অসম লাইভ২৪ঃ জুবিন গাৰ্গৰ অনুৰাগী তেওঁ। এটা দুটা নহয়, জুবিন গাৰ্গৰ ৯৯ টা গীত মুখস্ত লটিফুলৰ। নলবাৰীৰ দৃষ্টিহীন যুৱক লটিফুলৰ এটাই হেঁপাহ, জুবিন গাৰ্গৰ সৈতে একেলগে একেখন মঞ্চত গীত পৰিবেশন কৰা। ২৭ বছৰীয়া যুৱক লটিফুলে মোবাইল আৰু ৰেডিঅ’ত গীত শুনিয়েই জুবিন গাৰ্গৰ ৯৯ টা জনপ্ৰিয় গীত মনত ৰাখিছে।
মুখ্যমন্ত্ৰী হিমন্তবিশ্ব শৰ্মাক ডাঙৰ মামা আৰু নলবাৰীৰ বিধায়ক জয়ন্ত মল্ল বৰুৱাক সৰুমামা বুলিও মানি আহিছে লটিফুলে। নলবাৰী জিলাৰ ঘাগ্ৰাপাৰ ৰাজহ চক্ৰৰ অন্তৰ্গত নাৰপাৰা গাঁওৰ এগৰাকী শাৰীৰিকভাৱে অক্ষম প্ৰতিভাবান যুৱক লটিফুল। পিতৃ ৰহমান আলী আৰু মাতৃ চুৰিয়া বেগমৰ সন্তান লটিফুল বসন্ত জনিত কাৰণত জন্মৰ ১৫ দিন পিছৰ পৰা দুই চকুৰে নেদেখা হৈ পৰে। সেইসময়ত পৰিয়ালে বিভিন্ন ঠাইত চিকিৎসা কৰিছিল যদিও লটিফুলে দৃষ্টিশক্তি পুনৰ ঘুৰাই নাপালে।
দৃষ্টিহীন লটিফুলে সৰুৰে পৰা গীত গাই ভাল পাই। অসমৰ জনপ্ৰিয় কন্ঠশিল্পী জুবিন গাৰ্গক ভালপাই লটিফুলে। ৰেডিঅ’ আৰু মোবাইলত শুনি শুনি মুখস্থ কৰিছে অসমৰ জনপ্ৰিয় কন্ঠশিল্পী তথা যুৱপ্ৰজন্মৰ হাৰ্টথ্ৰ’ব জুবিন গাৰ্গৰ ৯৯ টাকৈ গীত। এবাৰ জুবিন গাৰ্গক কাষৰ পৰা চুই চোৱাৰো হেঁপাহ লটিফুলৰ। লটিফুলে কোৱা মতে যদি জুবিন গাৰ্গে তেওঁক অকণমান সহায় কৰি তেওঁৰ লগত একেখন মঞ্চত গীত পৰিৱেশনৰ সুবিধা কৰি দিয়ে তেওঁ অত্যন্ত সুখী হব। কিন্তু দুখ আৰু পৰিতাপৰ কথা এই যে শাৰীৰিক ভাৱে অক্ষম লটিফুলে আজিও কোনো চৰকাৰী বিকলাংগ আঁচনি লাভ নকৰিলে।
লটিফুলে মাহিলী যি দিব্যাংগ পেঞ্চন ১০০০ টকাকৈ লাভ কৰে সেই ধনেৰেই পত্নী আৰু পৰিয়াল চলাত অসুবিধা হোৱাৰ কথাও প্ৰকাশ কৰিছে লটিফুলে। শাৰীৰিক ভাৱে অক্ষম লটিফুলে বৰ্তমানলৈ লাভ কৰা নাই প্ৰধানমন্ত্ৰী আৱাস যোজনাৰ গৃহও। লটিফুলে সংবাদমাধ্যমৰ আগত কয় যে, কোনোৱে যদি লটিফুলক গীত গাবলৈ মাতিব বিচাৰে তেন্তে 8134852301 নম্বৰত যোগাযোগ কৰিব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
