১ আগষ্ট, ২০২৬ৰ পৰা দেশজুৰি কাৰ্যকৰী হ’বলৈ গৈ আছে কেইবাটাও গুৰুত্বপূৰ্ণ নিয়ম। নতুন মাহৰ আৰম্ভণিৰ সৈতে LPG গেছ চিলিণ্ডাৰৰ মূল্য পুনৰ নিৰ্ধাৰণ, আয়কৰ ৰিটাৰ্ণ দাখিলৰ সময়সীমাৰ অন্ত, ভাৰতীয় ৰিজাৰ্ভ বেংকৰ মুদ্ৰানীতি সমিতিৰ বৈঠক আৰু Tatkal ৰে’ল টিকট বুকিঙৰ নতুন ব্যৱস্থা—এই সকলোবোৰে প্ৰত্যক্ষ বা পৰোক্ষভাৱে সাধাৰণ মানুহৰ দৈনন্দিন জীৱন আৰু ব্যয়ত প্ৰভাৱ পেলাব পাৰে।
তলত জানি লওক ১ আগষ্টৰ পৰা কি কি সলনি হ’ব—
১. LPG চিলিণ্ডাৰৰ নতুন মূল্য ঘোষণা হ’ব পাৰে
প্ৰতি মাহৰ প্ৰথম দিনা তেল বিপণন কোম্পানীসমূহে ঘৰুৱা আৰু বাণিজ্যিক LPG গেছ চিলিণ্ডাৰৰ মূল্য পুনৰীক্ষণ কৰে। সেই অনুসৰি ১ আগষ্টতো নতুন মূল্য ঘোষণা হোৱাৰ সম্ভাৱনা আছে। যদি মূল্য বৃদ্ধি পায়, তেন্তে ৰান্ধনীঘৰৰ ব্যয় বৃদ্ধি পাব। আনহাতে, মূল্য হ্ৰাস পালে কিছু সকাহ লাভ কৰিব গ্ৰাহকসকলে।
২. ITR দাখিলৰ সময়সীমা শেষ
এতিয়াও যদি আপুনি ২০২৫-২৬ বিত্তীয় বৰ্ষৰ আয়কৰ ৰিটাৰ্ণ (ITR) দাখিল কৰা নাই, তেন্তে এতিয়াই সাৱধান হোৱাৰ সময়। নিৰ্ধাৰিত সময়সীমা পাৰ হোৱাৰ পিছত ৰিটাৰ্ণ দাখিল কৰিলে বিলম্ব মাচুল, সুত আৰু আন আইনী জটিলতাৰ সন্মুখীন হ’ব লাগিব পাৰে। সেয়েহে শেষ মুহূৰ্তলৈ অপেক্ষা নকৰি সময়মতে ITR দাখিল কৰাটো বাঞ্ছনীয়।
৩. RBIৰ MPC বৈঠকৰ ওপৰত সকলোৰে দৃষ্টি
১ আগষ্টৰ পিছতে অনুষ্ঠিত হ’ব ভাৰতীয় ৰিজাৰ্ভ বেংকৰ (RBI) মুদ্ৰানীতি সমিতি (MPC)ৰ বৈঠক। এই বৈঠকত ৰেপ’ ৰেট সম্পৰ্কে গুৰুত্বপূৰ্ণ সিদ্ধান্ত লোৱা হ’ব পাৰে।
যদি ৰেপ’ ৰেটত পৰিবৰ্তন কৰা হয়, তেন্তে গৃহ ঋণ, বাহন ঋণ, EMI আৰু স্থায়ী আমানত (FD)ৰ সুতৰ হাৰৰ ওপৰত ইয়াৰ প্ৰভাৱ পৰিব পাৰে।
৪. Tatkal টিকট বুকিঙত নতুন নিয়ম
ৰে’ল যাত্ৰীসকলৰ বাবে ১ আগষ্টৰ পৰা Tatkal টিকট বুকিং ব্যৱস্থাত ডাঙৰ পৰিবৰ্তন আহিব। ভুৱা বুকিং আৰু টিকটৰ ক’লা বজাৰ ৰোধ কৰাৰ উদ্দেশ্যে ভাৰতীয় ৰে’লৱেই নতুন নিয়ম কাৰ্যকৰী কৰিবলৈ গৈছে।
নতুন নিয়ম অনুসৰি—
Tatkal টিকট বুক কৰাৰ সময়ত Aadhaar-ভিত্তিক পৰিচয় সত্যাপন বাধ্যতামূলক হ’ব।
IRCTC একাউণ্ট Aadhaarৰ সৈতে সংযোগ কৰা থাকিব লাগিব।
OTPৰ জৰিয়তে পৰিচয় নিশ্চিত কৰাৰ পিছতহে Tatkal টিকট বুক কৰিব পৰা যাব।
এই ব্যৱস্থাৰ ফলত প্ৰকৃত যাত্ৰীসকলে Tatkal টিকট লাভ কৰাৰ সম্ভাৱনা বৃদ্ধি পাব বুলি আশা কৰা হৈছে।
১ আগষ্ট কেৱল নতুন মাহৰ আৰম্ভণি নহয়, বৰঞ্চ বিত্তীয়, বেংকিং আৰু ৰে’ল যাত্ৰাৰ সৈতে জড়িত কেইবাটাও গুৰুত্বপূৰ্ণ পৰিবৰ্তনৰ সূচনাও। সেয়েহে অযথা অসুবিধাৰ সন্মুখীন হোৱাৰ আগতেই নতুন নিয়মসমূহ জানি প্ৰয়োজনীয় প্ৰস্তুতি গ্ৰহণ কৰাটো সকলোৰে বাবে লাভজনক হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
