অসম লাইভ ২৪ঃ এদিন সমগ্ৰ বিশ্বক ভাৰতে শাসন কৰিব! ভাৰতৰ সৈতে সহযোগ কৰিব ৰাছিয়াই। এই ভৱিষ্যতবাণী কৰিছিল ভৱিষ্যতদ্ৰষ্টা নষ্ট্ৰাডামুছে। ৰাছিয়া-ইউক্ৰেইনৰ যুদ্ধৰ প্ৰাৰম্ভিককালতো একেই ভৱিষ্যতবাণী কৰিছিল বাবা ভাংগাইয়ো। সেই ভৱিষ্যতবাণীয়েই যেন ফলিয়াইছে। এখন পিছত আনখন উন্নত দেশত ভাৰতীয়ই ধৰিছে শাসনৰ বাঘজৰী।
শেহতীয়াভাৱে ব্ৰিটেইনত প্ৰধানমন্ত্ৰীৰ শাসনত বহিছে ভাৰতীয়মূলৰ ঋষি ছুনাক। ২০০ বছৰে ভাৰতীয়ক শাসন কৰিছিল ইংৰাজে। সেই ইংৰাজৰ শাসনব্যৱস্থাক এতিয়া পৰিচালনা কৰিব ভাৰতীয়মূলীয় ব্যক্তিয়ে। ঋষি ছুনাকে ব্ৰিটেইনৰ প্ৰধানমন্ত্ৰীৰ শাসনত বহাৰে পৰাই বিশ্বজুৰি চৰ্চা লাভ কৰিছে এই বিষয়টোৱে। কেৱল ঋষিয়েই নহয় ব্ৰিটেইনৰ কেবিনেট মন্ত্ৰীসভাত আছে ভাৰতীয় বংশোদ্ভূতৰ অন্য মন্ত্ৰীও। ব্ৰিটেইনৰ গৃহমন্ত্ৰী হিচাপে নিযুক্ত হৈছে ভাৰতীয়মূলীয় চুৱেলা ব্ৰেভাৰমেন।
ইপিনে বৰ্তমানলৈ উন্নত দেশৰ বিভিন্ন গৱেষণাগাৰত ভাৰতীয় বিজ্ঞানী, চিকিৎসকে দপদপাই থকাৰ সময়তে শাসন প্ৰক্ৰিয়াতো ভাৰতীয়মূলীয় লোক প্ৰৱেশ কৰাটো ভাৰতৰ বাবেই শুভ লক্ষণ বুলি ৰাজনৈতিক মহলেও চৰ্চা আৰম্ভ কৰিছে। বিগত বৰ্ষত আমেৰিকাৰ উপ ৰাষ্ট্ৰপতি হিচাপে শপত লৈছে ভাৰতীয় মূলৰ কমলা হেৰিছে।
বিশ্ব ৰাজনীতিত ভাৰতীয় মূলৰ আধিপত্য বাঢ়িছে তাৰ প্ৰমাণ কেৱল কমলা হেৰিছ অথৱা, ঋষি ছুনাকেই নহয়। বহিঃবিশ্বত সফলতাৰ শিখৰত বাঢ়িছে ভাৰতীয়মূলৰ দপদপনি। পৰ্তুগালৰ প্রধানমন্ত্রী এণ্টোনিঅ’ কোষ্টাও ভাৰতীয় মূলৰ আনহাতে গায়েনাৰ ৰাষ্ট্রপতি মহম্মদ ইৰফানো ভাৰতীয় মূলৰ। মৰিছাছৰ প্রধানমন্ত্রী প্রবীন্দ্র যুখনাওথো ভাৰতীয় মূলৰ হোৱাৰ বিপৰীতে দেশখনৰ ৰাষ্ট্রপতি পৃথ্বীৰাজ ৰূপাণো ভাৰতীয় বংশোদ্ভৱৰ। ছুৰিনামৰ ৰাষ্ট্রপতি চন্দ্রিকাপ্রসাদ সান্তোখি ভাৰতীয় মূলৰ হোৱাৰ উপৰিও আমেৰিকা, ব্রিটেইন, কানাডা, অষ্ট্ৰেলিয়া, দঃ আফ্ৰিকা, UAE-ৰ মন্ত্রী তালিকাত আছে বহুকেইগৰাকী ভাৰতীয়মূলীয় ব্যক্তি। শেহতীয়াকৈ ব্ৰিটেইনত গঠন হোৱা কেবিনেট মন্ত্ৰীসভাত আছে প্ৰীতি পেটেল আৰু ছুৱেলা ব্রুৱেৰমেন।
উল্লেখ্য যে ঋষিয়ে অহা ২৮ অক্টোবৰত ব্ৰিটেইনৰ নতুন প্ৰধানমন্ত্ৰী হিচাপে শপত ল’ব। শপতগ্ৰহণৰ পূ্ৰ্বেই ভাৰতীয়মূলীয় ব্যক্তিয়ে ব্ৰিটেইনৰ শাসনভাৰ লোৱাত বহুতেই ঋষি কোন সেই সম্পৰ্কেও জানিবলৈ আগ্ৰহী হৈ উঠিছে। ঋষি হৈছে ব্ৰিটেনৰ প্ৰধানমন্ত্ৰীৰ শাসনত বহা সৰ্বকনিষ্ঠ প্ৰধানমন্ত্ৰী। ব্ৰিটেইনৰ ইতিহাসত প্ৰথমবাৰৰ বাবে মাত্ৰ ৪২ বছৰীয়া এজন ব্যক্তিয়ে প্ৰধানমন্ত্ৰীৰ আসন শুৱনি কৰিব। অক্সফৰ্ড ইউনিভাৰ্চিটিত শিক্ষাগ্ৰহণ কৰা ঋষিয়ে ২০১৫ চনত সংসদীয় ৰাজনীতিত প্ৰবেশ কৰে। ২০১৫ চনত ঋষিয়ে এম পি হিচাপে ৰাজনীতিৰ পথাৰত ভৰি ৰাখে। তাৰ পিছতেই ২০২০ চনত ব্ৰিটেইনৰ কেবিনেট মন্ত্ৰীসভালৈ আহে ঋষি। বৰ্তমান দেশখনৰ প্ৰধানমন্ত্ৰী হিচাপে দায়িত্বভাৰ ল’বলৈ যোৱা ঋষিক শুভেচ্ছা জ্ঞাপন কৰিছে ভাৰতৰ প্ৰধানমন্ত্ৰী নৰেন্দ্ৰ মোদীয়েও।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
