প্ৰয়াগৰাজ মহাকুম্ভ মেলাৰ সময়ত ভাইৰেল হৈ পৰা মনালিছা ভোছলেই বিবাহপাশত আৱদ্ধ হৈছে৷ মুছলমান যুৱক ফৰমান খানৰ সৈতে বিয়াত বহিছে মনালিছা৷ কিন্তু বিবাহ সম্পন্ন হ’লেও বিতৰ্কই লগ এৰা নাই মনালিছাৰ৷ বিবাহৰ ফটো ভাইৰেল হোৱাৰ পাছৰে পৰাই এই বিবাহক লৈ বিভিন্নজনে বিভিন্ন ধৰণে আপত্তি দেখুৱাই আহিছে৷ কোনোৱে যদি ধৰ্মক লৈ প্ৰশ্ন তুলিছে, কোনোৱে আকৌ প্ৰশ্ন তুলিছে বয়সক লৈ৷ শেহতীয়াকৈ এই বিতৰ্কই পাইছেগৈ আইনৰ কাষ৷ কাৰণ ভাৰতীয় আইন অনুসৰি এগৰাকী কন্যাই ১৮ বছৰৰ পূৰ্বে বিবাহত বহাটো অপৰাধ৷ আৰু মনালিছাৰো বয়স বহুজনেই ১৮ বছৰ সম্পূৰ্ণ হোৱা নাই বুলি দাবী কৰিছে৷
ফৰমান খানৰ সৈতে বিবাহপাশত আবদ্ধ হৈছে মনালিছা
১১ মাৰ্চত কেৰালাত উত্তৰ প্ৰদেশৰ বাসিন্দা ফৰমান খানক বিয়া কৰাই মনালিছাই সংবাদ শিৰোনাম দখল কৰিছে৷ তিৰুৱনন্তপুৰমৰ অৰুমানুৰ নাইনাৰ মন্দিৰত অনুষ্ঠিত হোৱা এই বিয়াখনে বহুসংখ্যক লোকৰে দৃষ্টি আকৰ্ষণ কৰিছিল৷ বিশেষকৈ তেওঁৰ পৰিয়ালে এই বিবাহক “প্ৰেম জেহাদ” বুলিও অভিযোগ কৰিছিল৷
বিয়াৰ সময়ত দাবী – মনালিছাৰ বয়স আছিল ১৮ বছৰ
টাইমছ অৱ ইণ্ডিয়াত প্ৰকাশিত বাতৰি অনুসৰি, বিবাহৰ সময়ত মনালিছা আৰু ফৰমানে দাবী কৰিছিল যে মনালিছাৰ বয়স ১৮ বছৰ আৰু এইটো এই বিবাহৰ সিদ্ধান্তও দুয়োৰে নিজৰ৷ দুয়োৰেই এই বিবাহত মত আছে৷ দুয়োৰে বিবাহত মত থাকিলেও পৰিয়াল আৰু বিশ্ব হিন্দু পৰিষদে আপত্তি কৰে। তেওঁলোকে অভিযোগ কৰে যে মনালিছা নাবালিকা আৰু সেয়া লাভ জেহাদৰ গোচৰ হ’ব পাৰে।
জন্মৰ প্ৰমাণ পত্ৰ অনুসৰি মনালিছাৰ প্ৰকৃত বয়স ১৬ বছৰ ২ মাহ
লাভ জেহাদ বুলি দাবী কৰি থকা পৰিয়ালে মধ্যপ্ৰদেশ আৰক্ষীত এজাহাৰ দাখিল কৰিছে। প্ৰথম অৱস্থাত বয়সক লৈ বিবাদ হৈছিল যদিও মনালিছাই সংবাদমেলত নিজকে প্ৰাপ্তবয়স্ক বুলি ঘোষণা কৰিছিল। ৰাষ্ট্ৰীয় অনুসূচিত জনজাতি আয়োগৰ তদন্তত এটা উল্লেখযোগ্য সত্য পোহৰলৈ আহিছে। মধ্যপ্ৰদেশৰ জন্মৰ প্ৰমাণ পত্ৰ অনুসৰি মনালিছাৰ প্ৰকৃত বয়স ১৬ বছৰ ২ মাহ।
POCSO আইনৰ অধীনত ফৰমান খানৰ বিৰুদ্ধে FIR ৰুজু
২০০৯ চনৰ ডিচেম্বৰ মাহত জন্ম হোৱা বুলি কোৱা মনালিছা বিবাহৰ সময়ত নাবালিকাই আছিল। এই তথ্যৰ পিছতে মহেশ্বৰ থানাত যৌন অপৰাধৰ পৰা আদি কৰি শিশু সুৰক্ষা (POCSO) আইনৰ অধীনত ফৰমান খানৰ বিৰুদ্ধে FIR ৰুজু কৰা হৈছে। SC/ST (Prevention of Atrocities) Act আৰু অপহৰণৰ অধীনতো ধাৰা জাৰি কৰা হৈছে।
বয়সৰ প্ৰমাণৰ নথি-পত্ৰৰ বাবে অনুৰোধ
আৰক্ষীয়ে এতিয়া দুয়োপক্ষৰ পৰা বয়স সম্পৰ্কীয় নথি-পত্ৰ বিচাৰিছে। মনালিছাৰ পৰিয়ালৰ দাবী ফৰমান খানে ছবিৰ প্ৰতিশ্ৰুতিৰে মনালিছাক প্ৰলোভিত কৰিছিল। মনালিছা আৰু ফৰমানে কয় যে তেওঁলোকে ফেচবুকত লগ পাইছিল আৰু প্ৰেমত পৰে তাৰপিছতেই বিবাহ কৰে দুয়োৱে৷ কিন্তু যদিহে মনালিছা নাবালিকা বুলি প্ৰমাণিত হয় তেন্তে বিবাহক অবৈধ বুলি গণ্য কৰা হ’ব আৰু শিশু বিবাহ নিষেধাজ্ঞা আইন প্ৰযোজ্য হ’ব। মধ্য প্ৰদেশৰ ডিজিপিলৈ এনচিএছটিয়ে বয়সৰ নথি অচিৰেই জমা দিবৰ বাবে নিৰ্দেশ প্ৰদান কৰিছে৷
হিন্দু ৰীতি-নীতি অনুসৰি বিবাহ
প্ৰয়াগৰাজ মহাকুম্ভ ২০২৫ত ৰুদ্ৰাক্ষ আৰু মালা বিক্ৰী কৰা মনালিছা তেওঁৰ সুন্দৰ চকু আৰু হাঁহিৰ বাবে “কুম্ভ মেলাৰ মোনালিছা” উপনাম লাভ কৰে। ২০২৬ চনৰ মাৰ্চ মাহত হিন্দু ৰীতি-নীতি অনুসৰি বিবাহপাশত আবদ্ধ হয় এই দম্পতীহাল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
