পৰা নাযায়। এনেকৈ যোগা যান এখনক ঘূৰাই আনিবলৈ শক্তিও ব্যয় হয়। ফলত ইন্ধনৰ ঘাটি আহে। এই অৱস্থাত দ্ৰুতভৱে মিছনটোক সমাপ্ত কৰি দিয়া হয়।
৭) চন্দ্ৰযান-৩ ৰ যাত্ৰাপথ যথেষ্ট দীৰ্ঘ। এই দীৰ্ঘ যাত্ৰাপথত তাপমাত্ৰাত হ্ৰাস বৃদ্ধি, গতিৰ বঢ়া-কমা, বিকিৰণ ইত্যাদি বিষয়সমূহৰ বাবে মহাকাশযানখনৰ ভিতৰৰ অংশসমূহ প্ৰভাৱিত হ’ব পাৰে। এক বা একাধিক অংশ ঠিকে নাথাকিবও পাৰে। গ্ৰাউণ্ড ষ্টেচনৰ সৈতে সংযোগ বিচ্ছিন্ন হোৱাৰো আশংকা থাকে।
৮) ভু পৃষ্ঠৰ পৰা ওপৰৰ ফালে উচ্চতা বাঢ়ি যোৱাৰ লগে লগে হ্ৰাস পায় বায়ুমণ্ডলৰ তাপমাত্ৰা। দিনৰ ভাগত সূৰ্যৰ তাপমাত্ৰা ১০০ডিগ্ৰী ছেলচিয়াছলৈ যাব পাৰে। একেসময়তে নিশাৰ ভাগত এই তাপমাত্ৰা ১০০ ডিগ্ৰী ছেলচিয়াছৰ তললৈ আহে। চন্দ্ৰযান-৩য়ে তাপমাত্ৰা সহ্য কৰিব নোৱাৰি ধ্বংস হোৱাৰো আশংকা থাকে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
