অসম লাইভ২৪ঃ ককা দেউতা নাতি আৰু হাতীত শিশু অভিনেতাৰ ৰূপত নিপন গোস্বামীৰ সৈতে অভিনয় কৰিছিল মুখ্যমন্ত্ৰী হিমন্ত বিশ্ব শৰ্মাই। হাতীৰ পিঠিত উঠি ঘূৰি ফুৰা কণমানিগৰাকী আজি অসমৰ মুখ্যমন্ত্ৰী। অভিনেতা নিপন গোস্বামীৰ কায়িক বিদায়ৰ খবৰে মৰ্মাহত কৰিছে মুখ্যমন্ত্ৰীগৰাকীকো। অভিনেতাগৰাকীৰ মৃত্যুত ভাঙি পৰিছে মুখ্যমন্ত্ৰী হিমন্ত বিশ্ব শৰ্মা।
অভিনেতাগৰাকীৰ মৃত্যুত মুখ্যমন্ত্ৰীগৰাকীয়ে শোক প্ৰকাশ কৰি টুইটত তেওঁৰ সৈতে কটোৱা সময়বোৰ সোঁৱৰি লিখিছে আবেগিক পষ্ট। অসমীয়া ছবি জগতৰ চিৰসেউজ অভিনেতা নিপন গোস্বামীয়ে অসমৰ প্ৰথমগৰাকী অভিনেতা যিয়ে তাহানিতেই নাটকৰ ডিগ্ৰী লৈ অভিনয়ক্ষেত্ৰত ভৰি দিছিল। নাটকৰো ডিগ্ৰী থাকে! প্ৰায়সংখ্যক অসমবাসীয়ে সেই সময়ত এই বিষয়সন্দৰ্ভত জ্ঞাত নৌহওতেই তেওঁ নাটকৰ ডিগ্ৰী গ্ৰহণ কৰিবলৈ অসমৰ বাহিৰলৈ গৈছিল।
বিশিষ্ট অভিনেতাগৰাকীক হেৰুৱাই মৰ্মাহত হোৱা মুখ্যমন্ত্ৰীয়ে তেওঁৰ কথা সুঁৱৰি লিখিছে, ‘পৰলোক গমনৰ বাতৰি পাই মই ব্যথিত হৈ পৰিছোঁ৷ শৈশৱতে ‘ককাদেউতা নাতি আৰু হাতী’ নামৰ চলচ্চিত্ৰখনত অভিনয় কৰাৰ সময়তে অসমৰ অন্যতম শ্ৰেষ্ঠ অভিনেতাগৰাকীৰ মই সান্নিধ্য লাভ কৰি ধন্য হৈছিলোঁ৷ বহুকেইখন অসমীয়া চিনেমাত অতি হৃদয়স্পৰ্শী, মননশীল চৰিত্ৰত অভিনয় কৰা গোস্বামীদেৱৰ সাংস্কৃতিক জগতলৈ অৱদান অসমীয়া জাতিয়ে কোনোদিনে পাহৰিব নোৱাৰিব৷ এই দুখৰ মুহূৰ্তত বৰেণ্য অভিনেতাগৰাকীৰ বিদেহ আত্মাৰ মই চিৰশান্তি কামনাৰ অৰ্থে ঈশ্বৰৰ ওচৰত প্ৰাৰ্থনা জনালোঁ আৰু শোকসন্তপ্ত পৰিয়ালবৰ্গলৈ গভীৰ শ্ৰদ্ধাঞ্জলি জ্ঞাপন কৰিলোঁ৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
