বৰপেটাত জীয়ৰীৰ বিয়াৰ দিনাই ৰভাতলিত পিতৃৰ নিথৰ দেহ, উৰুলিৰ সলনি কান্দোনৰ ৰোল
বৰপেটাৰ সৰভোগত অতিকে মৰ্মান্তিক ঘটনা, কন্যাৰ বিয়াৰ দিনাই কৰুণ মৃত্যুক সাৱটিলে পিতৃয়ে। কন্যাৰ বিয়াৰ ৰভাতলিত পৰি ৰল পিতৃৰ নিথৰ দেহ। ক্ষন্তেকতে হেৰাই গল বিয়া ঘৰৰ সকলো হাঁহি-ফুৰ্তি। তাৰ ঠাই ল’লে ৰাউচি জোৰা কান্দোন।
আজি আঘোণ মাহৰ ১৬ তাৰিখ ২ ডিচেম্বৰ, শান্তি দাসৰ কন্যা নিশিতা দাসৰ আজি শুভ বিবাহ। দুখীয়া পৰিয়ালটোৱে আত্মীয়-কুটুম্বৰ পৰা সহায় লৈ কোনোমতে বিয়াৰ আয়োজন কৰিছিল। কিন্তু নিষ্ঠুৰ নিয়তিৰ কি পৰিহাস। যোৱা কালি ১ ডিচেম্বৰ তাৰিখে নলবাৰীৰ কৈঠালকুছীৰ প্ৰাঞ্জল বৰ্মনে জোৰণ দি যোৱাৰ পিছতে নিশা অসুস্থ হৈ পৰে কইনাৰ দেউতাক শান্তি দাস।
পৰিয়ালে নিশাই সৰভোগ সমূহীয়া স্বাস্থ্য কেন্দ্ৰত ভৰ্তি কৰে যদিও উন্নত চিকিৎসাৰ বাবে চিকিৎকে বৰপেটা মেডিকেল কলেজ হাস্পতাললৈ প্ৰেৰণ কৰে। কিন্তু বৰপেটা মেডিকেল কলেজ হাস্পতালত চিকিৎসা আৰম্ভ কৰাৰ পিছতে নিষ্ঠুৰ নিয়তিৰ ওচৰত হাৰ মানে শান্তি দাসে। লগে লগে ঘৰত খনত হুৱাদুৱা লাগি যায়। মুহুৰ্ততে সকলোফালে কান্দোনৰ ৰোল।
অতিকে দৰিদ্ৰ পৰিয়ালটোৰ একমাত্ৰ উপাৰ্জনকাৰী আছিল শান্তি দাস, যিয়ে সৰভোগ বজাৰৰ এটি সৰু কোঠাত কাপোৰ ইষ্ট্ৰী কৰি কোনোমতে পৰিয়াল পোহপাল দিছিল।
কন্যাৰ বিয়া উপলক্ষে পৰিয়ালটোৱে কোনোমতে আত্মীয় কুটুমৰ পৰা সহায় ভিক্ষা বিচাৰি বিবাহৰ যা-যোগাৰ কৰিছিল। কিন্তু নিয়তিৰ নিষ্ঠুৰ পৰিহাস, পিতৃৰ জীৱনৰ অন্তিমটো ইচ্ছা, তথা অতিকে হেঁপাহ কৰা কন্যাদানৰ দায়িত্ব পালন কৰাৰ দিনাই ইহ লোক ত্যাগ কৰে।
বিবাহৰ কইনা বিদায়ৰ পৰিৱৰ্তে আজিৰ দিনটোত পিতৃক চাঙীত তুলি শ্মশানলৈ গাঁৱৰ ৰাইজে। যি দৃশ্যই এতিয়া কেৱল পৰিয়ালটোকেই নহয় সমগ্ৰ গাঁওখনতে শোকৰ বন্যা বোৱাইছে। পুৱা বিবাহৰ ৰভাথলীত দেউতাকৰ মৃতদেহৰ ওচৰত আয়তিৰ উৰুলিৰ পৰিবৰ্তে কান্দোনৰ ৰোল। কালি
ইপিনে নলবাৰীৰ কৈঠালকুছী নিবাসী দৰা প্ৰাঞ্জল বৰ্মণৰ বাসগৃহত কাইলৈ বিবাহৰ অভ্যৰ্থনা অনুষ্ঠান। সেয়ে আজি কইনাৰ পিতৃ শান্তি দাসৰ শেষকৃত্যৰ পাছতে দৰা ঘৰৰ লোকে কইনা ঘৰৰ লগত সহমতিৰে জোৰোণ পিন্ধাই যোৱা কইনা নিশিতাক লৈ যায়। দৰা ঘৰতে বিয়া সম্পন্ন হব নিশিতাৰ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
