ৰাছিয়া-ইউক্ৰেইন যুদ্ধৰ মাজতে ৰাছিয়ান সেনাত যোগ দিয়া ভাৰতীয় নাগৰিকসকলক লৈ ভয়ংকৰ তথ্য পোহৰলৈ আহিছে। ভাৰত চৰকাৰে প্ৰকাশ কৰা তথ্য অনুসৰি, ৰাছিয়ান সশস্ত্ৰ বাহিনীত নিয়োগ কৰা ২২৭ গৰাকী ভাৰতীয় নাগৰিকৰ ভিতৰত ৫১ গৰাকীৰ ইতিমধ্যে মৃ*ত্যু হৈছে। আনহাতে, ১৩৯ গৰাকী ভাৰতীয়ক ৰাছিয়ান সেনাৰ পৰা ডিচাৰ্জ কৰি উলিয়াই অনা হৈছে। বাকী থকা লোকসকলকো সোনকালে দেশলৈ ঘূৰাই অনাৰ বাবে ৰাছিয়াৰ সৈতে ভাৰত চৰকাৰৰ আলোচনা অব্যাহত আছে।
এই ঘটনাৰ আঁৰত মূলতঃ বিদেশত অধিক দৰমহাৰ চাকৰিৰ প্ৰলোভনৰ অভিযোগ আছে। বিভিন্ন সময়ত ভাৰতীয় যুৱকক ৰাছিয়াত ভাল দৰমহাৰ চাকৰি দিয়াৰ প্ৰতিশ্ৰুতি দি লৈ যোৱা হৈছিল বুলি অভিযোগ উত্থাপন হৈছে। কিন্তু ৰাছিয়াত উপস্থিত হোৱাৰ পিছত কিছুমান লোকক ৰাছিয়ান সেনাত সহায়ক বা আন কামত নিয়োগ কৰা হয় আৰু পিছত যুদ্ধক্ষেত্ৰলৈ পঠিওৱা হয় বুলি ভুক্তভোগী আৰু তেওঁলোকৰ পৰিয়ালৰ অভিযোগ। ভাৰত চৰকাৰেও নাগৰিকসকলক এনে সন্দেহজনক বিদেশী চাকৰিৰ প্ৰস্তাৱৰ পৰা সাৱধান হ’বলৈ একাধিকবাৰ সকীয়াই আহিছে।
ভাৰতৰ বৈদেশিক সচিব বিক্ৰম মিছৰীয়ে ৩১ আগষ্টত এই তথ্য প্ৰকাশ কৰে। তেওঁৰ মতে, ভাৰত চৰকাৰৰ হাতত ৰাছিয়ান সশস্ত্ৰ বাহিনীত নিয়োগ হোৱা ২২৭ গৰাকী ভাৰতীয় নাগৰিকৰ তথ্য আছে। ইয়াৰে—
৫১ গৰাকী ভাৰতীয়ৰ মৃত্যু হৈছে
১৩৯ গৰাকীক ৰাছিয়ান সেনাৰ পৰা ডিচাৰ্জ কৰা হৈছে
বাকীসকলৰ ক্ষেত্ৰত মুক্তি আৰু ভাৰতলৈ ঘূৰাই অনাৰ প্ৰক্ৰিয়া চলি আছে। অৰ্থাৎ, চৰকাৰী হিচাপত এতিয়ালৈকে এই ঘটনাত মৃত্যু হোৱা ভাৰতীয়ৰ সংখ্যা ৫১ লৈ বৃদ্ধি পাইছে।
বৈদেশিক সচিব বিক্ৰম মিছৰীয়ে কয় যে এই বিষয়টো ভাৰত আৰু ৰাছিয়াৰ মাজত বিভিন্ন পৰ্যায়ত একাধিকবাৰ উত্থাপন কৰা হৈছে। মস্কোত থকা ভাৰতীয় দূতাবাসে বিষয়টো নিয়মীয়াকৈ নিৰীক্ষণ কৰি আছে। ভাৰতৰ লক্ষ্য হৈছে ৰাছিয়ান সেনাত এতিয়াও থকা ভাৰতীয়সকলক যিমান সোনকালে সম্ভৱ সেৱাৰ পৰা মুক্ত কৰাই নিৰাপদে ভাৰতলৈ ঘূৰাই অনা।
ইয়াৰ আগতে জুলাই মাহতো বৈদেশিক পৰিক্ৰমা মন্ত্ৰালয়ে জনাইছিল যে ১৩৯ গৰাকী ভাৰতীয়ক ৰাছিয়ান সেনাৰ পৰা মুক্ত কৰা হৈছে আৰু প্ৰায় দুই ডজন ভাৰতীয় তেতিয়াও ৰাছিয়ান সামৰিক বাহিনীত থকা বুলি চৰকাৰে উল্লেখ কৰিছিল। বাকী লোকসকলৰ মুক্তিৰ বাবেও ৰাছিয়াৰ সৈতে যোগাযোগ চলি আছিল। কিন্তু পৰৱৰ্তী আপডেটত চৰকাৰৰ হাতত থকা মুঠ তালিকাৰ সংখ্যা ২২৭লৈ প্ৰকাশ পোৱাৰ লগতে ৫১ গৰাকী ভাৰতীয়ৰ মৃত্যুৰ তথ্য নিশ্চিত কৰা হয়।
এই বিষয়টো লৈ ইতিমধ্যে মৃত ভাৰতীয়সকলৰ পৰিয়ালৰ একাংশই উচ্চতম ন্যায়ালয়ৰ দ্বাৰস্থ হৈছিল। মে’ মাহত কেন্দ্ৰই আদালতক জনাইছিল যে তেতিয়ালৈকে ২১৭ গৰাকী ভাৰতীয় ৰাছিয়ান সশস্ত্ৰ বাহিনীত যোগদান কৰাৰ তথ্য আছিল; ইয়াৰে ১৩৯ জনক কূটনৈতিক প্ৰচেষ্টাৰে মুক্ত কৰা হৈছিল, ৪৯ জনৰ মৃত্যু হৈছিল, ৬ জন নিৰুদ্দেশ আৰু ২৩ জনৰ স্থিতি স্পষ্ট হোৱা নাছিল। পৰৱৰ্তী সময়ত এই সংখ্যা আৰু তথ্য আপডেট হৈছে আৰু বৰ্তমান চৰকাৰী হিচাপত ২২৭ জনৰ ভিতৰত ৫১ জনৰ মৃত্যুৰ কথা প্ৰকাশ পাইছে।
এই গুৰুত্বপূৰ্ণ তথ্যটো প্ৰকাশ পোৱাৰ সময়তে প্ৰধানমন্ত্ৰী নৰেন্দ্ৰ মোদীয়ে ৰাছিয়াৰ ৰাষ্ট্ৰপতি ভ্লাদিমিৰ পুটিনক সাক্ষাৎ কৰিছিল। বৈঠকত ইউক্ৰেইন যুদ্ধৰ বিষয়টোও গুৰুত্বসহকাৰে আলোচনা হয়। মোদীয়ে যুদ্ধৰ অন্ত পেলাই শান্তিৰ পথলৈ আগবাঢ়িবলৈ আহ্বান জনায়। এই পৰিপ্ৰেক্ষিতত ৰাছিয়ান সেনাত আবদ্ধ ভাৰতীয়সকলক ঘূৰাই অনাৰ বিষয়টো ভাৰতৰ বাবে আৰু অধিক গুৰুত্বপূৰ্ণ হৈ পৰিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
