ডিব্ৰুগড়ৰ আগশাৰীৰ শিক্ষানুষ্ঠান ডনবস্কো হাইস্কুলত সপ্তম শ্ৰেণীৰ শিক্ষাৰ্থীৰ মাজত এক বিপজ্জনক আচৰণৰ ঘটনা পোহৰলৈ অহাক লৈ চাঞ্চল্যৰ সৃষ্টি হৈছে। অভিযোগ অনুসৰি, কেইবাগৰাকীও শিক্ষাৰ্থীয়ে পেন্সিল শ্বাৰ্পনাৰৰ ভাঙি যোৱা অংশ বা ব্লে*ড সদৃশ সামগ্ৰীৰে নিজৰ হাতত আঁচোৰ বা কটাৰ দৰে দাগ সৃষ্টি কৰিছিল। ঘটনাটোক কেন্দ্ৰ কৰি অভিভাৱকসকলৰ মাজতো উদ্বেগ বৃদ্ধি পাইছে। জানিব পৰা মতে, এই ঘটনাৰ সৈতে জড়িত বুলি সন্দেহ কৰা মুঠ ১২গৰাকী শিক্ষাৰ্থীক চিনাক্ত কৰা হৈছে। ইয়াৰে ৮গৰাকী ছাত্ৰী আৰু ৪জন ছাত্ৰ। প্ৰথমে দুগৰাকী শিক্ষাৰ্থীয়ে বিষয়টো এগৰাকী শিক্ষকক অৱগত কৰাৰ পাছতেই ঘটনাটো বিদ্যালয় কৰ্তৃপক্ষৰ দৃষ্টিগোচৰ হয়।
ঘটনাৰ খবৰ লাভ কৰাৰ পাছত বিদ্যালয় কৰ্তৃপক্ষই অভিভাৱকসকলক বিষয়টো অৱগত কৰাৰ লগতে শিক্ষাৰ্থীসকলৰ চিকিৎসাৰ ব্যৱস্থা কৰে। চিকিৎসকৰ পৰামৰ্শ অনুসৰি টিটেনাছৰ বে*জীসহ প্ৰাথমিক চিকিৎসা প্ৰদান কৰা হয়। জানিব পৰা মতে, কেইগৰাকীমান শিক্ষাৰ্থীৰ হাতত আঁচোৰৰ দৰে দাগ দেখা গৈছে যদিও কোনো শিক্ষাৰ্থীৰ ৰ*ক্তস্ৰাৱ হোৱা নাই আৰু চিলাই কৰাৰ প্ৰয়োজন হোৱা নাই।
ঘটনাটোৰ আঁৰত কোনো অনলাইন গেম বা ছ’চিয়েল মিডিয়াত বিয়পি পৰা বিপজ্জনক ‘চেলেঞ্জ’ৰ প্ৰভাৱ আছিল নেকি, তাক লৈও প্ৰশ্ন উত্থাপন হৈছে। একাংশ অভিভাৱক আৰু সচেতন মহলে শিক্ষাৰ্থীসকলৰ মাজত কোনো অনলাইন গেম বা প্ৰত্যাহ্বানমূলক কনটেণ্টে এনে আচৰণৰ সৃষ্টি কৰিব পাৰে বুলি সন্দেহ প্ৰকাশ কৰিছে। অৱশ্যে, ঘটনাটোৰ আঁৰত কোনো নিৰ্দিষ্ট মোবাইল গেম বা অনলাইন চেলেঞ্জ জড়িত থকাৰ কথা বৰ্তমানলৈকে নিশ্চিত হোৱা নাই। তদন্ত সম্পূৰ্ণ হোৱাৰ পাছতহে এই বিষয়ে স্পষ্ট ছবি পোহৰলৈ আহিব।
আনহাতে, অভিভাৱকৰ একাংশই অভিযোগ কৰিছে যে সপ্তম শ্ৰেণীৰ এগৰাকী শিক্ষাৰ্থীয়ে আন ছাত্ৰ-ছাত্ৰীক এনে কাম কৰিবলৈ প্ৰভাৱিত বা উৎসাহিত কৰিছিল। কোনো কোনো অভিভাৱকে আনকি আন শিক্ষাৰ্থীক হাত কা*টিবলৈ বাধ্য কৰোৱাৰ অভিযোগো উত্থাপন কৰিছে। অৱশ্যে এই অভিযোগসমূহৰ সত্যতা এতিয়াও তদন্তাধীন।
ইফালে, ঘটনাটোত ব্লে*ড ব্যৱহাৰ কৰা হোৱা নাই বুলি বিদ্যালয় কৰ্তৃপক্ষই দাবী কৰিছে। বিদ্যালয়ৰ ফালৰ পৰা এই দাগ কোনো ব্লে*ডৰ ফলত নহয়, বৰং প্লাষ্টিকৰ সামগ্ৰীৰে হোৱা বুলি মন্তব্য কৰা হৈছে। কিন্তু বিদ্যালয় কৰ্তৃপক্ষৰ এই বক্তব্যক লৈ একাংশ অভিভাৱকৰ মাজত অসন্তুষ্টিৰ সৃষ্টি হৈছে। ঘটনাটোৰ প্ৰকৃত কাৰণ কি, শিক্ষাৰ্থীসকলৰ মাজত এই আচৰণ কেনেকৈ বিয়পি পৰিল আৰু ইয়াৰ আঁৰত কোনো বাহ্যিক বা অনলাইন প্ৰভাৱ আছে নেকি—সেই বিষয়ে সম্পূৰ্ণ তদন্তৰ দাবী উত্থাপন কৰিছে অভিভাৱকসকলে।
ঘটনাটোৰ গুৰুত্ব বিবেচনা কৰি ডিব্ৰুগড় জিলা প্ৰশাসনেও বিষয়টোত হস্তক্ষেপ কৰিছে। জানিব পৰা মতে, জিলা আয়ুক্ত বিক্ৰম কৈৰীৰ নেতৃত্বত ঘটনাটোৰ তদন্ত আৰম্ভ কৰা হৈছে। তদন্তকাৰী দলটোৱে শিক্ষাৰ্থীসকলৰ সৈতে কথা পতাৰ লগতে তেওঁলোকৰ শাৰীৰিক পৰীক্ষা কৰে। লগতে ঘটনাৰ সময়ত শ্ৰেণীকোঠাত প্ৰকৃততে কি ঘটিছিল, সেই বিষয়ে জানিবলৈ চিচিটিভি ফুটেজো পৰীক্ষা কৰা হৈছে।
তদন্তত শিক্ষাৰ্থীসকলৰ বক্তব্য, বিদ্যালয় কৰ্তৃপক্ষৰ ভূমিকা, ঘটনাটোৰ প্ৰকৃত কাৰণ আৰু কোনো বাহ্যিক প্ৰভাৱৰ ফলত শিক্ষাৰ্থীসকলে এনে আচৰণ কৰিছিল নেকি—এই সকলো দিশ পৰীক্ষা কৰা হ’ব বুলি জানিব পৰা গৈছে। বৰ্তমান ঘটনাটোৰ তদন্ত অব্যাহত আছে। অনলাইন গেম, ‘চেলেঞ্জ’ নে আন কোনো কাৰণত এই ঘটনা সংঘটিত হৈছিল, সেয়া তদন্ত সম্পূৰ্ণ হোৱাৰ পাছতহে নিশ্চিত হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
