কলকাতা-চাইৰাং এক্সপ্ৰেছ দুৰ্ঘটনাগ্ৰস্থ। বুধবাৰে পুৱা প্ৰায় ৭ বজাত অসমৰ ডিগাৰুত কলকাতা-চাইৰাং এক্সপ্ৰেছৰ ৬টা ডবা ৰে’লপথৰ পৰা ওলাই যায়। ৰে’লপথৰ পৰা আঁতৰি যোৱাৰ ফলত ডবাবোৰ হেলনীয়া হৈ পৰে। এই দুৰ্ঘটনাত এতিয়ালৈকে কোনো লোকৰ মৃত্যু হোৱা নাই। অৱশ্যে কেইবাজনো লোক আহত হোৱাৰ খবৰ পোৱা গৈছে। এক্সপ্ৰেছখন ৰেলপথৰ পৰা ওলোৱাৰ পিছত যাত্ৰীসকলৰ মাজত হুলস্থুলৰ সৃষ্টি হয়। স্থানীয় ৰাইজে ততাতৈয়াকৈ ঘটনাস্থলীত উপস্থিত হয়। উদ্ধাৰ অভিযান আৰম্ভ কৰে। তথ্য লাভ কৰাৰ পিছতে ৰে’ল বিভাগৰ বিষয়াসকলে দুৰ্ঘটনাস্থলীলৈ ততাতৈয়াকৈ উপস্থিত হয়। এই দুৰ্ঘটনা কেনেদৰে সংঘটিত হ’ল তদন্ত অব্যাহত ৰাখিছে ৰে’লৱে।
জানিব পৰা মতে, মিজোৰামৰ পৰা কলকাতালৈ গৈ আছিল কলকাতা-চাইৰাং এক্সপ্ৰেছ। আন এখন ৰে’ললৈ বাট দিবলৈ ৰে’লখন ডিগাৰু ষ্টেচনলৈ অনা হৈছিল। সেই সময়ত চালকজনে ৰে’লৰ গতি নিয়ন্ত্ৰণ কৰিব পৰা নাছিল। ইয়াৰ বাবেই এই দুৰ্ঘটনা সংঘটিত হয়। সকলো যাত্ৰী সুৰক্ষিত বুলি ৰে’লৱে অৱগত কৰে। দুৰ্ঘটনা সংঘটিত হোৱাৰ লগে লগে উদ্ধাৰ কাম আৰম্ভ হয়। যাত্ৰীসকলক বিকল্প ৰে’লৰ জৰিয়তে গন্তব্যস্থানলৈ নিয়াৰ ব্যৱস্থা কৰা হৈছে। দুৰ্ঘটনাৰ সময়ত এক্সপ্ৰেছৰ গতি লেহেমীয়া হোৱাৰ বাবে বৃহৎ ক্ষতিৰ পৰা হাত সাৰিব পৰা যায় বুলি অনুমান কৰা হৈছে। দুই এজন লোক সামান্যভাৱে আহত হয়। স্থানীয় চিকিৎসালয়লৈ লৈ যোৱা হয়।
উত্তৰ-পূব সীমান্ত ৰেলৱেৰ চিপিআৰঅ’ কপিঞ্জল কিশোৰ শৰ্মাই সংবাদ সংস্থা এএনআইক জনাইছে যে, “আজি পুৱা প্ৰায় ৬:৫৪ বজাত কলকাতা-চাইৰাং এক্সপ্ৰেছৰ ছয়টা ডবা ডিগাৰু ৰেলৱে ষ্টেচনত ৰেলপথৰ পৰা ওলাই যায়। এতিয়ালৈকে কোনো লোকৰ মৃত্যু হোৱা নাই। ৰে’লৱেৰ বিষয়াসকল সেই স্থানলৈ ৰাওনা হৈছে।”
হেল্পলাইন ডেস্ক-
এই দুৰ্ঘটনাত ছিলডা আৰু কলকাতা ষ্টেচনত হেল্পলাইন ডেস্ক মুকলি কৰা হৈছে। ছিলদাহ ষ্টেচনত থকা হেল্পলাইন ডেস্কত ফোন কৰিবলৈ দুটা নম্বৰ দিয়া হৈছে। নম্বৰ দুটা হ’ল ০৩৩-২৩৮৩৩৩২৬ আৰু ০৩৩-২৩৫০৯৬৪৩।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
