অসম লাইভ২৪ঃ এজন ব্যক্তিয়ে চিগাৰেট হুঁপি হুঁপি ফুটপাথত বহি থকা এজন আদিবাসী যুৱকৰ গাত প্ৰস্ৰাৱ কৰিছে। গাত প্ৰস্ৰাৱ কৰি দিয়াৰ ভিডিঅ’ এতিয়া সমগ্ৰতে ভাইৰেল। জাতিবিদ্বেষৰ এই নমুনা দেখি শিয়ৰি উঠিছে দেশবাসী। মধ্যপ্ৰদেশৰ ছিধি জিলাত এই ঘটনা সংঘটিত হৈছে। এই ঘটনাৰ পাছতেই মধ্যপ্ৰদেশৰ ছিধি সদৰ আৰক্ষীয়ে গ্ৰেপ্তাৰো কৰিছে বিজেপি নেতাগৰাকীক। ইতিমধ্যে গ্ৰেপ্তাৰৰ পাছতেই বিজেপি নেতাগৰাকীৰ মত, এই ভিডিঅ’ ভুৱা। তেওঁ এনে কোনো অপৰাধ কৰা নাই।
দুদিন ধৰি সামাজিক মাধ্যমত ভাইৰেল হৈ আছে এই ভিডিঅ’। এই ভিডিঅ’ ভাইৰেল হোৱাৰ পাছতেই অস্বস্তিত পৰিছে মধ্যপ্ৰদেশ বিজেপি চৰকাৰো। কাৰণ বিৰোধীয়েও এই বিষয়টোক লৈ মুখ খুলিছে। বিৰোধীৰ মত, ‘বিজেপিৰ শাসনকালত আদিবাসী ভাই-ভনীসকলৰ ওপৰত অত্যাচাৰ বাঢ়িছে। মধ্যপ্ৰদেশৰ এই কাণ্ড মানৱীয় কাম হ’ব নোৱাৰে। বিজেপিয়ে আদিবাসী আৰু দলিতসকলৰ প্ৰতি পুহি ৰখা ঘৃণাৰহে এই বহিঃপ্ৰকাশ।’
ভাইৰেল ভিডিঅ’ৰ অভিযুক্তগৰাকীৰ নাম প্ৰৱেশ শুক্লা। প্ৰৱেশ শুক্লা হৈছে বিজেপিৰ MLAৰমাকান্ত শুক্লাৰ পুত্ৰ। আনহাতে নিৰ্যাতিত আদিবাসী ব্যক্তিগৰাকীৰ নাম দশমত ৰাভত। বয়স ৩৬ বছৰ। ব্যক্তিগৰাকীকো আৰক্ষীয়ে ইতিমধ্যে সদৰ থানালৈ মাতি ঘটনা সন্দৰ্ভত সোধপোছ কৰিছে। ব্যক্তিগৰাকীক সোধপোছ কৰাৰ পাছতেই মঙলবাৰে নিশা প্ৰায় ২বজাত আৰক্ষীয়ে প্ৰৱেশক গ্ৰেপ্তাৰ কৰিছে। প্ৰৱেশৰ বিৰুদ্ধে নেশ্ব্যনেল ছিকিউৰিটি এক্ট, এছচি, এছ টি এক্টসহ ভাৰতীয় দণ্ডবিধিক একাধিক ধাৰাত তেওঁৰ বিৰুদ্ধে গোচৰ ৰুজু হৈছে। অভিযুক্ত প্ৰৱেশৰ বিধায়ক পিতৃকো জেৰা কৰিছে আৰক্ষীয়ে। বিষয়টোক লৈ মধ্যপ্ৰদেশৰ মুখ্যমন্ত্ৰী শিৱৰাজ সিং চৌহানে অভিযুক্তৰ বিৰুদ্ধে নেশ্ব্যনেল চিকিউৰিটি এক্ট লগোৱাৰ বাবে নিৰ্দেশ দিছে প্ৰশাসনক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
