অসম লাইভ২৪ঃ নিজ গৃহতে ১০৩ বিধ বাদ্যযন্ত্ৰ সংৰক্ষণ কৰি চৰ্চাত চৰাইদেউৰ অজিত গগৈ। অসমীয়া লোক সংস্কৃতিৰ পৰা প্ৰায় বিলুপ্ত হোৱা ১০৩ বিধ আপুৰুগীয়া বাদ্যযন্ত্ৰ নিজ গৃহতে সংৰক্ষণ কৰিছে চৰাইদেউৰ ভোগবাৰি গাঁৱৰ অজিত গগৈ নামৰ লোকজনে। জলকাহ, টেং টেং,আনন্দ লহৰী, খনজুৰি, জয় ঢোল, ৰামতাল,আদিকে কৰি ১০৩ বিধ অসমীয়া লোক সংস্কৃতিৰ বাদ্যযন্ত্ৰ সংৰক্ষণ কৰাৰ লগতে সুন্দৰ ভাৱে পৰিবেশন কৰে ওজা অজিত গগৈয়ে। অসম ঢুলীয়া শিল্পী সন্মিলনৰ প্ৰধান সম্পাদকৰ দৰে গধুৰ দায়িত্ব পালন কৰিও অজিত গগৈয়ে সংৰক্ষণ কৰিছে এই সমূহ আপুৰুগীয়া সম্পদ।
লক্ষ্য বিশ্ব দৰবাৰত অসমৰ এই লুপ্তপ্ৰায় আপুৰুগীয়া বাদ্যযন্ত্ৰ সমূহ চিনাকি কৰি দিয়াৰ,যাৰ বাবে অজিত গগৈক লাগে চৰকাৰৰ কিছু সদিচ্ছা। বাদ্যযন্ত্ৰ সংৰক্ষণৰ ওপৰিও অজিত গগৈয়ে অসমৰ বিভিন্ন প্ৰান্তত ঢোলৰ প্ৰশিক্ষণ প্ৰদান কৰে। নিজৰ বাসগৃহটো অজিত গগৈয়ে ঢোলৰ লগতে বিলুপ্তপ্ৰায় এই বাদ্যযন্ত্ৰ সমূহ বজোৱাৰ শিক্ষা প্ৰদান কৰে। অনাগত দিনত অসমীয়া লোক সংস্কৃতিৰ লগত জড়িত আৰু দহ বিধ বাদ্যযন্ত্ৰ সংৰক্ষণ কৰাৰ কথা জনাই অজিত গগৈয়ে।প্ৰায় ১১৩ বিধ বাদ্যযন্ত্ৰ সংৰক্ষণ কৰি অনাগত দিনত বিশ্ববাসীৰ আগত চিনাকি কৰি দিয়াৰ সপোন পুহি ৰাখিছে অজিত গগৈয়ে, কিন্তু ইয়াৰ বাবে চৰকাৰী কিছু সাহায্যৰ প্ৰয়োজন। অজিত গগৈয়ে বিচাৰিছে চৰকাৰৰ অকণমান মনোযোগো।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
