ৰাষ্ট্ৰপিতা মহাত্মা গান্ধীক হত্যা কৰা নাথুৰাম গডছে কেৱল হিন্দুত্ববাদীসকলৰে নায়ক হৈ থকা নাই৷ এতিয়া কণ কণ শিশুৰ মাজতো গডছে নায়ক হৈ উঠিছে৷ অৰ্থাৎ আৰএছএছ আৰু হিন্দুত্ববাদীয়ে নাথুৰাম গডছেক নায়ক বনোৱাৰ চেষ্টাই আৰু এঢাপ আগুৱাই গৈছে৷
গুজৰাট অৰ্থাৎ মহাত্মা গান্ধীৰ জন্মভূমিতে এই কথাৰ শেহতীয়াকৈ প্ৰমাণ পোৱা গৈছে৷ সোমবাৰে গুজৰাটৰ বলচাড জিলাৰ এখন বিদ্যালয়তএখন তৰ্ক প্ৰতিযোগিতা অনুষ্ঠিত কৰা হৈছিল৷ উক্ত তৰ্ক প্ৰতিযোগিতাৰ বিষয় ৰখা হৈছিল ‘মোৰ আদৰ্শ ব্যক্তি নাথুৰাম গডছে’৷
প্ৰতিযোগিতাখনত পঞ্চম শ্ৰেণীৰ পৰা অষ্টম শ্ৰেণীলৈকে অৰ্থাৎ ৭ ৰপৰা ১২ বছৰ শিশুৱে অংশগ্ৰহণ কৰিছিল৷ উক্ত প্ৰতিযোগিতাত নাথুৰাম গডছেৰ সমৰ্থন আৰু মহাত্মা গান্ধীৰ বিৰুদ্ধে যুক্তি প্ৰদান কৰা এগৰাকী শিশুক প্ৰথম পুৰস্কাৰ প্ৰদান কৰা হয়৷
ইয়াৰ পিছতে বিদ্যালয়খনত এক হুৱস্থলীয়া পৰিৱেশৰ সৃষ্টি হয়৷ গডছেৰ সমৰ্থনত বক্তব্য ৰখা শিশুক প্ৰথম পুৰস্কাৰ প্ৰদান কৰাৰ পিছতে একাংশই অনুষ্ঠানটো অনুষ্ঠিত কৰা ব্যক্তিৰ বিৰুদ্ধে বিহিত ব্যৱস্থা গ্ৰহণৰ দাবী তোলে৷
ইফালে বিদ্যালয়খনৰ প্ৰধান শিক্ষকে শিশুৰ প্ৰতিভা বিকাশৰ উপলক্ষ্যে তৰ্ক প্ৰতিযোগিতা অনুষ্ঠিত কৰা বুলি প্ৰকাশ কৰিছে৷ প্ৰধান শিক্ষকগৰাকীৰ মতে জিলা ক্ৰীড়া বিষয়াৰ কাৰ্যালয়ৰ উদ্যোগত চৰকাৰীভাৱে এই কাৰ্যসূচী গ্ৰহণ কৰা হৈছিল৷
ইফালে অনুষ্ঠানত উপস্থিত থকা একাংশ লোকে দাবী কৰিছে যে কাৰ্যসূচী আৰম্ভ হোৰাৰ সময়লৈকে তৰ্ক প্ৰতিযোগিতাৰ বিষয় কি আছিল সেয়া বিদ্যালয়ৰ কৰ্তৃপক্ষই সদৰী কৰা নাছিল৷
দুয়োপক্ষৰ আক্ৰমণাত্মক আচৰণৰ বাবে পৰিস্থিতি অতি উত্তপ্ত হৈ পৰে আৰু পৰিস্থিতি শান্ত কৰিবলৈ উক্ত স্থানত জিলাখনৰ ক্ৰীড়া বিষয়াই উপস্থিত হয়৷
পৰিস্থিতিয়ে গম্ভীৰ ৰূপ ধাৰণ কৰাৰ পিছত ৰাজ্যখনৰ গৃহমন্ত্ৰীয়ে ঘটনাত জড়িত লোকৰ বিৰুদ্ধে ব্যৱস্থা লোৱা হ’ব বুলি আশ্বাস প্ৰদান কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
